ब्राह्मण उवाच । (१।१)

आश्चर्यं नात्र संदेहः सुप्रीतो ऽस्मि भुजंगम । (१।२)

अन्वर्थोपगतैर् वाक्यैः पन्थानं चास्मि दर्शितः ॥ (१।३)

स्वस्ति ते ऽस्तु गमिष्यामि साधो भुजगसत्तम । (२।१)

स्मरणीयो ऽस्मि भवता संप्रेषणनियोजनैः ॥ (२।२)

नाग उवाच । (३।१)

अनुक्त्वा मद्गतं कार्यं क्वेदानीं प्रस्थितो भवान् । (३।२)

उच्यतां द्विज यत् कार्यं यदर्थं त्वम् इहागतः ॥ (३।३)

उक्तानुक्ते कृते कार्ये माम् आमन्त्र्य द्विजर्षभ । (४।१)

मया प्रत्यभ्यनुज्ञातस्ततो यास्यसि ब्राह्मण ॥ (४।२)

न हि मां केवलं दृष्ट्वा त्यक्त्वा प्रणयवान् इह । (५।१)

गन्तुम् अर्हसि विप्रर्षे वृक्षमूलगतो यथा ॥ (५।२)

त्वयि चाहं द्विजश्रेष्ठ भवान्मयि न संशयः । (६।१)

लोको ऽयं भवतः सर्वः का चिन्ता मयि ते ऽनघ ॥ (६।२)

ब्राह्मण उवाच । (७।१)

एवम् एतन्महाप्राज्ञ विज्ञातार्थ भुजंगम । (७।२)

नातिरिक्तास्त्वया देवाः सर्वथैव यथातथम् ॥ (७।३)

य एवाहं स एव त्वम् एवम् एतद् भुजंगम । (८।१)

अहं भवांश्च भूतानि सर्वे सर्वत्रगाः सदा ॥ (८।२)

आसीत् तु मे भोगपते संशयः पुण्यसंचये । (९।१)

सो ऽहम् उञ्छव्रतं साधो चरिष्याम्यर्थदर्शनम् ॥ (९।२)

एष मे निश्चयः साधो कृतः कारणवत्तरः । (१०।१)

आमन्त्रयामि भद्रं ते कृतार्थो ऽस्मि भुजंगम ॥ (१०।२)