ब्राह्मण उवाच । (१।१)

त्रयो वै रिपवो लोके नव वै गुणतः स्मृताः । (१।२)

हर्षः स्तम्भो ऽभिमानश्च त्रयस्ते सात्त्विका गुणाः ॥ (१।३)

शोकः क्रोधो ऽतिसंरम्भो राजसास्ते गुणाः स्मृताः । (२।१)

स्वप्नस्तन्द्री च मोहश्च त्रयस्ते तामसा गुणाः ॥ (२।२)

एतान्निकृत्य धृतिमान् बाणसंघैर् अतन्द्रितः । (३।१)

जेतुं परान् उत्सहते प्रशान्तात्मा जितेन्द्रियः ॥ (३।२)

अत्र गाथाः कीर्तयन्ति पुराकल्पविदो जनाः । (४।१)

अम्बरीषेण या गीता राज्ञा राज्यं प्रशासता ॥ (४।२)

समुदीर्णेषु दोषेषु वध्यमानेषु साधुषु । (५।१)

जग्राह तरसा राज्यम् अम्बरीष इति श्रुतिः ॥ (५।२)

स निगृह्य महादोषान् साधून् समभिपूज्य च । (६।१)

जगाम महतीं सिद्धिं गाथां चेमां जगाद ह ॥ (६।२)

भूयिष्ठं मे जिता दोषा निहताः सर्वशत्रवः । (७।१)

एको दोषो ऽवशिष्टस्तु वध्यः स न हतो मया ॥ (७।२)

येन युक्तो जन्तुर् अयं वैतृष्ण्यं नाधिगच्छति । (८।१)

तृष्णार्त इव निम्नानि धावमानो न बुध्यते ॥ (८।२)

अकार्यम् अपि येनेह प्रयुक्तः सेवते नरः । (९।१)

तं लोभम् असिभिस्तीक्ष्णैर् निकृन्तन्तं निकृन्तत ॥ (९।२)

लोभाद्धि जायते तृष्णा ततश्चिन्ता प्रसज्यते । (१०।१)

स लिप्समानो लभते भूयिष्ठं राजसान् गुणान् ॥ (१०।२)

स तैर् गुणैः संहतदेहबन्धनः पुनः पुनर् जायति कर्म चेहते । (११।१)

जन्मक्षये भिन्नविकीर्णदेहः पुनर् मृत्युं गच्छति जन्मनि स्वे ॥ (११।२)

तस्माद् एनं सम्यग् अवेक्ष्य लोभं निगृह्य धृत्यात्मनि राज्यम् इच्छेत् । (१२।१)

एतद् राज्यं नान्यद् अस्तीति विद्याद् यस्त्वत्र राजा विजितो ममैकः ॥ (१२।२)

इति राज्ञाम्बरीषेण गाथा गीता यशस्विना । (१३।१)

आधिराज्यं पुरस्कृत्य लोभम् एकं निकृन्तता ॥ (१३।२)