युधिष्ठिर उवाच । (१।१)

के पूर्वम् आसन् पतयः प्रजानां भरतर्षभ । (१।२)

के चर्षयो महाभागा दिक्षु प्रत्येकशः स्मृताः ॥ (१।३)

भीष्म उवाच । (२।१)

श्रूयतां भरतश्रेष्ठ यन्मा त्वं परिपृच्छसि । (२।२)

प्रजानां पतयो ये स्म दिक्षु प्रत्येकशः स्मृताः ॥ (२।३)

एकः स्वयंभूर् भगवान् आद्यो ब्रह्मा सनातनः । (३।१)

ब्रह्मणः सप्त पुत्रा वै महात्मानः स्वयंभुवः ॥ (३।२)

मरीचिर् अत्र्यङ्गिरसौ पुलस्त्यः पुलहः क्रतुः । (४।१)

वसिष्ठश्च महाभागः सदृशा वै स्वयंभुवा ॥ (४।२)

सप्त ब्रह्माण इत्येष पुराणे निश्चयो गतः । (५।१)

अत ऊर्ध्वं प्रवक्ष्यामि सर्वान् एव प्रजापतीन् ॥ (५।२)

अत्रिवंशसमुत्पन्नो ब्रह्मयोनिः सनातनः । (६।१)

प्राचीनबर्हिर् भगवांस्तस्मात् प्राचेतसो दश ॥ (६।२)

दशानां तनयस्त्वेको दक्षो नाम प्रजापतिः । (७।१)

तस्य द्वे नामनी लोके दक्षः क इति चोच्यते ॥ (७।२)

मरीचेः कश्यपः पुत्रस्तस्य द्वे नामनी श्रुते । (८।१)

अरिष्टनेमिर् इत्येकं कश्यपेत्यपरं विदुः ॥ (८।२)

अङ्गश्चैवौरसः श्रीमान् राजा भौमश्च वीर्यवान् । (९।१)

सहस्रं यश्च दिव्यानां युगानां पर्युपासिता ॥ (९।२)

अर्यमा चैव भगवान् ये चान्ये तनया विभो । (१०।१)

एते प्रदेशाः कथिता भुवनानां प्रभावनाः ॥ (१०।२)

शशबिन्दोश्च भार्याणां सहस्राणि दशाच्युत । (११।१)

एकैकस्यां सहस्रं तु तनयानाम् अभूत् तदा ॥ (११।२)

एवं शतसहस्राणां शतं तस्य महात्मनः । (१२।१)

पुत्राणां न च ते कंचिद् इच्छन्त्यन्यं प्रजापतिम् ॥ (१२।२)

प्रजाम् आचक्षते विप्राः पौराणीं शाशबिन्दवीम् । (१३।१)

स वृष्णिवंशप्रभवो महान् वंशः प्रजापतेः ॥ (१३।२)

एते प्रजानां पतयः समुद्दिष्टा यशस्विनः । (१४।१)

अतः परं प्रवक्ष्यामि देवांस्त्रिभुवनेश्वरान् ॥ (१४।२)

भगो ऽंशश्चार्यमा चैव मित्रो ऽथ वरुणस्तथा । (१५।१)

सविता चैव धाता च विवस्वांश्च महाबलः ॥ (१५।२)

पूषा त्वष्टा तथैवेन्द्रो द्वादशो विष्णुर् उच्यते । (१६।१)

त एते द्वादशादित्याः कश्यपस्यात्मसंभवाः ॥ (१६।२)

नासत्यश्चैव दस्रश्च स्मृतौ द्वावश्विनावपि । (१७।१)

मार्ताण्डस्यात्मजावेतावष्टमस्य प्रजापतेः ॥ (१७।२)

त्वष्टुश्चैवात्मजः श्रीमान् विश्वरूपो महायशाः । (१८।१)

अजैकपाद् अहिर्बुध्न्यो विरूपाक्षो ऽथ रैवतः ॥ (१८।२)

हरश्च बहुरूपश्च त्र्यम्बकश्च सुरेश्वरः । (१९।१)

सावित्रश्च जयन्तश्च पिनाकी चापराजितः । (१९।२)

पूर्वम् एव महाभागा वसवो ऽष्टौ प्रकीर्तिताः ॥ (१९।३)

एत एवंविधा देवा मनोर् एव प्रजापतेः । (२०।१)

ते च पूर्वे सुराश्चेति द्विविधाः पितरः स्मृताः ॥ (२०।२)

शीलरूपरतास्त्वन्ये तथान्ये सिद्धसाध्ययोः । (२१।१)

ऋभवो मरुतश्चैव देवानां चोदिता गणाः ॥ (२१।२)

एवम् एते समाम्नाता विश्वेदेवास्तथाश्विनौ । (२२।१)

आदित्याः क्षत्रियास्तेषां विशस्तु मरुतस्तथा ॥ (२२।२)

अश्विनौ तु मतौ शूद्रौ तपस्युग्रे समाहितौ । (२३।१)

स्मृतास्त्वङ्गिरसो देवा ब्राह्मणा इति निश्चयः । (२३।२)

इत्येतत् सर्वदेवानां चातुर्वर्ण्यं प्रकीर्तितम् ॥ (२३।३)

एतान् वै प्रातर् उत्थाय देवान् यस्तु प्रकीर्तयेत् । (२४।१)

स्वजाद् अन्यकृताच्चैव सर्वपापात् प्रमुच्यते ॥ (२४।२)

यवक्रीतो ऽथ रैभ्यश्च अर्वावसुपरावसू । (२५।१)

औशिजश्चैव कक्षीवान्नलश्चाङ्गिरसः सुताः ॥ (२५।२)

ऋषेर् मेधातिथेः पुत्रः कण्वो बर्हिषदस्तथा । (२६।१)

त्रैलोक्यभावनास्तात प्राच्यां सप्तर्षयस्तथा ॥ (२६।२)

उन्मुचो विमुचश्चैव स्वस्त्यात्रेयश्च वीर्यवान् । (२७।१)

प्रमुचश्चेध्मवाहश्च भगवांश्च दृढव्रतः ॥ (२७।२)

मित्रावरुणयोः पुत्रस्तथागस्त्यः प्रतापवान् । (२८।१)

एते ब्रह्मर्षयो नित्यम् आश्रिता दक्षिणां दिशम् ॥ (२८।२)

रुषद्गुः कवषो धौम्यः परिव्याधश्च वीर्यवान् । (२९।१)

एकतश्च द्वितश्चैव त्रितश्चैव महर्षयः ॥ (२९।२)

अत्रेः पुत्रश्च भगवांस्तथा सारस्वतः प्रभुः । (३०।१)

एते नव महात्मानः पश्चिमाम् आश्रिता दिशम् ॥ (३०।२)

आत्रेयश्च वसिष्ठश्च कश्यपश्च महान् ऋषिः । (३१।१)

गौतमः सभरद्वाजो विश्वामित्रो ऽथ कौशिकः ॥ (३१।२)

तथैव पुत्रो भगवान् ऋचीकस्य महात्मनः । (३२।१)

जमदग्निश्च सप्तैते उदीचीं दिशम् आश्रिताः ॥ (३२।२)

एते प्रतिदिशं सर्वे कीर्तितास्तिग्मतेजसः । (३३।१)

साक्षिभूता महात्मानो भुवनानां प्रभावनाः ॥ (३३।२)

एवम् एते महात्मानः स्थिताः प्रत्येकशो दिशः । (३४।१)

एतेषां कीर्तनं कृत्वा सर्वपापैः प्रमुच्यते ॥ (३४।२)

यस्यां यस्यां दिशि ह्येते तां दिशं शरणं गतः । (३५।१)

मुच्यते सर्वपापेभ्यः स्वस्तिमांश्च गृहान् व्रजेत् ॥ (३५।२)