वैशंपायन उवाच । (१।१)

ततः कुमारविषये श्रेणिमन्तम् अथाजयत् । (१।२)

कोसलाधिपतिं चैव बृहद्बलम् अरिंदमः ॥ (१।३)

अयोध्यायां तु धर्मज्ञं दीर्घप्रज्ञं महाबलम् । (२।१)

अजयत् पाण्डवश्रेष्ठो नातितीव्रेण कर्मणा ॥ (२।२)

ततो गोपालकच्छं च सोत्तमान् अपि चोत्तरान् । (३।१)

मल्लानाम् अधिपं चैव पार्थिवं व्यजयत् प्रभुः ॥ (३।२)

ततो हिमवतः पार्श्वे समभ्येत्य जरद्गवम् । (४।१)

सर्वम् अल्पेन कालेन देशं चक्रे वशे बली ॥ (४।२)

एवं बहुविधान् देशान् विजित्य पुरुषर्षभः । (५।१)

उन्नाटम् अभितो जिग्ये कुक्षिमन्तं च पर्वतम् । (५।२)

पाण्डवः सुमहावीर्यो बलेन बलिनां वरः ॥ (५।३)

स काशिराजं समरे सुबन्धुम् अनिवर्तिनम् । (६।१)

वशे चक्रे महाबाहुर् भीमो भीमपराक्रमः ॥ (६।२)

ततः सुपार्श्वम् अभितस्तथा राजपतिं क्रथम् । (७।१)

युध्यमानं बलात् संख्ये विजिग्ये पाण्डवर्षभः ॥ (७।२)

ततो मत्स्यान्महातेजा मलयांश्च महाबलान् । (८।१)

अनवद्यान् गयांश्चैव पशुभूमिं च सर्वशः ॥ (८।२)

निवृत्य च महाबाहुर् मदर्वीकं महीधरम् । (९।१)

सोपदेशं विनिर्जित्य प्रययावुत्तरामुखः । (९।२)

वत्सभूमिं च कौन्तेयो विजिग्ये बलवान् बलात् ॥ (९।३)

भर्गाणाम् अधिपं चैव निषादाधिपतिं तथा । (१०।१)

विजिग्ये भूमिपालांश्च मणिमत्प्रमुखान् बहून् ॥ (१०।२)

ततो दक्षिणमल्लांश्च भोगवन्तं च पाण्डवः । (११।१)

तरसैवाजयद् भीमो नातितीव्रेण कर्मणा ॥ (११।२)

शर्मकान् वर्मकांश्चैव सान्त्वेनैवाजयत् प्रभुः । (१२।१)

वैदेहकं च राजानं जनकं जगतीपतिम् । (१२।२)

विजिग्ये पुरुषव्याघ्रो नातितीव्रेण कर्मणा ॥ (१२।३)

वैदेहस्थस्तु कौन्तेय इन्द्रपर्वतम् अन्तिकात् । (१३।१)

किरातानाम् अधिपतीन् व्यजयत् सप्त पाण्डवः ॥ (१३।२)

ततः सुह्मान् प्राच्यसुह्मान् समक्षांश्चैव वीर्यवान् । (१४।१)

विजित्य युधि कौन्तेयो मागधान् उपयाद् बली ॥ (१४।२)

दण्डं च दण्डधारं च विजित्य पृथिवीपतीन् । (१५।१)

तैर् एव सहितः सर्वैर् गिरिव्रजम् उपाद्रवत् ॥ (१५।२)

जारासंधिं सान्त्वयित्वा करे च विनिवेश्य ह । (१६।१)

तैर् एव सहितो राजन् कर्णम् अभ्यद्रवद् बली ॥ (१६।२)

स कम्पयन्न् इव महीं बलेन चतुरङ्गिणा । (१७।१)

युयुधे पाण्डवश्रेष्ठः कर्णेनामित्रघातिना ॥ (१७।२)

स कर्णं युधि निर्जित्य वशे कृत्वा च भारत । (१८।१)

ततो विजिग्ये बलवान् राज्ञः पर्वतवासिनः ॥ (१८।२)

अथ मोदागिरिं चैव राजानं बलवत्तरम् । (१९।१)

पाण्डवो बाहुवीर्येण निजघान महामृधे ॥ (१९।२)

ततः पौण्ड्राधिपं वीरं वासुदेवं महाबलम् । (२०।१)

कौशिकीकच्छनिलयं राजानं च महौजसम् ॥ (२०।२)

उभौ बलवृतौ वीरावुभौ तीव्रपराक्रमौ । (२१।१)

निर्जित्याजौ महाराज वङ्गराजम् उपाद्रवत् ॥ (२१।२)

समुद्रसेनं निर्जित्य चन्द्रसेनं च पार्थिवम् । (२२।१)

ताम्रलिप्तं च राजानं काचं वङ्गाधिपं तथा ॥ (२२।२)

सुह्मानाम् अधिपं चैव ये च सागरवासिनः । (२३।१)

सर्वान्म्लेच्छगणांश्चैव विजिग्ये भरतर्षभः ॥ (२३।२)

एवं बहुविधान् देशान् विजित्य पवनात्मजः । (२४।१)

वसु तेभ्य उपादाय लौहित्यम् अगमद् बली ॥ (२४।२)

स सर्वान्म्लेच्छनृपतीन् सागरद्वीपवासिनः । (२५।१)

करम् आहारयामास रत्नानि विविधानि च ॥ (२५।२)

चन्दनागुरुवस्त्राणि मणिमुक्तम् अनुत्तमम् । (२६।१)

काञ्चनं रजतं वज्रं विद्रुमं च महाधनम् ॥ (२६।२)

स कोटिशतसंख्येन धनेन महता तदा । (२७।१)

अभ्यवर्षद् अमेयात्मा धनवर्षेण पाण्डवम् ॥ (२७।२)

इन्द्रप्रस्थम् अथागम्य भीमो भीमपराक्रमः । (२८।१)

निवेदयामास तदा धर्मराजाय तद् धनम् ॥ (२८।२)