नारद उवाच । (१।१)

एवम् उक्तः सुपर्णेन तथ्यं वचनम् उत्तमम् । (१।२)

विमृश्यावहितो राजा निश्चित्य च पुनः पुनः ॥ (१।३)

यष्टा क्रतुसहस्राणां दाता दानपतिः प्रभुः । (२।१)

ययातिर् वत्सकाशीश इदं वचनम् अब्रवीत् ॥ (२।२)

दृष्ट्वा प्रियसखं तार्क्ष्यं गालवं च द्विजर्षभम् । (३।१)

निदर्शनं च तपसो भिक्षां श्लाघ्यां च कीर्तिताम् ॥ (३।२)

अतीत्य च नृपान् अन्यान् आदित्यकुलसंभवान् । (४।१)

मत्सकाशम् अनुप्राप्तावेतौ बुद्धिम् अवेक्ष्य च ॥ (४।२)

अद्य मे सफलं जन्म तारितं चाद्य मे कुलम् । (५।१)

अद्यायं तारितो देशो मम तार्क्ष्य त्वयानघ ॥ (५।२)

वक्तुम् इच्छामि तु सखे यथा जानासि मां पुरा । (६।१)

न तथा वित्तवान् अस्मि क्षीणं वित्तं हि मे सखे ॥ (६।२)

न च शक्तो ऽस्मि ते कर्तुं मोघम् आगमनं खग । (७।१)

न चाशाम् अस्य विप्रर्षेर् वितथां कर्तुम् उत्सहे ॥ (७।२)

तत् तु दास्यामि यत् कार्यम् इदं संपादयिष्यति । (८।१)

अभिगम्य हताशो हि निवृत्तो दहते कुलम् ॥ (८।२)

नातः परं वैनतेय किंचित् पापिष्ठम् उच्यते । (९।१)

यथाशानाशनं लोके देहि नास्तीति वा वचः ॥ (९।२)

हताशो ह्यकृतार्थः सन् हतः संभावितो नरः । (१०।१)

हिनस्ति तस्य पुत्रांश्च पौत्रांश्चाकुर्वतो ऽर्थिनाम् ॥ (१०।२)

तस्माच्चतुर्णां वंशानां स्थापयित्री सुता मम । (११।१)

इयं सुरसुतप्रख्या सर्वधर्मोपचायिनी ॥ (११।२)

सदा देवमनुष्याणाम् असुराणां च गालव । (१२।१)

काङ्क्षिता रूपतो बाला सुता मे प्रतिगृह्यताम् ॥ (१२।२)

अस्याः शुल्कं प्रदास्यन्ति नृपा राज्यम् अपि ध्रुवम् । (१३।१)

किं पुनः श्यामकर्णानां हयानां द्वे चतुःशते ॥ (१३।२)

स भवान् प्रतिगृह्णातु ममेमां माधवीं सुताम् । (१४।१)

अहं दौहित्रवान् स्यां वै वर एष मम प्रभो ॥ (१४।२)

प्रतिगृह्य च तां कन्यां गालवः सह पक्षिणा । (१५।१)

पुनर् द्रक्ष्याव इत्युक्त्वा प्रतस्थे सह कन्यया ॥ (१५।२)

उपलब्धम् इदं द्वारम् अश्वानाम् इति चाण्डजः । (१६।१)

उक्त्वा गालवम् आपृच्छ्य जगाम भवनं स्वकम् ॥ (१६।२)

गते पतगराजे तु गालवः सह कन्यया । (१७।१)

चिन्तयानः क्षमं दाने राज्ञां वै शुल्कतो ऽगमत् ॥ (१७।२)

सो ऽगच्छन्मनसेक्ष्वाकुं हर्यश्वं राजसत्तमम् । (१८।१)

अयोध्यायां महावीर्यं चतुरङ्गबलान्वितम् ॥ (१८।२)

कोशधान्यबलोपेतं प्रियपौरं द्विजप्रियम् । (१९।१)

प्रजाभिकामं शाम्यन्तं कुर्वाणं तप उत्तमम् ॥ (१९।२)

तम् उपागम्य विप्रः स हर्यश्वं गालवो ऽब्रवीत् । (२०।१)

कन्येयं मम राजेन्द्र प्रसवैः कुलवर्धिनी ॥ (२०।२)

इयं शुल्केन भार्यार्थे हर्यश्व प्रतिगृह्यताम् । (२१।१)

शुल्कं ते कीर्तयिष्यामि तच्छ्रुत्वा सम्प्रधार्यताम् ॥ (२१।२)