संजय उवाच । (१।१)

समरे ऽत्युग्रकर्माणः कर्मभिर् व्यञ्जितश्रमाः । (१।२)

सकृष्णाः पाण्डवाः पञ्च देवैर् अपि दुरासदाः ॥ (१।३)

सत्त्वकर्मान्वयैर् बुद्ध्या प्रकृत्या यशसा श्रिया । (२।१)

नैव भूतो न भविता कृष्णतुल्यगुणः पुमान् ॥ (२।२)

सत्यधर्मपरो दाता विप्रपूजादिभिर् गुणैः । (३।१)

सदैव त्रिदिवं प्राप्तो राजा किल युधिष्ठिरः ॥ (३।२)

युगान्ते चान्तको राजञ् जामदग्न्यश्च वीर्यवान् । (४।१)

रणस्थो भीमसेनश्च कथ्यन्ते सदृशास्त्रयः ॥ (४।२)

प्रतिज्ञाकर्मदक्षस्य रणे गाण्डीवधन्वनः । (५।१)

उपमां नाधिगच्छामि पार्थस्य सदृशीं क्षितौ ॥ (५।२)

गुरुवात्सल्यम् अत्यन्तं नैभृत्यं विनयो दमः । (६।१)

नकुले ऽप्रातिरूप्यं च शौर्यं च नियतानि षट् ॥ (६।२)

श्रुतगाम्भीर्यमाधुर्यसत्त्ववीर्यपराक्रमैः । (७।१)

सदृशो देवयोर् वीरः सहदेवः किलाश्विनोः ॥ (७।२)

ये च कृष्णे गुणाः स्फीताः पाण्डवेषु च ये गुणाः । (८।१)

अभिमन्यौ किलैकस्था दृश्यन्ते गुणसंचयाः ॥ (८।२)

युधिष्ठिरस्य धैर्येण कृष्णस्य चरितेन च । (९।१)

कर्मभिर् भीमसेनस्य सदृशो भीमकर्मणः ॥ (९।२)

धनंजयस्य रूपेण विक्रमेण श्रुतेन च । (१०।१)

विनयात् सहदेवस्य सदृशो नकुलस्य च ॥ (१०।२)

धृतराष्ट्र उवाच । (११।१)

अभिमन्युम् अहं सूत सौभद्रम् अपराजितम् । (११।२)

श्रोतुम् इच्छामि कार्त्स्न्येन कथम् आयोधने हतः ॥ (११।३)

संजय उवाच । (१२।१)

चक्रव्यूहो महाराज आचार्येणाभिकल्पितः । (१२।२)

तत्र शक्रोपमाः सर्वे राजानो विनिवेशिताः ॥ (१२।३)

संघातो राजपुत्राणां सर्वेषाम् अभवत् तदा । (१३।१)

कृताभिसमयाः सर्वे सुवर्णविकृतध्वजाः ॥ (१३।२)

रक्ताम्बरधराः सर्वे सर्वे रक्तविभूषणाः । (१४।१)

सर्वे रक्तपताकाश्च सर्वे वै हेममालिनः ॥ (१४।२)

तेषां दशसहस्राणि बभूवुर् दृढधन्विनाम् । (१५।१)

पौत्रं तव पुरस्कृत्य लक्ष्मणं प्रियदर्शनम् ॥ (१५।२)

अन्योन्यसमदुःखास्ते अन्योन्यसमसाहसाः । (१६।१)

अन्योन्यं स्पर्धमानाश्च अन्योन्यस्य हिते रताः ॥ (१६।२)

कर्णदुःशासनकृपैर् वृतो राजा महारथैः । (१७।१)

देवराजोपमः श्रीमाञ् श्वेतच्छत्राभिसंवृतः । (१७।२)

चामरव्यजनाक्षेपैर् उदयन्न् इव भास्करः ॥ (१७।३)

प्रमुखे तस्य सैन्यस्य द्रोणो ऽवस्थितनायके । (१८।१)

सिन्धुराजस्तथातिष्ठच्छ्रीमान्मेरुर् इवाचलः ॥ (१८।२)

सिन्धुराजस्य पार्श्वस्था अश्वत्थामपुरोगमाः । (१९।१)

सुतास्तव महाराज त्रिंशत् त्रिदशसंनिभाः ॥ (१९।२)

गान्धारराजः कितवः शल्यो भूरिश्रवास्तथा । (२०।१)

पार्श्वतः सिन्धुराजस्य व्यराजन्त महारथाः ॥ (२०।२)