युधिष्ठिर उवाच । (१।१)

के पूज्याः के नमस्कार्या मानवैर् भरतर्षभ । (१।२)

विस्तरेण तद् आचक्ष्व न हि तृप्यामि कथ्यताम् ॥ (१।३)

भीष्म उवाच । (२।१)

अत्राप्युदाहरन्तीमम् इतिहासं पुरातनम् । (२।२)

नारदस्य च संवादं वासुदेवस्य चोभयोः ॥ (२।३)

नारदं प्राञ्जलिं दृष्ट्वा पूजयानं द्विजर्षभान् । (३।१)

केशवः परिपप्रच्छ भगवन् कान्नमस्यसि ॥ (३।२)

बहुमानः परः केषु भवतो यान्नमस्यसि । (४।१)

शक्यं चेच्छ्रोतुम् इच्छामि ब्रूह्येतद् धर्मवित्तम ॥ (४।२)

नारद उवाच । (५।१)

शृणु गोविन्द यान् एतान् पूजयाम्यरिमर्दन । (५।२)

त्वत्तो ऽन्यः कः पुमांल् लोके श्रोतुम् एतद् इहार्हति ॥ (५।३)

वरुणं वायुम् आदित्यं पर्जन्यं जातवेदसम् । (६।१)

स्थाणुं स्कन्दं तथा लक्ष्मीं विष्णुं ब्रह्माणम् एव च ॥ (६।२)

वाचस्पतिं चन्द्रमसम् अपः पृथ्वीं सरस्वतीम् । (७।१)

सततं ये नमस्यन्ति तान्नमस्याम्यहं विभो ॥ (७।२)

तपोधनान् वेदविदो नित्यं वेदपरायणान् । (८।१)

महार्हान् वृष्णिशार्दूल सदा सम्पूजयाम्यहम् ॥ (८।२)

अभुक्त्वा देवकार्याणि कुर्वते ये ऽविकत्थनाः । (९।१)

संतुष्टाश्च क्षमायुक्तास्तान्नमस्याम्यहं विभो ॥ (९।२)

सम्यग् ददति ये चेष्टान् क्षान्ता दान्ता जितेन्द्रियाः । (१०।१)

सस्यं धनं क्षितिं गाश्च तान्नमस्यामि यादव ॥ (१०।२)

ये ते तपसि वर्तन्ते वने मूलफलाशनाः । (११।१)

असंचयाः क्रियावन्तस्तान्नमस्यामि यादव ॥ (११।२)

ये भृत्यभरणे सक्ताः सततं चातिथिप्रियाः । (१२।१)

भुञ्जन्ते देवशेषाणि तान्नमस्यामि यादव ॥ (१२।२)

ये वेदं प्राप्य दुर्धर्षा वाग्मिनो ब्रह्मवादिनः । (१३।१)

याजनाध्यापने युक्ता नित्यं तान् पूजयाम्यहम् ॥ (१३।२)

प्रसन्नहृदयाश्चैव सर्वसत्त्वेषु नित्यशः । (१४।१)

आ पृष्ठतापात् स्वाध्याये युक्तास्तान् पूजयाम्यहम् ॥ (१४।२)

गुरुप्रसादे स्वाध्याये यतन्ते ये स्थिरव्रताः । (१५।१)

शुश्रूषवो ऽनसूयन्तस्तान्नमस्यामि यादव ॥ (१५।२)

सुव्रता मुनयो ये च ब्रह्मण्याः सत्यसंगराः । (१६।१)

वोढारो हव्यकव्यानां तान्नमस्यामि यादव ॥ (१६।२)

भैक्ष्यचर्यासु निरताः कृशा गुरुकुलाश्रयाः । (१७।१)

निःसुखा निर्धना ये च तान्नमस्यामि यादव ॥ (१७।२)

निर्ममा निष्प्रतिद्वंद्वा निर्ह्रीका निष्प्रयोजनाः । (१८।१)

अहिंसानिरता ये च ये च सत्यव्रता नराः । (१८।२)

दान्ताः शमपराश्चैव तान्नमस्यामि केशव ॥ (१८।३)

देवतातिथिपूजायां प्रसक्ता गृहमेधिनः । (१९।१)

कपोतवृत्तयो नित्यं तान्नमस्यामि यादव ॥ (१९।२)

येषां त्रिवर्गः कृत्येषु वर्तते नोपहीयते । (२०।१)

शिष्टाचारप्रवृत्ताश्च तान्नमस्याम्यहं सदा ॥ (२०।२)

ब्राह्मणास्त्रिषु लोकेषु ये त्रिवर्गम् अनुष्ठिताः । (२१।१)

अलोलुपाः पुण्यशीलास्तान्नमस्यामि केशव ॥ (२१।२)

अब्भक्षा वायुभक्षाश्च सुधाभक्षाश्च ये सदा । (२२।१)

व्रतैश्च विविधैर् युक्तास्तान्नमस्यामि माधव ॥ (२२।२)

अयोनीन् अग्नियोनींश्च ब्रह्मयोनींस्तथैव च । (२३।१)

सर्वभूतात्मयोनींश् च तान्नमस्याम्यहं द्विजान् ॥ (२३।२)

नित्यम् एतान्नमस्यामि कृष्ण लोककरान् ऋषीन् । (२४।१)

लोकज्येष्ठाञ् ज्ञाननिष्ठांस्तमोघ्नांल् लोकभास्करान् ॥ (२४।२)

तस्मात् त्वम् अपि वार्ष्णेय द्विजान् पूजय नित्यदा । (२५।१)

पूजिताः पूजनार्हा हि सुखं दास्यन्ति ते ऽनघ ॥ (२५।२)

अस्मिंल् लोके सदा ह्येते परत्र च सुखप्रदाः । (२६।१)

त एते मान्यमाना वै प्रदास्यन्ति सुखं तव ॥ (२६।२)

ये सर्वातिथयो नित्यं गोषु च ब्राह्मणेषु च । (२७।१)

नित्यं सत्ये च निरता दुर्गाण्यतितरन्ति ते ॥ (२७।२)

नित्यं शमपरा ये च तथा ये चानसूयकाः । (२८।१)

नित्यं स्वाध्यायिनो ये च दुर्गाण्यतितरन्ति ते ॥ (२८।२)

सर्वान् देवान्नमस्यन्ति ये चैकं देवम् आश्रिताः । (२९।१)

श्रद्दधानाश्च दान्ताश्च दुर्गाण्यतितरन्ति ते ॥ (२९।२)

तथैव विप्रप्रवरान्नमस्कृत्य यतव्रतान् । (३०।१)

भवन्ति ये दानरता दुर्गाण्यतितरन्ति ते ॥ (३०।२)

अग्नीन् आधाय विधिवत् प्रयता धारयन्ति ये । (३१।१)

प्राप्ताः सोमाहुतिं चैव दुर्गाण्यतितरन्ति ते ॥ (३१।२)

मातापित्रोर् गुरुषु च सम्यग् वर्तन्ति ये सदा । (३२।१)

यथा त्वं वृष्णिशार्दूलेत्युक्त्वैवं विरराम सः ॥ (३२।२)

तस्मात् त्वम् अपि कौन्तेय पितृदेवद्विजातिथीन् । (३३।१)

सम्यक् पूजय येन त्वं गतिम् इष्टाम् अवाप्स्यसि ॥ (३३।२)