उत्तङ्क उवाच । (१।१)

ब्रूहि केशव तत्त्वेन त्वम् अध्यात्मम् अनिन्दितम् । (१।२)

श्रुत्वा श्रेयो ऽभिधास्यामि शापं वा ते जनार्दन ॥ (१।३)

वासुदेव उवाच । (२।१)

तमो रजश्च सत्त्वं च विद्धि भावान्मदाश्रयान् । (२।२)

तथा रुद्रान् वसूंश्चापि विद्धि मत्प्रभवान् द्विज ॥ (२।३)

मयि सर्वाणि भूतानि सर्वभूतेषु चाप्यहम् । (३।१)

स्थित इत्यभिजानीहि मा ते ऽभूद् अत्र संशयः ॥ (३।२)

तथा दैत्यगणान् सर्वान् यक्षराक्षसपन्नगान् । (४।१)

गन्धर्वाप्सरसश्चैव विद्धि मत्प्रभवान् द्विज ॥ (४।२)

सद् असच्चैव यत् प्राहुर् अव्यक्तं व्यक्तम् एव च । (५।१)

अक्षरं च क्षरं चैव सर्वम् एतन्मदात्मकम् ॥ (५।२)

ये चाश्रमेषु वै धर्माश्चतुर्षु विहिता मुने । (६।१)

दैवानि चैव कर्माणि विद्धि सर्वं मदात्मकम् ॥ (६।२)

असच्च सदसच्चैव यद् विश्वं सदसतः परम् । (७।१)

ततः परं नास्ति चैव देवदेवात् सनातनात् ॥ (७।२)

ॐकारप्रभवान् वेदान् विद्धि मां त्वं भृगूद्वह । (८।१)

यूपं सोमं तथैवेह त्रिदशाप्यायनं मखे ॥ (८।२)

होतारम् अपि हव्यं च विद्धि मां भृगुनन्दन । (९।१)

अध्वर्युः कल्पकश्चापि हविः परमसंस्कृतम् ॥ (९।२)

उद्गाता चापि मां स्तौति गीतघोषैर् महाध्वरे । (१०।१)

प्रायश्चित्तेषु मां ब्रह्मञ् शान्तिमङ्गलवाचकाः । (१०।२)

स्तुवन्ति विश्वकर्माणं सततं द्विजसत्तमाः ॥ (१०।३)

विद्धि मह्यं सुतं धर्मम् अग्रजं द्विजसत्तम । (११।१)

मानसं दयितं विप्र सर्वभूतदयात्मकम् ॥ (११।२)

तत्राहं वर्तमानैश्च निवृत्तैश्चैव मानवैः । (१२।१)

बह्वीः संसरमाणो वै योनीर् हि द्विजसत्तम ॥ (१२।२)

धर्मसंरक्षणार्थाय धर्मसंस्थापनाय च । (१३।१)

तैस्तैर् वेषैश्च रूपैश्च त्रिषु लोकेषु भार्गव ॥ (१३।२)

अहं विष्णुर् अहं ब्रह्मा शक्रो ऽथ प्रभवाप्ययः । (१४।१)

भूतग्रामस्य सर्वस्य स्रष्टा संहार एव च ॥ (१४।२)

अधर्मे वर्तमानानां सर्वेषाम् अहम् अप्युत । (१५।१)

धर्मस्य सेतुं बध्नामि चलिते चलिते युगे । (१५।२)

तास्ता योनीः प्रविश्याहं प्रजानां हितकाम्यया ॥ (१५।३)

यदा त्वहं देवयोनौ वर्तामि भृगुनन्दन । (१६।१)

तदाहं देववत् सर्वम् आचरामि न संशयः ॥ (१६।२)

यदा गन्धर्वयोनौ तु वर्तामि भृगुनन्दन । (१७।१)

तदा गन्धर्ववच्चेष्टाः सर्वाश्चेष्टामि भार्गव ॥ (१७।२)

नागयोनौ यदा चैव तदा वर्तामि नागवत् । (१८।१)

यक्षराक्षसयोनीश्च यथावद् विचराम्यहम् ॥ (१८।२)

मानुष्ये वर्तमाने तु कृपणं याचिता मया । (१९।१)

न च ते जातसंमोहा वचो गृह्णन्ति मे हितम् ॥ (१९।२)

भयं च महद् उद्दिश्य त्रासिताः कुरवो मया । (२०।१)

क्रुद्धेव भूत्वा च पुनर् यथावद् अनुदर्शिताः ॥ (२०।२)

ते ऽधर्मेणेह संयुक्ताः परीताः कालधर्मणा । (२१।१)

धर्मेण निहता युद्धे गताः स्वर्गं न संशयः ॥ (२१।२)

लोकेषु पाण्डवाश्चैव गताः ख्यातिं द्विजोत्तम । (२२।१)

एतत् ते सर्वम् आख्यातं यन्मां त्वं परिपृच्छसि ॥ (२२।२)