कर्ण उवाच । (१।१)

राधेयो ऽहम् आधिरथिः कर्णस्त्वाम् अभिवादये । (१।२)

प्राप्ता किमर्थं भवती ब्रूहि किं करवाणि ते ॥ (१।३)

कुन्त्युवाच । (२।१)

कौन्तेयस्त्वं न राधेयो न तवाधिरथः पिता । (२।२)

नासि सूतकुले जातः कर्ण तद् विद्धि मे वचः ॥ (२।३)

कानीनस्त्वं मया जातः पूर्वजः कुक्षिणा धृतः । (३।१)

कुन्तिभोजस्य भवने पार्थस्त्वम् असि पुत्रक ॥ (३।२)

प्रकाशकर्मा तपनो यो ऽयं देवो विरोचनः । (४।१)

अजीजनत् त्वां मय्येष कर्ण शस्त्रभृतां वरम् ॥ (४।२)

कुण्डली बद्धकवचो देवगर्भः श्रिया वृतः । (५।१)

जातस्त्वम् असि दुर्धर्ष मया पुत्र पितुर् गृहे ॥ (५।२)

स त्वं भ्रातॄन् असंबुद्ध्वा मोहाद् यद् उपसेवसे । (६।१)

धार्तराष्ट्रान्न तद् युक्तं त्वयि पुत्र विशेषतः ॥ (६।२)

एतद् धर्मफलं पुत्र नराणां धर्मनिश्चये । (७।१)

यत् तुष्यन्त्यस्य पितरो माता चाप्येकदर्शिनी ॥ (७।२)

अर्जुनेनार्जितां पूर्वं हृतां लोभाद् असाधुभिः । (८।१)

आच्छिद्य धार्तराष्ट्रेभ्यो भुङ्क्ष्व यौधिष्ठिरीं श्रियम् ॥ (८।२)

अद्य पश्यन्तु कुरवः कर्णार्जुनसमागमम् । (९।१)

सौभ्रात्रेण तद् आलक्ष्य संनमन्ताम् असाधवः ॥ (९।२)

कर्णार्जुनौ वै भवतां यथा रामजनार्दनौ । (१०।१)

असाध्यं किं नु लोके स्याद् युवयोः सहितात्मनोः ॥ (१०।२)

कर्ण शोभिष्यसे नूनं पञ्चभिर् भ्रातृभिर् वृतः । (११।१)

वेदैः परिवृतो ब्रह्मा यथा वेदाङ्गपञ्चमैः ॥ (११।२)

उपपन्नो गुणैः श्रेष्ठो ज्येष्ठः श्रेष्ठेषु बन्धुषु । (१२।१)

सूतपुत्रेति मा शब्दः पार्थस्त्वम् असि वीर्यवान् ॥ (१२।२)