वैशम्पायन उवाच । (१।१)

तस्मिन् दशार्हाधिपतौ प्रयाते युधिष्ठिरो भीमसेनार्जुनौ च । (१।२)

यमौ च कृष्णा च पुरोहितश् च रथान् महार्हान् परमाश्वयुक्तान् ॥ (१।३)

आस्थाय वीराः सहिता वनाय प्रतस्थिरे भूतपतिप्रकाशाः । (२।१)

हिरण्यनिष्कान् वसनानि गाश् च प्रदाय शिक्षाक्षरमन्त्रविद्भ्यः ॥ (२।२)

प्रेष्याः पुरो विंशतिर् आत्तशस्त्रा धनूंषि वर्माणि शरांश् च पीतान् । (३।१)

मौर्वीश् च यन्त्राणि च सायकांश् च सर्वे समादाय जघन्यम् ईयुः ॥ (३।२)

ततस् तु वासांसि च राजपुत्र्या धात्र्यश् च दास्यश् च विभूषणं च । (४।१)

तद् इन्द्रसेनस् त्वरितं प्रगृह्य जघन्यम् एवोपययौ रथेन ॥ (४।२)

ततः कुरुश्रेष्ठम् उपेत्य पौराः प्रदक्षिणं चक्रुर् अदीनसत्त्वाः । (५।१)

तं ब्राह्मणाश् चाभ्यवदन् प्रसन्ना मुख्याश् च सर्वे कुरुजाङ्गलानाम् ॥ (५।२)

स चापि तान् अभ्यवदत् प्रसन्नः सहैव तैर् भ्रातृभिर् धर्मराजः । (६।१)

तस्थौ च तत्राधिपतिर् महात्मा दृष्ट्वा जनौघं कुरुजाङ्गलानाम् ॥ (६।२)

पितेव पुत्रेषु स तेषु भावं चक्रे कुरूणाम् ऋषभो महात्मा । (७।१)

ते चापि तस्मिन् भरतप्रबर्हे तदा बभूवुः पितरीव पुत्राः ॥ (७।२)

ततः समासाद्य महाजनौघाः कुरुप्रवीरं परिवार्य तस्थुः । (८।१)

हा नाथ हा धर्म इति ब्रुवन्तो ह्रिया च सर्वे ऽश्रुमुखा बभूवुः ॥ (८।२)

वरः कुरूणाम् अधिपः प्रजानां पितेव पुत्रान् अपहाय चास्मान् । (९।१)

पौरान् इमाञ्जानपदांश् च सर्वान् हित्वा प्रयातः क्व नु धर्मराजः ॥ (९।२)

धिग् धार्तराष्ट्रं सुनृशंसबुद्धिं ससौबलं पापमतिं च कर्णम् । (१०।१)

अनर्थम् इच्छन्ति नरेन्द्र पापा ये धर्मनित्यस्य सतस् तवोग्राः ॥ (१०।२)

स्वयं निवेश्याप्रतिमं महात्मा पुरं महद् देवपुरप्रकाशम् । (११।१)

शतक्रतुप्रस्थम् अमोघकर्मा हित्वा प्रयातः क्व नु धर्मराजः ॥ (११।२)

चकार याम् अप्रतिमां महात्मा सभां मयो देवसभाप्रकाशाम् । (१२।१)

तां देवगुप्ताम् इव देवमायां हित्वा प्रयातः क्व नु धर्मराजः ॥ (१२।२)

तान् धर्मकामार्थविद् उत्तमौजा बीभत्सुर् उच्चैः सहितान् उवाच । (१३।१)

आदास्यते वासम् इमं निरुष्य वनेषु राजा द्विषतां यशांसि ॥ (१३।२)

द्विजातिमुख्याः सहिताः पृथक् च भवद्भिर् आसाद्य तपस्विनश् च । (१४।१)

प्रसाद्य धर्मार्थविदश् च वाच्या यथार्थसिद्धिः परमा भवेन्नः ॥ (१४।२)

इत्य् एवम् उक्ते वचने ऽर्जुनेन ते ब्राह्मणाः सर्ववर्णाश् च राजन् । (१५।१)

मुदाभ्यनन्दन् सहिताश् च चक्रुः प्रदक्षिणं धर्मभृतां वरिष्ठम् ॥ (१५।२)

आमन्त्र्य पार्थं च वृकोदरं च धनंजयं याज्ञसेनीं यमौ च । (१६।१)

प्रतस्थिरे राष्ट्रम् अपेतहर्षा युधिष्ठिरेणानुमता यथास्वम् ॥ (१६।२)