संजय उवाच । (१।१)

प्रभातायां तु शर्वर्यां भीष्मः शांतनवस्ततः । (१।२)

अनीकान्यनुसंयाने व्यादिदेशाथ भारत ॥ (१।३)

गारुडं च महाव्यूहं चक्रे शांतनवस्तदा । (२।१)

पुत्राणां ते जयाकाङ्क्षी भीष्मः कुरुपितामहः ॥ (२।२)

गरुडस्य स्वयं तुण्डे पिता देवव्रतस्तव । (३।१)

चक्षुषी च भरद्वाजः कृतवर्मा च सात्वतः ॥ (३।२)

अश्वत्थामा कृपश्चैव शीर्षम् आस्तां यशस्विनौ । (४।१)

त्रिगर्तैर् मत्स्यकैकेयैर् वाटधानैश्च संयुतौ ॥ (४।२)

भूरिश्रवाः शलः शल्यो भगदत्तश्च मारिष । (५।१)

मद्रकाः सिन्धुसौवीरास्तथा पञ्चनदाश्च ये ॥ (५।२)

जयद्रथेन सहिता ग्रीवायां संनिवेशिताः । (६।१)

पृष्ठे दुर्योधनो राजा सोदरैः सानुगैर् वृतः ॥ (६।२)

विन्दानुविन्दावावन्त्यौ काम्बोजश्च शकैः सह । (७।१)

पुच्छम् आसन्महाराज शूरसेनाश्च सर्वशः ॥ (७।२)

मागधाश्च कलिङ्गाश्च दाशेरकगणैः सह । (८।१)

दक्षिणं पक्षम् आसाद्य स्थिता व्यूहस्य दंशिताः ॥ (८।२)

काननाश्च विकुञ्जाश्च मुक्ताः पुण्ड्राविषस् तथा । (९।१)

बृहद्बलेन सहिता वामं पक्षम् उपाश्रिताः ॥ (९।२)

व्यूढं दृष्ट्वा तु तत् सैन्यं सव्यसाची परंतपः । (१०।१)

धृष्टद्युम्नेन सहितः प्रत्यव्यूहत संयुगे । (१०।२)

अर्धचन्द्रेण व्यूहेन व्यूहं तम् अतिदारुणम् ॥ (१०।३)

दक्षिणं शृङ्गम् आस्थाय भीमसेनो व्यरोचत । (११।१)

नानाशस्त्रौघसम्पन्नैर् नानादेश्यैर् नृपैर् वृतः ॥ (११।२)

तद् अन्वेव विराटश्च द्रुपदश्च महारथः । (१२।१)

तदनन्तरम् एवासीन्नीलो नीलायुधैः सह ॥ (१२।२)

नीलाद् अनन्तरं चैव धृष्टकेतुर् महारथः । (१३।१)

चेदिकाशिकरूषैश्च पौरवैश्चाभिसंवृतः ॥ (१३।२)

धृष्टद्युम्नः शिखण्डी च पाञ्चालाश्च प्रभद्रकाः । (१४।१)

मध्ये सैन्यस्य महतः स्थिता युद्धाय भारत ॥ (१४।२)

तथैव धर्मराजो ऽपि गजानीकेन संवृतः । (१५।१)

ततस्तु सात्यकी राजन् द्रौपद्याः पञ्च चात्मजाः ॥ (१५।२)

अभिमन्युस्ततस्तूर्णम् इरावांश्च ततः परम् । (१६।१)

भैमसेनिस्ततो राजन् केकयाश्च महारथाः ॥ (१६।२)

ततो ऽभूद् द्विपदां श्रेष्ठो वामं पार्श्वम् उपाश्रितः । (१७।१)

सर्वस्य जगतो गोप्ता गोप्ता यस्य जनार्दनः ॥ (१७।२)

एवम् एतन्महाव्यूहं प्रत्यव्यूहन्त पाण्डवाः । (१८।१)

वधार्थं तव पुत्राणां तत्पक्षं ये च संगताः ॥ (१८।२)

ततः प्रववृते युद्धं व्यतिषक्तरथद्विपम् । (१९।१)

तावकानां परेषां च निघ्नताम् इतरेतरम् ॥ (१९।२)

हयौघाश्च रथौघाश्च तत्र तत्र विशां पते । (२०।१)

संपतन्तः स्म दृश्यन्ते निघ्नमानाः परस्परम् ॥ (२०।२)

धावतां च रथौघानां निघ्नतां च पृथक् पृथक् । (२१।१)

बभूव तुमुलः शब्दो विमिश्रो दुन्दुभिस्वनैः ॥ (२१।२)

दिवस्पृङ् नरवीराणां निघ्नताम् इतरेतरम् । (२२।१)

संप्रहारे सुतुमुले तव तेषां च भारत ॥ (२२।२)