नारद उवाच । (१।१)

अयं लोकः सुपर्णानां पक्षिणां पन्नगाशिनाम् । (१।२)

विक्रमे गमने भारे नैषाम् अस्ति परिश्रमः ॥ (१।३)

वैनतेयसुतैः सूत षड्भिस्ततम् इदं कुलम् । (२।१)

सुमुखेन सुनाम्ना च सुनेत्रेण सुवर्चसा ॥ (२।२)

सुरूपपक्षिराजेन सुबलेन च मातले । (३।१)

वर्धितानि प्रसूत्या वै विनताकुलकर्तृभिः ॥ (३।२)

पक्षिराजाभिजात्यानां सहस्राणि शतानि च । (४।१)

कश्यपस्य ततो वंशे जातैर् भूतिविवर्धनैः ॥ (४।२)

सर्वे ह्येते श्रिया युक्ताः सर्वे श्रीवत्सलक्षणाः । (५।१)

सर्वे श्रियम् अभीप्सन्तो धारयन्ति बलान्युत ॥ (५।२)

कर्मणा क्षत्रियाश्चैते निर्घृणा भोगिभोजिनः । (६।१)

ज्ञातिसंक्षयकर्तृत्वाद् ब्राह्मण्यं न लभन्ति वै ॥ (६।२)

नामानि चैषां वक्ष्यामि यथा प्राधान्यतः शृणु । (७।१)

मातले श्लाघ्यम् एतद्धि कुलं विष्णुपरिग्रहम् ॥ (७।२)

दैवतं विष्णुर् एतेषां विष्णुर् एव परायणम् । (८।१)

हृदि चैषां सदा विष्णुर् विष्णुर् एव गतिः सदा ॥ (८।२)

सुवर्णचूडो नागाशी दारुणश्चण्डतुण्डकः । (९।१)

अनलश्चानिलश्चैव विशालाक्षो ऽथ कुण्डली ॥ (९।२)

काश्यपिर् ध्वजविष्कम्भो वैनतेयो ऽथ वामनः । (१०।१)

वातवेगो दिशाचक्षुर् निमेषो निमिषस्तथा ॥ (१०।२)

त्रिवारः सप्तवारश्च वाल्मीकिर् द्वीपकस्तथा । (११।१)

दैत्यद्वीपः सरिद्द्वीपः सारसः पद्मकेसरः ॥ (११।२)

सुमुखः सुखकेतुश्च चित्रबर्हस्तथानघः । (१२।१)

मेघकृत् कुमुदो दक्षः सर्पान्तः सोमभोजनः ॥ (१२।२)

गुरुभारः कपोतश्च सूर्यनेत्रश्चिरान्तकः । (१३।१)

विष्णुधन्वा कुमारश्च परिबर्हो हरिस्तथा ॥ (१३।२)

सुस्वरो मधुपर्कश्च हेमवर्णस्तथैव च । (१४।१)

मलयो मातरिश्वा च निशाकरदिवाकरौ ॥ (१४।२)

एते प्रदेशमात्रेण मयोक्ता गरुडात्मजाः । (१५।१)

प्राधान्यतो ऽथ यशसा कीर्तिताः प्राणतश्च ते ॥ (१५।२)

यद्यत्र न रुचिः काचिद् एहि गच्छाव मातले । (१६।१)

तं नयिष्यामि देशं त्वां रुचिं यत्रोपलप्स्यसे ॥ (१६।२)