उपमन्युर् उवाच । (१।१)

एतान् सहस्रशश्चान्यान् समनुध्यातवान् हरः । (१।२)

कस्मात् प्रसादं भगवान्न कुर्यात् तव माधव ॥ (१।३)

त्वादृशेन हि देवानां श्लाघनीयः समागमः । (२।१)

ब्रह्मण्येनानृशंसेन श्रद्दधानेन चाप्युत । (२।२)

जप्यं च ते प्रदास्यामि येन द्रक्ष्यसि शंकरम् ॥ (२।३)

कृष्ण उवाच । (३।१)

अब्रुवं तम् अहं ब्रह्मंस्त्वत्प्रसादान्महामुने । (३।२)

द्रक्ष्ये दितिजसंघानां मर्दनं त्रिदशेश्वरम् ॥ (३।३)

दिने ऽष्टमे च विप्रेण दीक्षितो ऽहं यथाविधि । (४।१)

दण्डी मुण्डी कुशी चीरी घृताक्तो मेखली तथा ॥ (४।२)

मासम् एकं फलाहारो द्वितीयं सलिलाशनः । (५।१)

तृतीयं च चतुर्थं च पञ्चमं चानिलाशनः ॥ (५।२)

एकपादेन तिष्ठंश्च ऊर्ध्वबाहुर् अतन्द्रितः । (६।१)

तेजः सूर्यसहस्रस्य अपश्यं दिवि भारत ॥ (६।२)

तस्य मध्यगतं चापि तेजसः पाण्डुनन्दन । (७।१)

इन्द्रायुधपिनद्धाङ्गं विद्युन्मालागवाक्षकम् । (७।२)

नीलशैलचयप्रख्यं बलाकाभूषितं घनम् ॥ (७।३)

तम् आस्थितश्च भगवान् देव्या सह महाद्युतिः । (८।१)

तपसा तेजसा कान्त्या दीप्तया सह भार्यया ॥ (८।२)

रराज भगवांस्तत्र देव्या सह महेश्वरः । (९।१)

सोमेन सहितः सूर्यो यथा मेघस्थितस्तथा ॥ (९।२)

संहृष्टरोमा कौन्तेय विस्मयोत्फुल्ललोचनः । (१०।१)

अपश्यं देवसंघानां गतिम् आर्तिहरं हरम् ॥ (१०।२)

किरीटिनं गदिनं शूलपाणिं व्याघ्राजिनं जटिलं दण्डपाणिम् । (११।१)

पिनाकिनं वज्रिणं तीक्ष्णदंष्ट्रं शुभाङ्गदं व्यालयज्ञोपवीतम् ॥ (११।२)

दिव्यां मालाम् उरसानेकवर्णां समुद्वहन्तं गुल्फदेशावलम्बाम् । (१२।१)

चन्द्रं यथा परिविष्टं ससंध्यं वर्षात्यये तद्वद् अपश्यम् एनम् ॥ (१२।२)

प्रमथानां गणैश्चैव समन्तात् परिवारितम् । (१३।१)

शरदीव सुदुष्प्रेक्ष्यं परिविष्टं दिवाकरम् ॥ (१३।२)

एकादश तथा चैनं रुद्राणां वृषवाहनम् । (१४।१)

अस्तुवन्नियतात्मानः कर्मभिः शुभकर्मिणम् ॥ (१४।२)

आदित्या वसवः साध्या विश्वेदेवास्तथाश्विनौ । (१५।१)

विश्वाभिः स्तुतिभिर् देवं विश्वदेवं समस्तुवन् ॥ (१५।२)

शतक्रतुश्च भगवान् विष्णुश्चादितिनन्दनौ । (१६।१)

ब्रह्मा रथन्तरं साम ईरयन्ति भवान्तिके ॥ (१६।२)

योगीश्वराः सुबहवो योगदं पितरं गुरुम् । (१७।१)

ब्रह्मर्षयश्च ससुतास्तथा देवर्षयश्च वै ॥ (१७।२)

पृथिवी चान्तरिक्षं च नक्षत्राणि ग्रहास्तथा । (१८।१)

मासार्धमासा ऋतवो रात्र्यः संवत्सराः क्षणाः ॥ (१८।२)

मुहूर्ताश्च निमेषाश्च तथैव युगपर्ययाः । (१९।१)

दिव्या राजन्नमस्यन्ति विद्याः सर्वा दिशस्तथा ॥ (१९।२)

सनत्कुमारो वेदाश्च इतिहासास्तथैव च । (२०।१)

मरीचिर् अङ्गिरा अत्रिः पुलस्त्यः पुलहः क्रतुः ॥ (२०।२)

मनवः सप्तसोमश्च अथर्वा सबृहस्पतिः । (२१।१)

भृगुर् दक्षः कश्यपश्च वसिष्ठः काश्य एव च ॥ (२१।२)

छन्दांसि दीक्षा यज्ञाश्च दक्षिणाः पावको हविः । (२२।१)

यज्ञोपगानि द्रव्याणि मूर्तिमन्ति युधिष्ठिर ॥ (२२।२)

प्रजानां पतयः सर्वे सरितः पन्नगा नगाः । (२३।१)

देवानां मातरः सर्वा देवपत्न्यः सकन्यकाः ॥ (२३।२)

सहस्राणि मुनीनां च अयुतान्यर्बुदानि च । (२४।१)

नमस्यन्ति प्रभुं शान्तं पर्वताः सागरा दिशः ॥ (२४।२)

गन्धर्वाप्सरसश्चैव गीतवादित्रकोविदाः । (२५।१)

दिव्यतानेन गायन्तः स्तुवन्ति भवम् अद्भुतम् । (२५।२)

विद्याधरा दानवाश्च गुह्यका राक्षसास्तथा ॥ (२५।३)

सर्वाणि चैव भूतानि स्थावराणि चराणि च । (२६।१)

नमस्यन्ति महाराज वाङ्मनःकर्मभिर् विभुम् । (२६।२)

पुरस्ताद् विष्ठितः शर्वो ममासीत् त्रिदशेश्वरः ॥ (२६।३)

पुरस्ताद् विष्ठितं दृष्ट्वा ममेशानं च भारत । (२७।१)

सप्रजापतिशक्रान्तं जगन्माम् अभ्युदैक्षत ॥ (२७।२)

ईक्षितुं च महादेवं न मे शक्तिर् अभूत् तदा । (२८।१)

ततो माम् अब्रवीद् देवः पश्य कृष्ण वदस्व च ॥ (२८।२)

शिरसा वन्दिते देवे देवी प्रीता उमाभवत् । (२९।१)

ततो ऽहम् अस्तुवं स्थाणुं स्तुतं ब्रह्मादिभिः सुरैः ॥ (२९।२)

नमो ऽस्तु ते शाश्वत सर्वयोने ब्रह्माधिपं त्वाम् ऋषयो वदन्ति । (३०।१)

तपश्च सत्त्वं च रजस्तमश्च त्वाम् एव सत्यं च वदन्ति सन्तः ॥ (३०।२)

त्वं वै ब्रह्मा च रुद्रश्च वरुणो ऽग्निर् मनुर् भवः । (३१।१)

धाता त्वष्टा विधाता च त्वं प्रभुः सर्वतोमुखः ॥ (३१।२)

त्वत्तो जातानि भूतानि स्थावराणि चराणि च । (३२।१)

त्वम् आदिः सर्वभूतानां संहारश्च त्वम् एव हि ॥ (३२।२)

ये चेन्द्रियार्थाश्च मनश्च कृत्स्नं ये वायवः सप्त तथैव चाग्निः । (३३।१)

ये वा दिविस्था देवताश्चापि पुंसां तस्मात् परं त्वाम् ऋषयो वदन्ति ॥ (३३।२)

वेदा यज्ञाश्च सोमश्च दक्षिणा पावको हविः । (३४।१)

यज्ञोपगं च यत् किंचिद् भगवांस्तद् असंशयम् ॥ (३४।२)

इष्टं दत्तम् अधीतं च व्रतानि नियमाश्च ये । (३५।१)

ह्रीः कीर्तिः श्रीर् द्युतिस्तुष्टिः सिद्धिश्चैव त्वदर्पणा ॥ (३५।२)

कामः क्रोधो भयं लोभो मदः स्तम्भो ऽथ मत्सरः । (३६।१)

आधयो व्याधयश्चैव भगवंस्तनयास्तव ॥ (३६।२)

कृतिर् विकारः प्रलयः प्रधानं प्रभवो ऽव्ययः । (३७।१)

मनसः परमा योनिः स्वभावश्चापि शाश्वतः । (३७।२)

अव्यक्तः पावन विभो सहस्रांशो हिरण्मयः ॥ (३७।३)

आदिर् गुणानां सर्वेषां भवान् वै जीवनाश्रयः । (३८।१)

महान् आत्मा मतिर् ब्रह्मा विश्वः शंभुः स्वयंभुवः ॥ (३८।२)

बुद्धिः प्रज्ञोपलब्धिश्च संवित् ख्यातिर् धृतिः स्मृतिः । (३९।१)

पर्यायवाचकैः शब्दैर् महान् आत्मा विभाव्यसे ॥ (३९।२)

त्वां बुद्ध्वा ब्राह्मणो विद्वान्न प्रमोहं निगच्छति । (४०।१)

हृदयं सर्वभूतानां क्षेत्रज्ञस्त्वम् ऋषिष्टुतः ॥ (४०।२)

सर्वतःपाणिपादस्त्वं सर्वतोक्षिशिरोमुखः । (४१।१)

सर्वतःश्रुतिमांल् लोके सर्वम् आवृत्य तिष्ठसि ॥ (४१।२)

फलं त्वम् असि तिग्मांशो निमेषादिषु कर्मसु । (४२।१)

त्वं वै प्रभार्चिः पुरुषः सर्वस्य हृदि संस्थितः । (४२।२)

अणिमा लघिमा प्राप्तिर् ईशानो ज्योतिर् अव्ययः ॥ (४२।३)

त्वयि बुद्धिर् मतिर् लोकाः प्रपन्नाः संश्रिताश्च ये । (४३।१)

ध्यानिनो नित्ययोगाश्च सत्यसंधा जितेन्द्रियाः ॥ (४३।२)

यस्त्वां ध्रुवं वेदयते गुहाशयं प्रभुं पुराणं पुरुषं विश्वरूपम् । (४४।१)

हिरण्मयं बुद्धिमतां परां गतिं स बुद्धिमान् बुद्धिम् अतीत्य तिष्ठति ॥ (४४।२)

विदित्वा सप्त सूक्ष्माणि षडङ्गं त्वां च मूर्तितः । (४५।१)

प्रधानविधियोगस्थस्त्वाम् एव विशते बुधः ॥ (४५।२)

एवम् उक्ते मया पार्थ भवे चार्तिविनाशने । (४६।१)

चराचरं जगत् सर्वं सिंहनादम् अथाकरोत् ॥ (४६।२)

सविप्रसंघाश्च सुरासुराश्च नागाः पिशाचाः पितरो वयांसि । (४७।१)

रक्षोगणा भूतगणाश्च सर्वे महर्षयश्चैव तथा प्रणेमुः ॥ (४७।२)

मम मूर्ध्नि च दिव्यानां कुसुमानां सुगन्धिनाम् । (४८।१)

राशयो निपतन्ति स्म वायुश्च सुसुखो ववौ ॥ (४८।२)

निरीक्ष्य भगवान् देवीम् उमां मां च जगद्धितः । (४९।१)

शतक्रतुं चाभिवीक्ष्य स्वयं माम् आह शंकरः ॥ (४९।२)

विद्मः कृष्ण परां भक्तिम् अस्मासु तव शत्रुहन् । (५०।१)

क्रियताम् आत्मनः श्रेयः प्रीतिर् हि परमा त्वयि ॥ (५०।२)

वृणीष्वाष्टौ वरान् कृष्ण दातास्मि तव सत्तम । (५१।१)

ब्रूहि यादवशार्दूल यान् इच्छसि सुदुर्लभान् ॥ (५१।२)