दुर्योधन उवाच । (१।१)

यन्मया पाण्डवानां तु दृष्टं तच्छृणु भारत । (१।२)

आहृतं भूमिपालैर् हि वसु मुख्यं ततस्ततः ॥ (१।३)

न विन्दे दृढम् आत्मानं दृष्ट्वाहं तद् अरेर् धनम् । (२।१)

फलतो भूमितो वापि प्रतिपद्यस्व भारत ॥ (२।२)

ऐडांश्चैलान् वार्षदंशाञ् जातरूपपरिष्कृतान् । (३।१)

प्रावाराजिनमुख्यांश्च काम्बोजः प्रददौ वसु ॥ (३।२)

अश्वांस्तित्तिरिकल्माषांस्त्रिशतं शुकनासिकान् । (४।१)

उष्ट्रवामीस्त्रिशतं च पुष्टाः पीलुशमीङ्गुदैः ॥ (४।२)

गोवासना ब्राह्मणाश्च दासमीयाश्च सर्वशः । (५।१)

प्रीत्यर्थं ते महाभागा धर्मराज्ञो महात्मनः । (५।२)

त्रिखर्वं बलिम् आदाय द्वारि तिष्ठन्ति वारिताः ॥ (५।३)

कमण्डलून् उपादाय जातरूपमयाञ्शुभान् । (६।१)

एवं बलिं प्रदायाथ प्रवेशं लेभिरे ततः ॥ (६।२)

शतं दासीसहस्राणां कार्पासिकनिवासिनाम् । (७।१)

श्यामास्तन्व्यो दीर्घकेश्यो हेमाभरणभूषिताः । (७।२)

शूद्रा विप्रोत्तमार्हाणि राङ्कवान्यजिनानि च ॥ (७।३)

बलिं च कृत्स्नम् आदाय भरुकच्छनिवासिनः । (८।१)

उपनिन्युर् महाराज हयान् गान्धारदेशजान् ॥ (८।२)

इन्द्रकृष्टैर् वर्तयन्ति धान्यैर् नदीमुखैश्च ये । (९।१)

समुद्रनिष्कुटे जाताः परिसिन्धु च मानवाः ॥ (९।२)

ते वैरामाः पारदाश्च वङ्गाश्च कितवैः सह । (१०।१)

विविधं बलिम् आदाय रत्नानि विविधानि च ॥ (१०।२)

अजाविकं गोहिरण्यं खरोष्ट्रं फलजं मधु । (११।१)

कम्बलान् विविधांश्चैव द्वारि तिष्ठन्ति वारिताः ॥ (११।२)

प्राग्ज्योतिषाधिपः शूरो म्लेच्छानाम् अधिपो बली । (१२।१)

यनवैः सहितो राजा भगदत्तो महारथः ॥ (१२।२)

आजानेयान् हयाञ् शीघ्रान् आदायानिलरंहसः । (१३।१)

बलिं च कृत्स्नम् आदाय द्वारि तिष्ठति वारितः ॥ (१३।२)

अश्मसारमयं भाण्डं शुद्धदन्तत्सरून् असीन् । (१४।१)

प्राग्ज्योतिषो ऽथ तद् दत्त्वा भगदत्तो ऽव्रजत् तदा ॥ (१४।२)

द्व्यक्षांस्त्र्यक्षांल् ललाटाक्षान्नानादिग्भ्यः समागतान् । (१५।१)

औष्णीषान् अनिवासांश्च बाहुकान् पुरुषादकान् ॥ (१५।२)

एकपादांश्च तत्राहम् अपश्यं द्वारि वारितान् । (१६।१)

बल्यर्थं ददतस्तस्मै हिरण्यं रजतं बहु ॥ (१६।२)

इन्द्रगोपकवर्णाभाञ् शुकवर्णान्मनोजवान् । (१७।१)

तथैवेन्द्रायुधनिभान् संध्याभ्रसदृशान् अपि ॥ (१७।२)

अनेकवर्णान् आरण्यान् गृहीत्वाश्वान्मनोजवान् । (१८।१)

जातरूपम् अनर्घ्यं च ददुस्तस्यैकपादकाः ॥ (१८।२)

चीनान् हूणाञ् शकान् ओड्रान् पर्वतान्तरवासिनः । (१९।१)

वार्ष्णेयान् हारहूणांश्च कृष्णान् हैमवतांस्तथा ॥ (१९।२)

न पारयाम्यभिगतान् विविधान् द्वारि वारितान् । (२०।१)

बल्यर्थं ददतस्तस्य नानारूपान् अनेकशः ॥ (२०।२)

कृष्णग्रीवान्महाकायान् रासभाञ् शतपातिनः । (२१।१)

आहार्षुर् दशसाहस्रान् विनीतान् दिक्षु विश्रुतान् ॥ (२१।२)

प्रमाणरागस्पर्शाढ्यं बाह्लीचीनसमुद्भवम् । (२२।१)

और्णं च राङ्कवं चैव कीटजं पट्टजं तथा ॥ (२२।२)

कुट्टीकृतं तथैवान्यत् कमलाभं सहस्रशः । (२३।१)

श्लक्ष्णं वस्त्रम् अकार्पासम् आविकं मृदु चाजिनम् ॥ (२३।२)

निशितांश्चैव दीर्घासीन् ऋष्टिशक्तिपरश्वधान् । (२४।१)

अपरान्तसमुद्भूतांस्तथैव परशूञ् शितान् ॥ (२४।२)

रसान् गन्धांश्च विविधान् रत्नानि च सहस्रशः । (२५।१)

बलिं च कृत्स्नम् आदाय द्वारि तिष्ठन्ति वारिताः ॥ (२५।२)

शकास्तुखाराः कङ्काश्च रोमशाः शृङ्गिणो नराः । (२६।१)

महागमान् दूरगमान् गणितान् अर्बुदं हयान् ॥ (२६।२)

कोटिशश्चैव बहुशः सुवर्णं पद्मसंमितम् । (२७।१)

बलिम् आदाय विविधं द्वारि तिष्ठन्ति वारिताः ॥ (२७।२)

आसनानि महार्हाणि यानानि शयनानि च । (२८।१)

मणिकाञ्चनचित्राणि गजदन्तमयानि च ॥ (२८।२)

रथांश्च विविधाकाराञ् जातरूपपरिष्कृतान् । (२९।१)

हयैर् विनीतैः सम्पन्नान् वैयाघ्रपरिवारणान् ॥ (२९।२)

विचित्रांश्च परिस्तोमान् रत्नानि च सहस्रशः । (३०।१)

नाराचान् अर्धनाराचाञ् शस्त्राणि विविधानि च ॥ (३०।२)

एतद् दत्त्वा महद् द्रव्यं पूर्वदेशाधिपो नृपः । (३१।१)

प्रविष्टो यज्ञसदनं पाण्डवस्य महात्मनः ॥ (३१।२)