नारद उवाच । (१।१)

सभा वैश्रवणी राजञ् शतयोजनम् आयता । (१।२)

विस्तीर्णा सप्ततिश्चैव योजनानि सितप्रभा ॥ (१।३)

तपसा निर्मिता राजन् स्वयं वैश्रवणेन सा । (२।१)

शशिप्रभा खेचरीणां कैलासशिखरोपमा ॥ (२।२)

गुह्यकैर् उह्यमाना सा खे विषक्तेव दृश्यते । (३।१)

दिव्या हेममयैर् उच्चैः पादपैर् उपशोभिता ॥ (३।२)

रश्मिवती भास्वरा च दिव्यगन्धा मनोरमा । (४।१)

सिताभ्रशिखराकारा प्लवमानेव दृश्यते । (४।२)

दिव्या हेममयैर् अङ्गैर् विद्युद्भिर् इव चित्रिता ॥ (४।३)

तस्यां वैश्रवणो राजा विचित्राभरणाम्बरः । (५।१)

स्त्रीसहस्रावृतः श्रीमान् आस्ते ज्वलितकुण्डलः । (५।२)

सह पत्न्या महाराज ऋद्ध्या सह विराजते । (५।३)

सर्वाभरणभूषिण्या पुष्पवत्या धनेश्वरः ॥ (५।४)

दिवाकरनिभे पुण्ये दिव्यास्तरणसंवृते । (६।१)

दिव्यपादोपधाने च निषण्णः परमासने ॥ (६।२)

मन्दाराणाम् उदाराणां वनानि सुरभीणि च । (७।१)

सौगन्धिकानां चादाय गन्धान् गन्धवहः शुचिः ॥ (७।२)

नलिन्याश्चालकाख्यायाश्चन्दनानां वनस्य च । (८।१)

मनोहृदयसंह्लादी वायुस्तम् उपसेवते ॥ (८।२)

तत्र देवाः सगन्धर्वा गणैर् अप्सरसां वृताः । (९।१)

दिव्यतानेन गीतानि गान्ति दिव्यानि भारत ॥ (९।२)

मिश्रकेशी च रम्भा च चित्रसेना शुचिस्मिता । (१०।१)

चारुनेत्रा घृताची च मेनका पुञ्जिकस्थला ॥ (१०।२)

विश्वाची सहजन्या च प्रम्लोचा उर्वशी इरा । (११।१)

प्रम्लोचाप्युर्वशी चैव इडा चित्रा विभावरी । (११।२)

वर्गा च सौरभेयी च समीची बुद्बुदा लता । (११।३)

देवी रम्भा मनोरमा । (११।४)

गोपाली पञ्चचूडा च विद्युद्वर्णा सुलोचना । (११।५)

चित्रदेवी च नीला च ॥ (११।६)

एताः सहस्रशश्चान्या नृत्तगीतविशारदाः । (१२।१)

उपतिष्ठन्ति धनदं पाण्डवाप्सरसां गणाः ॥ (१२।२)

अनिशं दिव्यवादित्रैर् नृत्तैर् गीतैश्च सा सभा । (१३।१)

अशून्या रुचिरा भाति गन्धर्वाप्सरसां गणैः ॥ (१३।२)

किंनरा नाम गन्धर्वा नरा नाम तथापरे । (१४।१)

एते गायन्ति नृत्यन्ति धनदं ह्लादयन्ति च । (१४।२)

मणिभद्रो ऽथ धनदः श्वेतभद्रश्च गुह्यकः । (१४।३)

स्थूणश्च सूर्यभानुश्च तथा शोणकतिन्दुकौ ॥ (१४।४)

कशेरको गण्डकण्डुः प्रद्योतश्च महाबलः । (१५।१)

कुस्तुम्बुरुः पिशाचश्च गजकर्णो विशालकः ॥ (१५।२)

वराहकर्णः सान्द्रोष्ठः फलभक्षः फलोदकः । (१६।१)

मुद्गश्चमूहिलः पुष्पो हेमनेत्रप्रणालुकः । (१६।२)

अङ्गचूडः शिखावर्तो हेमनेत्रो विभीषणः ॥ (१६।३)

पुष्पाननः पिङ्गलकः शोणितोदः प्रवालकः । (१७।१)

वृक्षवास्यनिकेतश्च चीरवासाश्च भारत ॥ (१७।२)

एते चान्ये च बहवो यक्षाः शतसहस्रशः । (१८।१)

सदा भगवती च श्रीस्तथैव नलकूबरः ॥ (१८।२)

अहं च बहुशस्तस्यां भवन्त्यन्ये च मद्विधाः । (१९।१)

आचार्याश्चाभवंस्तत्र तथा देवर्षयो ऽपरे । (१९।२)

क्रव्यादाश्च तथैवान्ये गन्धर्वाश्च महाबलाः । (१९।३)

उपासते महात्मानं तस्यां धनदम् ईश्वरम् ॥ (१९।४)

भगवान् भूतसंघैश्च वृतः शतसहस्रशः । (२०।१)

उमापतिः पशुपतिः शूलधृग् भगनेत्रहा ॥ (२०।२)

त्र्यम्बको राजशार्दूल देवी च विगतक्लमा । (२१।१)

वामनैर् विकटैः कुब्जैः क्षतजाक्षैर् मनोजवैः ॥ (२१।२)

मांसमेदोवसाहारैर् उग्रश्रवणदर्शनैः । (२२।१)

नानाप्रहरणैर् घोरैर् वातैर् इव महाजवैः । (२२।२)

वृतः सखायम् अन्वास्ते सदैव धनदं नृप । (२२।३)

प्रहृष्टाः शतशश्चान्ये बहुशः सपरिच्छदाः । (२२।४)

गन्धर्वाणां च पतयो विश्वावसुर् हहाहुहूः । (२२।५)

तुम्बुरुः पर्वतश्चैव शैलूषस्त्वथ नारदः । (२२।६)

चित्रसेनश्च गीतज्ञस्तथा चित्ररथो ऽपि च । (२२।७)

एते चान्ये च गन्धर्वा धनेश्वरम् उपासते । (२२।८)

विद्याधराधिपश्चैव चन्द्रापीडः सहानुजैः । (२२।९)

उपासते महात्मानं धनानाम् ईश्वरं प्रभुम् । (२२।१०)

किंनराः शतशस्तत्र धनानाम् ईश्वरं प्रभुम् । (२२।११)

आसते चापि राजानो भगदत्तपुरोगमाः । (२२।१२)

द्रुमः किंपुरुषेशश्च उपास्ते धनदेश्वरम् । (२२।१३)

राक्षसानां पतिश्चैव महेन्द्रो गन्धमादनः । (२२।१४)

सह यक्षैः सगन्धर्वैः सह सर्वैर् निशाचरैः । (२२।१५)

विभीषणश्च धर्मिष्ठ उपास्ते भ्रातरं प्रभुम् । (२२।१६)

हिमवान् पारियात्रश्च विन्ध्यकैलासमन्दराः । (२२।१७)

मलयो दर्दुरश्चैव महेन्द्रो गन्धमादनः । (२२।१८)

इन्द्रनीलः सुनाभश्च तथा दिव्यौ च पर्वतौ । (२२।१९)

एते चान्ये च बहवः सर्वे मेरुपुरोगमाः । (२२।२०)

उपासते महात्मानं धनानाम् ईश्वरं प्रभुम् । (२२।२१)

नन्दीश्वरश्च भगवान्महाकालस्तथैव च । (२२।२२)

शङ्कुकर्णमुखाः सर्वे दिव्याः पारिषदास्तथा । (२२।२३)

काष्ठकूटः सोमनन्दी विजयश्च तपोऽधिकः । (२२।२४)

श्वेतश्च वृषभस्तत्र ननर्द सुमहारवः । (२२।२५)

धनदं राक्षसाश्चान्ये गन्धर्वाश्च समासते । (२२।२६)

परिषद्गणैः परिवृतम् उपयातं महेश्वरम् । (२२।२७)

तं दृष्ट्वा देवदेवेशं शिवं त्रैलोक्यभावनम् । (२२।२८)

प्रणम्य मूर्ध्ना पौलस्त्यो बहुरूपम् उमापतिम् । (२२।२९)

ततो ऽभ्यनुज्ञां सम्प्राप्य महादेवाद् धनेश्वरः । (२२।३०)

आस्ते कदाचिद् भगवान् भवो धनपतेः सखा । (२२।३१)

निधीनां प्रवरौ मुख्यौ शङ्खपद्मौ धनेश्वरौ । (२२।३२)

सर्वान्निधीन् प्रगृह्याथ उपास्तां वै धनेश्वरम् ॥ (२२।३३)

सा सभा तादृशी राजन्मया दृष्टान्तरिक्षगा । (२३।१)

पितामहसभां राजन् कथयिष्ये गतक्लमाम् ॥ (२३।२)