वैशंपायन उवाच । (१।१)

अथाब्रवीन्महावीर्यो द्रोणस्तत्त्वार्थदर्शिवान् । (१।२)

न तादृशा विनश्यन्ति नापि यान्ति पराभवम् ॥ (१।३)

शूराश्च कृतविद्याश्च बुद्धिमन्तो जितेन्द्रियाः । (२।१)

धर्मज्ञाश्च कृतज्ञाश्च धर्मराजम् अनुव्रताः ॥ (२।२)

नीतिधर्मार्थतत्त्वज्ञं पितृवच्च समाहितम् । (३।१)

धर्मे स्थितं सत्यधृतिं ज्येष्ठं ज्येष्ठापचायिनम् ॥ (३।२)

अनुव्रता महात्मानं भ्रातरं भ्रातरो नृप । (४।१)

अजातशत्रुं ह्रीमन्तं तं च भ्रातॄन् अनुव्रतम् ॥ (४।२)

तेषां तथा विधेयानां निभृतानां महात्मनाम् । (५।१)

किमर्थं नीतिमान् पार्थः श्रेयो नैषां करिष्यति ॥ (५।२)

तस्माद् यत्नात् प्रतीक्षन्ते कालस्योदयम् आगतम् । (६।१)

न हि ते नाशम् ऋच्छेयुर् इति पश्याम्यहं धिया ॥ (६।२)

सांप्रतं चैव यत् कार्यं तच्च क्षिप्रम् अकालिकम् । (७।१)

क्रियतां साधु संचिन्त्य वासश्चैषां प्रचिन्त्यताम् ॥ (७।२)

यथावत् पाण्डुपुत्राणां सर्वार्थेषु धृतात्मनाम् । (८।१)

दुर्ज्ञेयाः खलु शूरास्ते अपापास्तपसा वृताः ॥ (८।२)

शुद्धात्मा गुणवान् पार्थः सत्यवान्नीतिमाञ् शुचिः । (९।१)

तेजोराशिर् असंख्येयो गृह्णीयाद् अपि चक्षुषी ॥ (९।२)

विज्ञाय क्रियतां तस्माद् भूयश्च मृगयामहे । (१०।१)

ब्राह्मणैश्चारकैः सिद्धैर् ये चान्ये तद्विदो जनाः ॥ (१०।२)