वैशंपायन उवाच । (१।१)

ततः प्रभाते विमले धार्तराष्ट्रेण चोदिताः । (१।२)

दुर्योधनेन राजानः प्रययुः पाण्डवान् प्रति ॥ (१।३)

आप्लाव्य शुचयः सर्वे स्रग्विणः शुक्लवाससः । (२।१)

गृहीतशस्त्रा ध्वजिनः स्वस्ति वाच्य हुताग्नयः ॥ (२।२)

सर्वे वेदविदः शूराः सर्वे सुचरितव्रताः । (३।१)

सर्वे कर्मकृतश्चैव सर्वे चाहवलक्षणाः ॥ (३।२)

आहवेषु परांल् लोकाञ् जिगीषन्तो महाबलाः । (४।१)

एकाग्रमनसः सर्वे श्रद्दधानाः परस्य च ॥ (४।२)

विन्दानुविन्दावावन्त्यौ केकया बाह्लिकैः सह । (५।१)

प्रययुः सर्व एवैते भारद्वाजपुरोगमाः ॥ (५।२)

अश्वत्थामा शांतनवः सैन्धवो ऽथ जयद्रथः । (६।१)

दाक्षिणात्याः प्रतीच्याश्च पार्वतीयाश्च ये रथाः ॥ (६।२)

गान्धारराजः शकुनिः प्राच्योदीच्याश्च सर्वशः । (७।१)

शकाः किराता यवनाः शिबयो ऽथ वसातयः ॥ (७।२)

स्वैः स्वैर् अनीकैः सहिताः परिवार्य महारथम् । (८।१)

एते महारथाः सर्वे द्वितीये निर्ययुर् बले ॥ (८।२)

कृतवर्मा सहानीकस्त्रिगर्ताश्च महाबलाः । (९।१)

दुर्योधनश्च नृपतिर् भ्रातृभिः परिवारितः ॥ (९।२)

शलो भूरिश्रवाः शल्यः कौसल्यो ऽथ बृहद्बलः । (१०।१)

एते पश्चाद् अवर्तन्त धार्तराष्ट्रपुरोगमाः ॥ (१०।२)

ते समेन पथा यात्वा योत्स्यमाना महारथाः । (११।१)

कुरुक्षेत्रस्य पश्चार्धे व्यवतिष्ठन्त दंशिताः ॥ (११।२)

दुर्योधनस्तु शिबिरं कारयामास भारत । (१२।१)

यथैव हास्तिनपुरं द्वितीयं समलंकृतम् ॥ (१२।२)

न विशेषं विजानन्ति पुरस्य शिबिरस्य वा । (१३।१)

कुशला अपि राजेन्द्र नरा नगरवासिनः ॥ (१३।२)

तादृशान्येव दुर्गाणि राज्ञाम् अपि महीपतिः । (१४।१)

कारयामास कौरव्यः शतशो ऽथ सहस्रशः ॥ (१४।२)

पञ्चयोजनम् उत्सृज्य मण्डलं तद् रणाजिरम् । (१५।१)

सेनानिवेशास्ते राजन्न् आविशञ् शतसंघशः ॥ (१५।२)

तत्र ते पृथिवीपाला यथोत्साहं यथाबलम् । (१६।१)

विविशुः शिबिराण्याशु द्रव्यवन्ति सहस्रशः ॥ (१६।२)

तेषां दुर्योधनो राजा ससैन्यानां महात्मनाम् । (१७।१)

व्यादिदेश सबाह्यानां भक्ष्यभोज्यम् अनुत्तमम् ॥ (१७।२)

सगजाश्वमनुष्याणां ये च शिल्पोपजीविनः । (१८।१)

ये चान्ये ऽनुगतास्तत्र सूतमागधबन्दिनः ॥ (१८।२)

वणिजो गणिका वारा ये चैव प्रेक्षका जनाः । (१९।१)

सर्वांस्तान् कौरवो राजा विधिवत् प्रत्यवैक्षत ॥ (१९।२)