वैशंपायन उवाच । (१।१)

स गत्वा हास्तिनपुरं नकुलः समितिंजयः । (१।२)

भीष्मम् आमन्त्रयामास धृतराष्ट्रं च पाण्डवः ॥ (१।३)

प्रययुः प्रीतमनसो यज्ञं ब्रह्मपुरःसराः । (२।१)

संश्रुत्य धर्मराजस्य यज्ञं यज्ञविदस्तदा ॥ (२।२)

अन्ये च शतशस्तुष्टैर् मनोभिर् मनुजर्षभ । (३।१)

द्रष्टुकामाः सभां चैव धर्मराजं च पाण्डवम् ॥ (३।२)

दिग्भ्यः सर्वे समापेतुः पार्थिवास्तत्र भारत । (४।१)

समुपादाय रत्नानि विविधानि महान्ति च ॥ (४।२)

धृतराष्ट्रश्च भीष्मश्च विदुरश्च महामतिः । (५।१)

दुर्योधनपुरोगाश्च भ्रातरः सर्व एव ते ॥ (५।२)

सत्कृत्यामन्त्रिताः सर्वे आचार्यप्रमुखा नृपाः । (६।१)

गान्धारराजः सुबलः शकुनिश्च महाबलः ॥ (६।२)

अचलो वृषकश्चैव कर्णश्च रथिनां वरः । (७।१)

ऋतः शल्यो मद्रराजो बाह्लिकश्च महारथः ॥ (७।२)

सोमदत्तो ऽथ कौरव्यो भूरिर् भूरिश्रवाः शलः । (८।१)

अश्वत्थामा कृपो द्रोणः सैन्धवश्च जयद्रथः ॥ (८।२)

यज्ञसेनः सपुत्रश्च शाल्वश्च वसुधाधिपः । (९।१)

प्राग्ज्योतिषश्च नृपतिर् भगदत्तो महायशाः ॥ (९।२)

सह सर्वैस्तथा म्लेच्छैः सागरानूपवासिभिः । (१०।१)

पार्वतीयाश्च राजानो राजा चैव बृहद्बलः ॥ (१०।२)

पौण्ड्रको वासुदेवश्च वङ्गः कालिङ्गकस्तथा । (११।१)

आकर्षः कुन्तलश्चैव वानवास्यान्ध्रकास्तथा ॥ (११।२)

द्रविडाः सिंहलाश्चैव राजा काश्मीरकस्तथा । (१२।१)

कुन्तिभोजो महातेजाः सुह्मश्च सुमहाबलः ॥ (१२।२)

बाह्लिकाश्चापरे शूरा राजानः सर्व एव ते । (१३।१)

विराटः सह पुत्रैश्च माचेल्लश्च महारथः । (१३।२)

राजानो राजपुत्राश्च नानाजनपदेश्वराः ॥ (१३।३)

शिशुपालो महावीर्यः सह पुत्रेण भारत । (१४।१)

आगच्छत् पाण्डवेयस्य यज्ञं संग्रामदुर्मदः ॥ (१४।२)

रामश्चैवानिरुद्धश्च बभ्रुश्च सहसारणः । (१५।१)

गदप्रद्युम्नसाम्बाश्च चारुदेष्णश्च वीर्यवान् ॥ (१५।२)

उल्मुको निशठश्चैव वीरः प्राद्युम्निर् एव च । (१६।१)

वृष्णयो निखिलेनान्ये समाजग्मुर् महारथाः ॥ (१६।२)

एते चान्ये च बहवो राजानो मध्यदेशजाः । (१७।१)

आजग्मुः पाण्डुपुत्रस्य राजसूयं महाक्रतुम् ॥ (१७।२)

ददुस्तेषाम् आवसथान् धर्मराजस्य शासनात् । (१८।१)

बहुकक्ष्यान्वितान् राजन् दीर्घिकावृक्षशोभितान् ॥ (१८।२)

तथा धर्मात्मजस्तेषां चक्रे पूजाम् अनुत्तमाम् । (१९।१)

सत्कृताश्च यथोद्दिष्टाञ् जग्मुर् आवसथान्नृपाः ॥ (१९।२)

कैलासशिखरप्रख्यान्मनोज्ञान् द्रव्यभूषितान् । (२०।१)

सर्वतः संवृतान् उच्चैः प्राकारैः सुकृतैः सितैः ॥ (२०।२)

सुवर्णजालसंवीतान्मणिकुट्टिमशोभितान् । (२१।१)

सुखारोहणसोपानान्महासनपरिच्छदान् ॥ (२१।२)

स्रग्दामसमवच्छन्नान् उत्तमागुरुगन्धिनः । (२२।१)

हंसांशुवर्णसदृशान् आयोजनसुदर्शनान् ॥ (२२।२)

असंबाधान् समद्वारान् युतान् उच्चावचैर् गुणैः । (२३।१)

बहुधातुपिनद्धाङ्गान् हिमवच्छिखरान् इव ॥ (२३।२)

विश्रान्तास्ते ततो ऽपश्यन् भूमिपा भूरिदक्षिणम् । (२४।१)

वृतं सदस्यैर् बहुभिर् धर्मराजं युधिष्ठिरम् ॥ (२४।२)

तत् सदः पार्थिवैः कीर्णं ब्राह्मणैश्च महात्मभिः । (२५।१)

भ्राजते स्म तदा राजन्नाकपृष्ठम् इवामरैः ॥ (२५।२)