ब्रह्मोवाच । (१।१)

य उत्पन्नो महान् पूर्वम् अहंकारः स उच्यते । (१।२)

अहम् इत्येव सम्भूतो द्वितीयः सर्ग उच्यते ॥ (१।३)

अहंकारश्च भूतादिर् वैकारिक इति स्मृतः । (२।१)

तेजसश्चेतना धातुः प्रजासर्गः प्रजापतिः ॥ (२।२)

देवानां प्रभवो देवो मनसश्च त्रिलोककृत् । (३।१)

अहम् इत्येव तत् सर्वम् अभिमन्ता स उच्यते ॥ (३।२)

अध्यात्मज्ञाननित्यानां मुनीनां भावितात्मनाम् । (४।१)

स्वाध्यायक्रतुसिद्धानाम् एष लोकः सनातनः ॥ (४।२)

अहंकारेणाहरतो गुणान् इमान् भूतादिर् एवं सृजते स भूतकृत् । (५।१)

वैकारिकः सर्वम् इदं विचेष्टते स्वतेजसा रञ्जयते जगत् तथा ॥ (५।२)