भीमसेन उवाच । (१।१)

यथा यथैव शान्तिः स्यात् कुरूणां मधुसूदन । (१।२)

तथा तथैव भाषेथा मा स्म युद्धेन भीषयेः ॥ (१।३)

अमर्षी नित्यसंरब्धः श्रेयोद्वेषी महामनाः । (२।१)

नोग्रं दुर्योधनो वाच्यः साम्नैवैनं समाचरेः ॥ (२।२)

प्रकृत्या पापसत्त्वश्च तुल्यचेताश्च दस्युभिः । (३।१)

ऐश्वर्यमदमत्तश्च कृतवैरश्च पाण्डवैः ॥ (३।२)

अदीर्घदर्शी निष्ठूरी क्षेप्ता क्रूरपराक्रमः । (४।१)

दीर्घमन्युर् अनेयश्च पापात्मा निकृतिप्रियः ॥ (४।२)

म्रियेतापि न भज्येत नैव जह्यात् स्वकं मतम् । (५।१)

तादृशेन शमं कृष्ण मन्ये परमदुष्करम् ॥ (५।२)

सुहृदाम् अप्यवाचीनस्त्यक्तधर्मः प्रियानृतः । (६।१)

प्रतिहन्त्येव सुहृदां वाचश्चैव मनांसि च ॥ (६।२)

स मन्युवशम् आपन्नः स्वभावं दुष्टम् आस्थितः । (७।१)

स्वभावात् पापम् अन्वेति तृणैस्तुन्न इवोरगः ॥ (७।२)

दुर्योधनो हि यत्सेनः सर्वथा विदितस्तव । (८।१)

यच्छीलो यत्स्वभावश्च यद्बलो यत्पराक्रमः ॥ (८।२)

पुरा प्रसन्नाः कुरवः सहपुत्रास्तथा वयम् । (९।१)

इन्द्रज्येष्ठा इवाभूम मोदमानाः सबान्धवाः ॥ (९।२)

दुर्योधनस्य क्रोधेन भारता मधुसूदन । (१०।१)

धक्ष्यन्ते शिशिरापाये वनानीव हुताशनैः ॥ (१०।२)

अष्टादशेमे राजानः प्रख्याता मधुसूदन । (११।१)

ये समुच्चिछिदुर् ज्ञातीन् सुहृदश्च सबान्धवान् ॥ (११।२)

असुराणां समृद्धानां ज्वलताम् इव तेजसा । (१२।१)

पर्यायकाले धर्मस्य प्राप्ते बलिर् अजायत ॥ (१२।२)

हैहयानाम् उदावर्तो नीपानां जनमेजयः । (१३।१)

बहुलस्तालजङ्घानां कृमीणाम् उद्धतो वसुः ॥ (१३।२)

अजबिन्दुः सुवीराणां सुराष्ट्राणां कुशर्द्धिकः । (१४।१)

अर्कजश्च बलीहानां चीनानां धौतमूलकः ॥ (१४।२)

हयग्रीवो विदेहानां वरप्रश्च महौजसाम् । (१५।१)

बाहुः सुन्दरवेगानां दीप्ताक्षाणां पुरूरवाः ॥ (१५।२)

सहजश्चेदिमत्स्यानां प्रचेतानां बृहद्बलः । (१६।१)

धारणश्चेन्द्रवत्सानां मुकुटानां विगाहनः ॥ (१६।२)

शमश्च नन्दिवेगानाम् इत्येते कुलपांसनाः । (१७।१)

युगान्ते कृष्ण सम्भूताः कुलेषु पुरुषाधमाः ॥ (१७।२)

अप्ययं नः कुरूणां स्याद् युगान्ते कालसंभृतः । (१८।१)

दुर्योधनः कुलाङ्गारो जघन्यः पापपूरुषः ॥ (१८।२)

तस्मान्मृदु शनैर् एनं ब्रूया धर्मार्थसंहितम् । (१९।१)

कामानुबन्धबहुलं नोग्रम् उग्रपराक्रमम् ॥ (१९।२)

अपि दुर्योधनं कृष्ण सर्वे वयम् अधश्चराः । (२०।१)

नीचैर् भूत्वानुयास्यामो मा स्म नो भरता नशन् ॥ (२०।२)

अप्युदासीनवृत्तिः स्याद् यथा नः कुरुभिः सह । (२१।१)

वासुदेव तथा कार्यं न कुरून् अनयः स्पृशेत् ॥ (२१।२)

वाच्यः पितामहो वृद्धो ये च कृष्ण सभासदः । (२२।१)

भ्रातॄणाम् अस्तु सौभ्रात्रं धार्तराष्ट्रः प्रशाम्यताम् ॥ (२२।२)

अहम् एतद् ब्रवीम्येवं राजा चैव प्रशंसति । (२३।१)

अर्जुनो नैव युद्धार्थी भूयसी हि दयार्जुने ॥ (२३।२)