भीष्म उवाच । (१।१)

सर्वान् कामान् प्रयच्छन्ति ये प्रयच्छन्ति काञ्चनम् । (१।२)

इत्येवं भगवान् अत्रिः पितामहसुतो ऽब्रवीत् ॥ (१।३)

पवित्रं शुच्यथायुष्यं पितॄणाम् अक्षयं च तत् । (२।१)

सुवर्णं मनुजेन्द्रेण हरिश्चन्द्रेण कीर्तितम् ॥ (२।२)

पानीयदानं परमं दानानां मनुर् अब्रवीत् । (३।१)

तस्माद् वापीश्च कूपांश्च तडागानि च खानयेत् ॥ (३।२)

अर्धं पापस्य हरति पुरुषस्येह कर्मणः । (४।१)

कूपः प्रवृत्तपानीयः सुप्रवृत्तश्च नित्यशः ॥ (४।२)

सर्वं तारयते वंशं यस्य खाते जलाशये । (५।१)

गावः पिबन्ति विप्राश्च साधवश्च नराः सदा ॥ (५।२)

निदाघकाले पानीयं यस्य तिष्ठत्यवारितम् । (६।१)

स दुर्गं विषमं कृच्छ्रं न कदाचिद् अवाप्नुते ॥ (६।२)

बृहस्पतेर् भगवतः पूष्णश्चैव भगस्य च । (७।१)

अश्विनोश्चैव वह्नेश्च प्रीतिर् भवति सर्पिषा ॥ (७।२)

परमं भेषजं ह्येतद् यज्ञानाम् एतद् उत्तमम् । (८।१)

रसानाम् उत्तमं चैतत् फलानां चैतद् उत्तमम् ॥ (८।२)

फलकामो यशस्कामः पुष्टिकामश्च नित्यदा । (९।१)

घृतं दद्याद् द्विजातिभ्यः पुरुषः शुचिर् आत्मवान् ॥ (९।२)

घृतं मासे आश्वयुजि विप्रेभ्यो यः प्रयच्छति । (१०।१)

तस्मै प्रयच्छतो रूपं प्रीतौ देवाविहाश्विनौ ॥ (१०।२)

पायसं सर्पिषा मिश्रं द्विजेभ्यो यः प्रयच्छति । (११।१)

गृहं तस्य न रक्षांसि धर्षयन्ति कदाचन ॥ (११।२)

पिपासया न म्रियते सोपच्छन्दश्च दृश्यते । (१२।१)

न प्राप्नुयाच्च व्यसनं करकान् यः प्रयच्छति ॥ (१२।२)

प्रयतो ब्राह्मणाग्रेभ्यः श्रद्धया परया युतः । (१३।१)

उपस्पर्शनषड्भागं लभते पुरुषः सदा ॥ (१३।२)

यः साधनार्थं काष्ठानि ब्राह्मणेभ्यः प्रयच्छति । (१४।१)

प्रतापार्थं च राजेन्द्र वृत्तवद्भ्यः सदा नरः ॥ (१४।२)

सिध्यन्त्यर्थाः सदा तस्य कार्याणि विविधानि च । (१५।१)

उपर्युपरि शत्रूणां वपुषा दीप्यते च सः ॥ (१५।२)

भगवांश्चास्य सुप्रीतो वह्निर् भवति नित्यशः । (१६।१)

न तं त्यजन्ते पशवः संग्रामे च जयत्यपि ॥ (१६।२)

पुत्राञ्छ्रियं च लभते यश्छत्रं सम्प्रयच्छति । (१७।१)

चक्षुर्व्याधिं न लभते यज्ञभागम् अथाश्नुते ॥ (१७।२)

निदाघकाले वर्षे वा यश्छत्रं सम्प्रयच्छति । (१८।१)

नास्य कश्चिन्मनोदाहः कदाचिद् अपि जायते । (१८।२)

कृच्छ्रात् स विषमाच्चैव विप्र मोक्षम् अवाप्नुते ॥ (१८।३)

प्रदानं सर्वदानानां शकटस्य विशिष्यते । (१९।१)

एवम् आह महाभागः शाण्डिल्यो भगवान् ऋषिः ॥ (१९।२)