युधिष्ठिर उवाच । (१।१)

सत्यं धर्मे प्रशंसन्ति विप्रर्षिपितृदेवताः । (१।२)

सत्यम् इच्छाम्यहं श्रोतुं तन्मे ब्रूहि पितामह ॥ (१।३)

सत्यं किंलक्षणं राजन् कथं वा तद् अवाप्यते । (२।१)

सत्यं प्राप्य भवेत् किं च कथं चैव तद् उच्यते ॥ (२।२)

भीष्म उवाच । (३।१)

चातुर्वर्ण्यस्य धर्माणां संकरो न प्रशस्यते । (३।२)

अविकारितमं सत्यं सर्ववर्णेषु भारत ॥ (३।३)

सत्यं सत्सु सदा धर्मः सत्यं धर्मः सनातनः । (४।१)

सत्यम् एव नमस्येत सत्यं हि परमा गतिः ॥ (४।२)

सत्यं धर्मस्तपो योगः सत्यं ब्रह्म सनातनम् । (५।१)

सत्यं यज्ञः परः प्रोक्तः सत्ये सर्वं प्रतिष्ठितम् ॥ (५।२)

आचारान् इह सत्यस्य यथावद् अनुपूर्वशः । (६।१)

लक्षणं च प्रवक्ष्यामि सत्यस्येह यथाक्रमम् ॥ (६।२)

प्राप्यते हि यथा सत्यं तच्च श्रोतुं त्वम् अर्हसि । (७।१)

सत्यं त्रयोदशविधं सर्वलोकेषु भारत ॥ (७।२)

सत्यं च समता चैव दमश्चैव न संशयः । (८।१)

अमात्सर्यं क्षमा चैव ह्रीस्तितिक्षानसूयता ॥ (८।२)

त्यागो ध्यानम् अथार्यत्वं धृतिश्च सततं स्थिरा । (९।१)

अहिंसा चैव राजेन्द्र सत्याकारास्त्रयोदश ॥ (९।२)

सत्यं नामाव्ययं नित्यम् अविकारि तथैव च । (१०।१)

सर्वधर्माविरुद्धं च योगेनैतद् अवाप्यते ॥ (१०।२)

आत्मनीष्टे तथानिष्टे रिपौ च समता तथा । (११।१)

इच्छाद्वेषक्षयं प्राप्य कामक्रोधक्षयं तथा ॥ (११।२)

दमो नान्यस्पृहा नित्यं धैर्यं गाम्भीर्यम् एव च । (१२।१)

अभयं क्रोधशमनं ज्ञानेनैतद् अवाप्यते ॥ (१२।२)

अमात्सर्यं बुधाः प्राहुर् दानं धर्मे च संयमम् । (१३।१)

अवस्थितेन नित्यं च सत्येनामत्सरी भवेत् ॥ (१३।२)

अक्षमायाः क्षमायाश्च प्रियाणीहाप्रियाणि च । (१४।१)

क्षमते सर्वतः साधुः साध्वाप्नोति च सत्यवान् ॥ (१४।२)

कल्याणं कुरुते गाढं ह्रीमान्न श्लाघते क्वचित् । (१५।१)

प्रशान्तवाङ्मना नित्यं ह्रीस्तु धर्माद् अवाप्यते ॥ (१५।२)

धर्मार्थहेतोः क्षमते तितिक्षा क्षान्तिर् उच्यते । (१६।१)

लोकसंग्रहणार्थं तु सा तु धैर्येण लभ्यते ॥ (१६।२)

त्यागः स्नेहस्य यस्त्यागो विषयाणां तथैव च । (१७।१)

रागद्वेषप्रहीणस्य त्यागो भवति नान्यथा ॥ (१७।२)

आर्यता नाम भूतानां यः करोति प्रयत्नतः । (१८।१)

शुभं कर्म निराकारो वीतरागत्वम् एव च ॥ (१८।२)

धृतिर् नाम सुखे दुःखे यथा नाप्नोति विक्रियाम् । (१९।१)

तां भजेत सदा प्राज्ञो य इच्छेद् भूतिम् आत्मनः ॥ (१९।२)

सर्वथा क्षमिणा भाव्यं तथा सत्यपरेण च । (२०।१)

वीतहर्षभयक्रोधो धृतिम् आप्नोति पण्डितः ॥ (२०।२)

अद्रोहः सर्वभूतेषु कर्मणा मनसा गिरा । (२१।१)

अनुग्रहश्च दानं च सतां धर्मः सनातनः ॥ (२१।२)

एते त्रयोदशाकाराः पृथक् सत्यैकलक्षणाः । (२२।१)

भजन्ते सत्यम् एवेह बृंहयन्ति च भारत ॥ (२२।२)

नान्तः शक्यो गुणानां हि वक्तुं सत्यस्य भारत । (२३।१)

अतः सत्यं प्रशंसन्ति विप्राः सपितृदेवताः ॥ (२३।२)

नास्ति सत्यात् परो धर्मो नानृतात् पातकं परम् । (२४।१)

स्थितिर् हि सत्यं धर्मस्य तस्मात् सत्यं न लोपयेत् ॥ (२४।२)

उपैति सत्याद् दानं हि तथा यज्ञाः सदक्षिणाः । (२५।१)

व्रताग्निहोत्रं वेदाश्च ये चान्ये धर्मनिश्चयाः ॥ (२५।२)

अश्वमेधसहस्रं च सत्यं च तुलया धृतम् । (२६।१)

अश्वमेधसहस्राद्धि सत्यम् एवातिरिच्यते ॥ (२६।२)