वैशंपायन उवाच । (१।१)

ततस्ते प्रययुर् हृष्टाः प्रहृष्टनरवाहनाः । (१।२)

रथघोषेण महता पूरयन्तो वसुंधराम् ॥ (१।३)

संस्तूयमानाः स्तुतिभिः सूतमागधबन्दिभिः । (२।१)

स्वेन सैन्येन संवीता यथादित्याः स्वरश्मिभिः ॥ (२।२)

पाण्डुरेणातपत्रेण ध्रियमाणेन मूर्धनि । (३।१)

बभौ युधिष्ठिरस्तत्र पौर्णमास्याम् इवोडुराट् ॥ (३।२)

जयाशिषः प्रहृष्टानां नराणां पथि पाण्डवः । (४।१)

प्रत्यगृह्णाद् यथान्यायं यथावत् पुरुषर्षभः ॥ (४।२)

तथैव सैनिका राजन् राजानम् अनुयान्ति ये । (५।१)

तेषां हलहलाशब्दो दिवं स्तब्ध्वा व्यतिष्ठत ॥ (५।२)

स सरांसि नदीश्चैव वनान्युपवनानि च । (६।१)

अत्यक्रामन्महाराजो गिरिं चैवान्वपद्यत ॥ (६।२)

तस्मिन् देशे च राजेन्द्र यत्र तद् द्रव्यम् उत्तमम् । (७।१)

चक्रे निवेशनं राजा पाण्डवः सह सैनिकैः । (७।२)

शिवे देशे समे चैव तदा भरतसत्तम ॥ (७।३)

अग्रतो ब्राह्मणान् कृत्वा तपोविद्यादमान्वितान् । (८।१)

पुरोहितं च कौरव्य वेदवेदाङ्गपारगम् ॥ (८।२)

प्राङ् निवेशात् तु राजानं ब्राह्मणाः सपुरोधसः । (९।१)

कृत्वा शान्तिं यथान्यायं सर्वतः पर्यवारयन् ॥ (९।२)

कृत्वा च मध्ये राजानम् अमात्यांश्च यथाविधि । (१०।१)

षट्पथं नवसंस्थानं निवेशं चक्रिरे द्विजाः ॥ (१०।२)

मत्तानां वारणेन्द्राणां निवेशं च यथाविधि । (११।१)

कारयित्वा स राजेन्द्रो ब्राह्मणान् इदम् अब्रवीत् ॥ (११।२)

अस्मिन् कार्ये द्विजश्रेष्ठा नक्षत्रे दिवसे शुभे । (१२।१)

यथा भवन्तो मन्यन्ते कर्तुम् अर्हथ तत् तथा ॥ (१२।२)

न नः कालात्ययो वै स्याद् इहैव परिलम्बताम् । (१३।१)

इति निश्चित्य विप्रेन्द्राः क्रियतां यद् अनन्तरम् ॥ (१३।२)

श्रुत्वैतद् वचनं राज्ञो ब्राह्मणाः सपुरोधसः । (१४।१)

इदम् ऊचुर् वचो हृष्टा धर्मराजप्रियेप्सवः ॥ (१४।२)

अद्यैव नक्षत्रम् अहश्च पुण्यं यतामहे श्रेष्ठतमं क्रियासु । (१५।१)

अम्भोभिर् अद्येह वसाम राजन्न् उपोष्यतां चापि भवद्भिर् अद्य ॥ (१५।२)

श्रुत्वा तु तेषां द्विजसत्तमानां कृतोपवासा रजनीं नरेन्द्राः । (१६।१)

ऊषुः प्रतीताः कुशसंस्तरेषु यथाध्वरेषु ज्वलिता हव्यवाहाः ॥ (१६।२)

ततो निशा सा व्यगमन्महात्मनां संशृण्वतां विप्रसमीरिता गिरः । (१७।१)

ततः प्रभाते विमले द्विजर्षभा वचो ऽब्रुवन् धर्मसुतं नराधिपम् ॥ (१७।२)