भीष्म उवाच । (१।१)

अत्र कर्मान्तवचनं कीर्तयन्ति पुराविदः । (१।२)

प्रत्यक्षावेव धर्मार्थौ क्षत्रियस्य विजानतः । (१।३)

तत्र न व्यवधातव्यं परोक्षा धर्मयापना ॥ (१।४)

अधर्मो धर्म इत्येतद् यथा वृकपदं तथा । (२।१)

धर्माधर्मफले जातु न ददर्शेह कश्चन ॥ (२।२)

बुभूषेद् बलवान् एव सर्वं बलवतो वशे । (३।१)

श्रियं बलम् अमात्यांश्च बलवान् इह विन्दति ॥ (३।२)

यो ह्यनाढ्यः स पतितस्तद् उच्छिष्टं यद् अल्पकम् । (४।१)

बह्वपथ्यं बलवति न किंचित् त्रायते भयात् ॥ (४।२)

उभौ सत्याधिकारौ तौ त्रायेते महतो भयात् । (५।१)

अति धर्माद् बलं मन्ये बलाद् धर्मः प्रवर्तते ॥ (५।२)

बले प्रतिष्ठितो धर्मो धरण्याम् इव जङ्गमः । (६।१)

धूमो वायोर् इव वशं बलं धर्मो ऽनुवर्तते ॥ (६।२)

अनीश्वरे बलं धर्मो द्रुमं वल्लीव संश्रिता । (७।१)

वश्यो बलवतां धर्मः सुखं भोगवताम् इव । (७।२)

नास्त्यसाध्यं बलवतां सर्वं बलवतां शुचि ॥ (७।३)

दुराचारः क्षीणबलः परिमाणं नियच्छति । (८।१)

अथ तस्माद् उद्विजते सर्वो लोको वृकाद् इव ॥ (८।२)

अपध्वस्तो ह्यवमतो दुःखं जीवति जीवितम् । (९।१)

जीवितं यद् अवक्षिप्तं यथैव मरणं तथा ॥ (९।२)

यद् एनम् आहुः पापेन चारित्रेण विनिक्षतम् । (१०।१)

स भृशं तप्यते ऽनेन वाक्शल्येन परिक्षतः ॥ (१०।२)

अत्रैतद् आहुर् आचार्याः पापस्य परिमोक्षणे । (११।१)

त्रयीं विद्यां निषेवेत तथोपासीत स द्विजान् ॥ (११।२)

प्रसादयेन्मधुरया वाचाप्यथ च कर्मणा । (१२।१)

महामनाश्चैव भवेद् विवहेच्च महाकुले ॥ (१२।२)

इत्यस्मीति वदेद् एवं परेषां कीर्तयन् गुणान् । (१३।१)

जपेद् उदकशीलः स्यात् पेशलो नातिजल्पनः ॥ (१३।२)

ब्रह्मक्षत्रं सम्प्रविशेद् बहु कृत्वा सुदुष्करम् । (१४।१)

उच्यमानो ऽपि लोकेन बहु तत् तद् अचिन्तयन् ॥ (१४।२)

अपापो ह्येवम् आचारः क्षिप्रं बहुमतो भवेत् । (१५।१)

सुखं वित्तं च भुञ्जीत वृत्तेनैतेन गोपयेत् । (१५।२)

लोके च लभते पूजां परत्र च महत् फलम् ॥ (१५।३)