भीष्म उवाच । (१।१)

द्रौपदेया महाराज सर्वे पञ्च महारथाः । (१।२)

वैराटिर् उत्तरश्चैव रथो मम महान्मतः ॥ (१।३)

अभिमन्युर् महाराज रथयूथपयूथपः । (२।१)

समः पार्थेन समरे वासुदेवेन वा भवेत् ॥ (२।२)

लघ्वस्त्रश्चित्रयोधी च मनस्वी दृढविक्रमः । (३।१)

संस्मरन् वै परिक्लेशं स्वपितुर् विक्रमिष्यति ॥ (३।२)

सात्यकिर् माधवः शूरो रथयूथपयूथपः । (४।१)

एष वृष्णिप्रवीराणाम् अमर्षी जितसाध्वसः ॥ (४।२)

उत्तमौजास्तथा राजन् रथो मम महान्मतः । (५।१)

युधामन्युश्च विक्रान्तो रथोदारो नरर्षभः ॥ (५।२)

एतेषां बहुसाहस्रा रथा नागा हयास्तथा । (६।१)

योत्स्यन्ते ते तनुं त्यक्त्वा कुन्तीपुत्रप्रियेप्सया ॥ (६।२)

पाण्डवैः सह राजेन्द्र तव सेनासु भारत । (७।१)

अग्निमारुतवद् राजन्न् आह्वयन्तः परस्परम् ॥ (७।२)

अजेयौ समरे वृद्धौ विराटद्रुपदावुभौ । (८।१)

महारथौ महावीर्यौ मतौ मे पुरुषर्षभौ ॥ (८।२)

वयोवृद्धावपि तु तौ क्षत्रधर्मपरायणौ । (९।१)

यतिष्येते परं शक्त्या स्थितौ वीरगते पथि ॥ (९।२)

संबन्धकेन राजेन्द्र तौ तु वीर्यबलान्वयात् । (१०।१)

आर्यवृत्तौ महेष्वासौ स्नेहपाशसितावुभौ ॥ (१०।२)

कारणं प्राप्य तु नराः सर्व एव महाभुजाः । (११।१)

शूरा वा कातरा वापि भवन्ति नरपुंगव ॥ (११।२)

एकायनगतावेतौ पार्थेन दृढभक्तिकौ । (१२।१)

त्यक्त्वा प्राणान् परं शक्त्या घटितारौ नराधिप ॥ (१२।२)

पृथग् अक्षौहिणीभ्यां तावुभौ संयति दारुणौ । (१३।१)

संबन्धिभावं रक्षन्तौ महत् कर्म करिष्यतः ॥ (१३।२)

लोकवीरौ महेष्वासौ त्यक्तात्मानौ च भारत । (१४।१)

प्रत्ययं परिरक्षन्तौ महत् कर्म करिष्यतः ॥ (१४।२)