सुपर्ण उवाच । (१।१)

इयं दिग् दयिता राज्ञो वरुणस्य तु गोपतेः । (१।२)

सदा सलिलराजस्य प्रतिष्ठा चादिर् एव च ॥ (१।३)

अत्र पश्चाद् अहः सूर्यो विसर्जयति भाः स्वयम् । (२।१)

पश्चिमेत्यभिविख्याता दिग् इयं द्विजसत्तम ॥ (२।२)

यादसाम् अत्र राज्येन सलिलस्य च गुप्तये । (३।१)

कश्यपो भगवान् देवो वरुणं स्माभ्यषेचयत् ॥ (३।२)

अत्र पीत्वा समस्तान् वै वरुणस्य रसांस्तु षट् । (४।१)

जायते तरुणः सोमः शुक्लस्यादौ तमिस्रहा ॥ (४।२)

अत्र पश्चात् कृता दैत्या वायुना संयतास्तदा । (५।१)

निःश्वसन्तो महानागैर् अर्दिताः सुषुपुर् द्विज ॥ (५।२)

अत्र सूर्यं प्रणयिनं प्रतिगृह्णाति पर्वतः । (६।१)

अस्तो नाम यतः संध्या पश्चिमा प्रतिसर्पति ॥ (६।२)

अतो रात्रिश्च निद्रा च निर्गता दिवसक्षये । (७।१)

जायते जीवलोकस्य हर्तुम् अर्धम् इवायुषः ॥ (७।२)

अत्र देवीं दितिं सुप्ताम् आत्मप्रसवधारिणीम् । (८।१)

विगर्भाम् अकरोच्छक्रो यत्र जातो मरुद्गणः ॥ (८।२)

अत्र मूलं हिमवतो मन्दरं याति शाश्वतम् । (९।१)

अपि वर्षसहस्रेण न चास्यान्तो ऽधिगम्यते ॥ (९।२)

अत्र काञ्चनशैलस्य काञ्चनाम्बुवहस्य च । (१०।१)

उदधेस्तीरम् आसाद्य सुरभिः क्षरते पयः ॥ (१०।२)

अत्र मध्ये समुद्रस्य कबन्धः प्रतिदृश्यते । (११।१)

स्वर्भानोः सूर्यकल्पस्य सोमसूर्यौ जिघांसतः ॥ (११।२)

सुवर्णशिरसो ऽप्यत्र हरिरोम्णः प्रगायतः । (१२।१)

अदृश्यस्याप्रमेयस्य श्रूयते विपुलो ध्वनिः ॥ (१२।२)

अत्र ध्वजवती नाम कुमारी हरिमेधसः । (१३।१)

आकाशे तिष्ठ तिष्ठेति तस्थौ सूर्यस्य शासनात् ॥ (१३।२)

अत्र वायुस्तथा वह्निर् आपः खं चैव गालव । (१४।१)

आह्निकं चैव नैशं च दुःखस्पर्शं विमुञ्चति । (१४।२)

अतः प्रभृति सूर्यस्य तिर्यग् आवर्तते गतिः ॥ (१४।३)

अत्र ज्योतींषि सर्वाणि विशन्त्यादित्यमण्डलम् । (१५।१)

अष्टाविंशतिरात्रं च चङ्क्रम्य सह भानुना । (१५।२)

निष्पतन्ति पुनः सूर्यात् सोमसंयोगयोगतः ॥ (१५।३)

अत्र नित्यं स्रवन्तीनां प्रभवः सागरोदयः । (१६।१)

अत्र लोकत्रयस्यापस्तिष्ठन्ति वरुणाश्रयाः ॥ (१६।२)

अत्र पन्नगराजस्याप्यनन्तस्य निवेशनम् । (१७।१)

अनादिनिधनस्यात्र विष्णोः स्थानम् अनुत्तमम् ॥ (१७।२)

अत्रानलसखस्यापि पवनस्य निवेशनम् । (१८।१)

महर्षेः कश्यपस्यात्र मारीचस्य निवेशनम् ॥ (१८।२)

एष ते पश्चिमो मार्गो दिग्द्वारेण प्रकीर्तितः । (१९।१)

ब्रूहि गालव गच्छावो बुद्धिः का द्विजसत्तम ॥ (१९।२)