वैशंपायन उवाच । (१।१)

श्रुत्वा तु वचनं भीष्मो वासुदेवस्य धीमतः । (१।२)

किंचिद् उन्नाम्य वदनं प्राञ्जलिर् वाक्यम् अब्रवीत् ॥ (१।३)

नमस्ते भगवन् विष्णो लोकानां निधनोद्भव । (२।१)

त्वं हि कर्ता हृषीकेश संहर्ता चापराजितः ॥ (२।२)

विश्वकर्मन्नमस्ते ऽस्तु विश्वात्मन् विश्वसंभव । (३।१)

अपवर्गो ऽसि भूतानां पञ्चानां परतः स्थितः ॥ (३।२)

नमस्ते त्रिषु लोकेषु नमस्ते परतस्त्रिषु । (४।१)

योगेश्वर नमस्ते ऽस्तु त्वं हि सर्वपरायणम् ॥ (४।२)

मत्संश्रितं यद् आत्थ त्वं वचः पुरुषसत्तम । (५।१)

तेन पश्यामि ते दिव्यान् भावान् हि त्रिषु वर्त्मसु ॥ (५।२)

तच्च पश्यामि तत्त्वेन यत् ते रूपं सनातनम् । (६।१)

सप्त मार्गा निरुद्धास्ते वायोर् अमिततेजसः ॥ (६।२)

दिवं ते शिरसा व्याप्तं पद्भ्यां देवी वसुंधरा । (७।१)

दिशो भुजौ रविश्चक्षुर् वीर्ये शक्रः प्रतिष्ठितः ॥ (७।२)

अतसीपुष्पसंकाशं पीतवाससम् अच्युतम् । (८।१)

वपुर् ह्यनुमिमीमस्ते मेघस्येव सविद्युतः ॥ (८।२)

त्वत्प्रपन्नाय भक्ताय गतिम् इष्टां जिगीषवे । (९।१)

यच्छ्रेयः पुण्डरीकाक्ष तद् ध्यायस्व सुरोत्तम ॥ (९।२)

वासुदेव उवाच । (१०।१)

यतः खलु परा भक्तिर् मयि ते पुरुषर्षभ । (१०।२)

ततो वपुर् मया दिव्यं तव राजन् प्रदर्शितम् ॥ (१०।३)

न ह्यभक्ताय राजेन्द्र भक्तायानृजवे न च । (११।१)

दर्शयाम्यहम् आत्मानं न चादान्ताय भारत ॥ (११।२)

भवांस्तु मम भक्तश्च नित्यं चार्जवम् आस्थितः । (१२।१)

दमे तपसि सत्ये च दाने च निरतः शुचिः ॥ (१२।२)

अर्हस्त्वं भीष्म मां द्रष्टुं तपसा स्वेन पार्थिव । (१३।१)

तव ह्युपस्थिता लोका येभ्यो नावर्तते पुनः ॥ (१३।२)

पञ्चाशतं षट् च कुरुप्रवीर शेषं दिनानां तव जीवितस्य । (१४।१)

ततः शुभैः कर्मफलोदयैस्त्वं समेष्यसे भीष्म विमुच्य देहम् ॥ (१४।२)

एते हि देवा वसवो विमानान्य् आस्थाय सर्वे ज्वलिताग्निकल्पाः । (१५।१)

अन्तर्हितास्त्वां प्रतिपालयन्ति काष्ठां प्रपद्यन्तम् उदक् पतंगम् ॥ (१५।२)

व्यावृत्तमात्रे भगवत्युदीचीं सूर्ये दिशं कालवशात् प्रपन्ने । (१६।१)

गन्तासि लोकान् पुरुषप्रवीर नावर्तते यान् उपलभ्य विद्वान् ॥ (१६।२)

अमुं च लोकं त्वयि भीष्म याते ज्ञानानि नङ्क्ष्यन्त्यखिलेन वीर । (१७।१)

अतः स्म सर्वे त्वयि संनिकर्षं समागता धर्मविवेचनाय ॥ (१७।२)

तज्ज्ञातिशोकोपहतश्रुताय सत्याभिसंधाय युधिष्ठिराय । (१८।१)

प्रब्रूहि धर्मार्थसमाधियुक्तम् अर्थ्यं वचो ऽस्यापनुदास्य शोकम् ॥ (१८।२)