धृतराष्ट्र उवाच । (१।१)

शंतनुः पालयामास यथावत् पृथिवीम् इमाम् । (१।२)

तथा विचित्रवीर्यश्च भीष्मेण परिपालितः । (१।३)

पालयामास वस्तातो विदितं वो नसंशयः ॥ (१।४)

यथा च पाण्डुर् भ्राता मे दयितो भवताम् अभूत् । (२।१)

स चापि पालयामास यथावत् तच्च वेत्थ ह ॥ (२।२)

मया च भवतां सम्यक् शुश्रूषा या कृतानघाः । (३।१)

असम्यग् वा महाभागास्तत् क्षन्तव्यम् अतन्द्रितैः ॥ (३।२)

यच्च दुर्योधनेनेदं राज्यं भुक्तम् अकण्टकम् । (४।१)

अपि तत्र न वो मन्दो दुर्बुद्धिर् अपराद्धवान् ॥ (४।२)

तस्यापराधाद् दुर्बुद्धेर् अभिमानान्महीक्षिताम् । (५।१)

विमर्दः सुमहान् आसीद् अनयान्मत्कृताद् अथ ॥ (५।२)

तन्मया साधु वापीदं यदि वासाधु वै कृतम् । (६।१)

तद् वो हृदि न कर्तव्यं माम् अनुज्ञातुम् अर्हथ ॥ (६।२)

वृद्धो ऽयं हतपुत्रो ऽयं दुःखितो ऽयं जनाधिपः । (७।१)

पूर्वराज्ञां च पुत्रो ऽयम् इति कृत्वानुजानत ॥ (७।२)

इयं च कृपणा वृद्धा हतपुत्रा तपस्विनी । (८।१)

गान्धारी पुत्रशोकार्ता तुल्यं याचति वो मया ॥ (८।२)

हतपुत्राविमौ वृद्धौ विदित्वा दुःखितौ तथा । (९।१)

अनुजानीत भद्रं वो व्रजावः शरणं च वः ॥ (९।२)

अयं च कौरवो राजा कुन्तीपुत्रो युधिष्ठिरः । (१०।१)

सर्वैर् भवद्भिर् द्रष्टव्यः समेषु विषमेषु च । (१०।२)

न जातु विषमं चैव गमिष्यति कदाचन ॥ (१०।३)

चत्वारः सचिवा यस्य भ्रातरो विपुलौजसः । (११।१)

लोकपालोपमा ह्येते सर्वे धर्मार्थदर्शिनः ॥ (११।२)

ब्रह्मेव भगवान् एष सर्वभूतजगत्पतिः । (१२।१)

युधिष्ठिरो महातेजा भवतः पालयिष्यति ॥ (१२।२)

अवश्यम् एव वक्तव्यम् इति कृत्वा ब्रवीमि वः । (१३।१)

एष न्यासो मया दत्तः सर्वेषां वो युधिष्ठिरः । (१३।२)

भवन्तो ऽस्य च वीरस्य न्यासभूता मया कृताः ॥ (१३।३)

यद्येव तैः कृतं किंचिद् व्यलीकं वा सुतैर् मम । (१४।१)

यद्यन्येन मदीयेन तद् अनुज्ञातुम् अर्हथ ॥ (१४।२)

भवद्भिर् हि न मे मन्युः कृतपूर्वः कथंचन । (१५।१)

अत्यन्तगुरुभक्तानाम् एषो ऽञ्जलिर् इदं नमः ॥ (१५।२)

तेषाम् अस्थिरबुद्धीनां लुब्धानां कामचारिणाम् । (१६।१)

कृते याचामि वः सर्वान् गान्धारीसहितो ऽनघाः ॥ (१६।२)

इत्युक्तास्तेन ते राज्ञा पौरजानपदा जनाः । (१७।१)

नोचुर् बाष्पकलाः किंचिद् वीक्षांचक्रुः परस्परम् ॥ (१७।२)