कुन्त्युवाच । (१।१)

एवम् एतन्महाबाहो यथा वदसि पाण्डव । (१।२)

कृतम् उद्धर्षणं पूर्वं मया वः सीदतां नृप ॥ (१।३)

द्यूतापहृतराज्यानां पतितानां सुखाद् अपि । (२।१)

ज्ञातिभिः परिभूतानां कृतम् उद्धर्षणं मया ॥ (२।२)

कथं पाण्डोर् न नश्येत संततिः पुरुषर्षभाः । (३।१)

यशश्च वो न नश्येत इति चोद्धर्षणं कृतम् ॥ (३।२)

यूयम् इन्द्रसमाः सर्वे देवतुल्यपराक्रमाः । (४।१)

मा परेषां मुखप्रेक्षाः स्थेत्येवं तत् कृतं मया ॥ (४।२)

कथं धर्मभृतां श्रेष्ठो राजा त्वं वासवोपमः । (५।१)

पुनर् वने न दुःखी स्या इति चोद्धर्षणं कृतम् ॥ (५।२)

नागायुतसमप्राणः ख्यातविक्रमपौरुषः । (६।१)

नायं भीमो ऽत्ययं गच्छेद् इति चोद्धर्षणं कृतम् ॥ (६।२)

भीमसेनाद् अवरजस्तथायं वासवोपमः । (७।१)

विजयो नावसीदेत इति चोद्धर्षणं कृतम् ॥ (७।२)

नकुलः सहदेवश्च तथेमौ गुरुवर्तिनौ । (८।१)

क्षुधा कथं न सीदेताम् इति चोद्धर्षणं कृतम् ॥ (८।२)

इयं च बृहती श्यामा श्रीमत्यायतलोचना । (९।१)

वृथा सभातले क्लिष्टा मा भूद् इति च तत् कृतम् ॥ (९।२)

प्रेक्षन्त्या मे तदा हीमां वेपन्तीं कदलीम् इव । (१०।१)

स्त्रीधर्मिणीम् अनिन्द्याङ्गीं तथा द्यूतपराजिताम् ॥ (१०।२)

दुःशासनो यदा मौढ्याद् दासीवत् पर्यकर्षत । (११।१)

तदैव विदितं मह्यं पराभूतम् इदं कुलम् ॥ (११।२)

विषण्णाः कुरवश्चैव तदा मे श्वशुरादयः । (१२।१)

यदैषा नाथम् इच्छन्ती व्यलपत् कुररी यथा ॥ (१२।२)

केशपक्षे परामृष्टा पापेन हतबुद्धिना । (१३।१)

यदा दुःशासनेनैषा तदा मुह्याम्यहं नृप ॥ (१३।२)

युष्मत्तेजोविवृद्ध्यर्थं मया ह्युद्धर्षणं कृतम् । (१४।१)

तदानीं विदुरावाक्यैर् इति तद् वित्त पुत्रकाः ॥ (१४।२)

कथं न राजवंशो ऽयं नश्येत् प्राप्य सुतान्मम । (१५।१)

पाण्डोर् इति मया पुत्र तस्माद् उद्धर्षणं कृतम् ॥ (१५।२)

न तस्य पुत्रः पौत्रौ वा कुत एव स पार्थिव । (१६।१)

लभते सुकृतांल्लोकान् यस्माद् वंशः प्रणश्यति ॥ (१६।२)

भुक्तं राज्यफलं पुत्रा भर्तुर् मे विपुलं पुरा । (१७।१)

महादानानि दत्तानि पीतः सोमो यथाविधि ॥ (१७।२)

साहं नात्मफलार्थं वै वासुदेवम् अचूचुदम् । (१८।१)

विदुरायाः प्रलापैस्तैः प्लावनार्थं तु तत् कृतम् ॥ (१८।२)

नाहं राज्यफलं पुत्र कामये पुत्रनिर्जितम् । (१९।१)

पतिलोकान् अहं पुण्यान् कामये तपसा विभो ॥ (१९।२)

श्वश्रूश्वशुरयोः कृत्वा शुश्रूषां वनवासिनोः । (२०।१)

तपसा शोषयिष्यामि युधिष्ठिर कलेवरम् ॥ (२०।२)

निवर्तस्व कुरुश्रेष्ठ भीमसेनादिभिः सह । (२१।१)

धर्मे ते धीयतां बुद्धिर् मनस्ते महद् अस्तु च ॥ (२१।२)