धृतराष्ट्र उवाच । (१।१)

तस्मिन् प्रभग्ने सैन्याग्रे वध्यमाने किरीटिना । (१।२)

के नु तत्र रणे वीराः प्रत्युदीयुर् धनंजयम् ॥ (१।३)

आहोस्विच्छकटव्यूहं प्रविष्टा मोघनिश्चयाः । (२।१)

द्रोणम् आश्रित्य तिष्ठन्तः प्राकारम् अकुतोभयाः ॥ (२।२)

संजय उवाच । (३।१)

तथार्जुनेन संभग्ने तस्मिंस्तव बले तदा । (३।२)

हतवीरे हतोत्साहे पलायनकृतक्षणे ॥ (३।३)

पाकशासनिनाभीक्ष्णं वध्यमाने शरोत्तमैः । (४।१)

न तत्र कश्चित् संग्रामे शशाकार्जुनम् ईक्षितुम् ॥ (४।२)

ततस्तव सुतो राजन् दृष्ट्वा सैन्यं तथागतम् । (५।१)

दुःशासनो भृशं क्रुद्धो युद्धायार्जुनम् अभ्ययात् ॥ (५।२)

स काञ्चनविचित्रेण कवचेन समावृतः । (६।१)

जाम्बूनदशिरस्त्राणः शूरस्तीव्रपराक्रमः ॥ (६।२)

नागानीकेन महता ग्रसन्न् इव महीम् इमाम् । (७।१)

दुःशासनो महाराज सव्यसाचिनम् आवृणोत् ॥ (७।२)

ह्रादेन गजघण्टानां शङ्खानां निनदेन च । (८।१)

ज्याक्षेपनिनदैश्चैव विरावेण च दन्तिनाम् ॥ (८।२)

भूर् दिशश्चान्तरिक्षं च शब्देनासीत् समावृतम् । (९।१)

स मुहूर्तं प्रतिभयो दारुणः समपद्यत ॥ (९।२)

तान् दृष्ट्वा पततस्तूर्णम् अङ्कुशैर् अभिचोदितान् । (१०।१)

व्यालम्बहस्तान् संरब्धान् सपक्षान् इव पर्वतान् ॥ (१०।२)

सिंहनादेन महता नरसिंहो धनंजयः । (११।१)

गजानीकम् अमित्राणाम् अभितो व्यधमच्छरैः ॥ (११।२)

महोर्मिणम् इवोद्धूतं श्वसनेन महार्णवम् । (१२।१)

किरीटी तद् गजानीकं प्राविशन्मकरो यथा ॥ (१२।२)

काष्ठातीत इवादित्यः प्रतपन् युगसंक्षये । (१३।१)

ददृशे दिक्षु सर्वासु पार्थः परपुरंजयः ॥ (१३।२)

खुरशब्देन चाश्वानां नेमिघोषेण तेन च । (१४।१)

तेन चोत्क्रुष्टशब्देन ज्यानिनादेन तेन च । (१४।२)

देवदत्तस्य घोषेण गाण्डीवनिनदेन च ॥ (१४।३)

मन्दवेगतरा नागा बभूवुस्ते विचेतसः । (१५।१)

शरैर् आशीविषस्पर्शैर् निर्भिन्नाः सव्यसाचिना ॥ (१५।२)

ते गजा विशिखैस्तीक्ष्णैर् युधि गाण्डीवचोदितैः । (१६।१)

अनेकशतसाहस्रैः सर्वाङ्गेषु समर्पिताः ॥ (१६।२)

आरावं परमं कृत्वा वध्यमानाः किरीटिना । (१७।१)

निपेतुर् अनिशं भूमौ छिन्नपक्षा इवाद्रयः ॥ (१७।२)

अपरे दन्तवेष्टेषु कुम्भेषु च कटेषु च । (१८।१)

शरैः समर्पिता नागाः क्रौञ्चवद् व्यनदन्मुहुः ॥ (१८।२)

गजस्कन्धगतानां च पुरुषाणां किरीटिना । (१९।१)

आछिद्यन्तोत्तमाङ्गानि भल्लैः संनतपर्वभिः ॥ (१९।२)

सकुण्डलानां पततां शिरसां धरणीतले । (२०।१)

पद्मानाम् इव संघातैः पार्थश्चक्रे निवेदनम् ॥ (२०।२)

यन्त्रबद्धा विकवचा व्रणार्ता रुधिरोक्षिताः । (२१।१)

भ्रमत्सु युधि नागेषु मनुष्या विललम्बिरे ॥ (२१।२)

केचिद् एकेन बाणेन सुमुक्तेन पतत्रिणा । (२२।१)

द्वौ त्रयश्च विनिर्भिन्ना निपेतुर् धरणीतले ॥ (२२।२)

मौर्वीं धनुर् ध्वजं चैव युगानीषास्तथैव च । (२३।१)

रथिनां कुट्टयामास भल्लैः संनतपर्वभिः ॥ (२३।२)

न संदधन्न चाप्यस्यन्न विमुञ्चन्न चोद्धरन् । (२४।१)

मण्डलेनैव धनुषा नृत्यन् पार्थः स्म दृश्यते ॥ (२४।२)

अतिविद्धाश्च नाराचैर् वमन्तो रुधिरं मुखैः । (२५।१)

मुहूर्तान्निपतन्त्यन्ये वारणा वसुधातले ॥ (२५।२)

उत्थितान्यगणेयानि कबन्धानि समन्ततः । (२६।१)

अदृश्यन्त महाराज तस्मिन् परमसंकुले ॥ (२६।२)

सचापाः साङ्गुलित्राणाः सखड्गाः साङ्गदा रणे । (२७।१)

अदृश्यन्त भुजाश्छिन्ना हेमाभरणभूषिताः ॥ (२७।२)

सूपस्करैर् अधिष्ठानैर् ईषादण्डकबन्धुरैः । (२८।१)

चक्रैर् विमथितैर् अक्षैर् भग्नैश्च बहुधा युगैः ॥ (२८।२)

वर्मचापशरैश्चैव व्यवकीर्णैस्ततस्ततः । (२९।१)

स्रग्भिर् आभरणैर् वस्त्रैः पतितैश्च महाध्वजैः ॥ (२९।२)

निहतैर् वारणैर् अश्वैः क्षत्रियैश्च निपातितैः । (३०।१)

अदृश्यत मही तत्र दारुणप्रतिदर्शना ॥ (३०।२)

एवं दुःशासनबलं वध्यमानं किरीटिना । (३१।१)

सम्प्राद्रवन्महाराज व्यथितं वै सनायकम् ॥ (३१।२)

ततो दुःशासनस्त्रस्तः सहानीकः शरार्दितः । (३२।१)

द्रोणं त्रातारम् आकाङ्क्षञ् शकटव्यूहम् अभ्यगात् ॥ (३२।२)