युधिष्ठिर उवाच । (१।१)

सत्स्त्रीणां समुदाचारं सर्वधर्मभृतां वर । (१।२)

श्रोतुम् इच्छाम्यहं त्वत्तस्तं मे ब्रूहि पितामह ॥ (१।३)

भीष्म उवाच । (२।१)

सर्वज्ञां सर्वधर्मज्ञां देवलोके मनस्विनीम् । (२।२)

कैकेयी सुमना नाम शाण्डिलीं पर्यपृच्छत ॥ (२।३)

केन वृत्तेन कल्याणि समाचारेण केन वा । (३।१)

विधूय सर्वपापानि देवलोकं त्वम् आगता ॥ (३।२)

हुताशनशिखेव त्वं ज्वलमाना स्वतेजसा । (४।१)

सुता ताराधिपस्येव प्रभया दिवम् आगता ॥ (४।२)

अरजांसि च वस्त्राणि धारयन्ती गतक्लमा । (५।१)

विमानस्था शुभे भासि सहस्रगुणम् ओजसा ॥ (५।२)

न त्वम् अल्पेन तपसा दानेन नियमेन वा । (६।१)

इमं लोकम् अनुप्राप्ता तस्मात् तत्त्वं वदस्व मे ॥ (६।२)

इति पृष्टा सुमनया मधुरं चारुहासिनी । (७।१)

शाण्डिली निभृतं वाक्यं सुमनाम् इदम् अब्रवीत् ॥ (७।२)

नाहं काषायवसना नापि वल्कलधारिणी । (८।१)

न च मुण्डा न जटिला भूत्वा देवत्वम् आगता ॥ (८।२)

अहितानि च वाक्यानि सर्वाणि परुषाणि च । (९।१)

अप्रमत्ता च भर्तारं कदाचिन्नाहम् अब्रुवम् ॥ (९।२)

देवतानां पितॄणां च ब्राह्मणानां च पूजने । (१०।१)

अप्रमत्ता सदायुक्ता श्वश्रूश्वशुरवर्तिनी ॥ (१०।२)

पैशुन्ये न प्रवर्तामि न ममैतन्मनोगतम् । (११।१)

अद्वारे न च तिष्ठामि चिरं न कथयामि च ॥ (११।२)

असद् वा हसितं किंचिद् अहितं वापि कर्मणा । (१२।१)

रहस्यम् अरहस्यं वा न प्रवर्तामि सर्वथा ॥ (१२।२)

कार्यार्थे निर्गतं चापि भर्तारं गृहम् आगतम् । (१३।१)

आसनेनोपसंयोज्य पूजयामि समाहिता ॥ (१३।२)

यद् यच्च नाभिजानाति यद् भोज्यं नाभिनन्दति । (१४।१)

भक्ष्यं वाप्यथ वा लेह्यं तत् सर्वं वर्जयाम्यहम् ॥ (१४।२)

कुटुम्बार्थे समानीतं यत् किंचित् कार्यम् एव तु । (१५।१)

प्रातर् उत्थाय तत् सर्वं कारयामि करोमि च ॥ (१५।२)

प्रवासं यदि मे भर्ता याति कार्येण केनचित् । (१६।१)

मङ्गलैर् बहुभिर् युक्ता भवामि नियता सदा ॥ (१६।२)

अञ्जनं रोचनां चैव स्नानं माल्यानुलेपनम् । (१७।१)

प्रसाधनं च निष्क्रान्ते नाभिनन्दामि भर्तरि ॥ (१७।२)

नोत्थापयामि भर्तारं सुखसुप्तम् अहं सदा । (१८।१)

आतुरेष्वपि कार्येषु तेन तुष्यति मे मनः ॥ (१८।२)

नायासयामि भर्तारं कुटुम्बार्थे च सर्वदा । (१९।१)

गुप्तगुह्या सदा चास्मि सुसंमृष्टनिवेशना ॥ (१९।२)

इमं धर्मपथं नारी पालयन्ती समाहिता । (२०।१)

अरुन्धतीव नारीणां स्वर्गलोके महीयते ॥ (२०।२)

भीष्म उवाच । (२१।१)

एतद् आख्याय सा देवी सुमनायै तपस्विनी । (२१।२)

पतिधर्मं महाभागा जगामादर्शनं तदा ॥ (२१।३)

यश्चेदं पाण्डवाख्यानं पठेत् पर्वणि पर्वणि । (२२।१)

स देवलोकं सम्प्राप्य नन्दने सुसुखं वसेत् ॥ (२२।२)