जनमेजय उवाच । (१।१)

कथं स भगवान् देवो यज्ञेष्वग्रहरः प्रभुः । (१।२)

यज्ञधारी च सततं वेदवेदाङ्गवित् तथा ॥ (१।३)

निवृत्तं चास्थितो धर्मं क्षेमी भागवतप्रियः । (२।१)

प्रवृत्तिधर्मान् विदधे स एव भगवान् प्रभुः ॥ (२।२)

कथं प्रवृत्तिधर्मेषु भागार्हा देवताः कृताः । (३।१)

कथं निवृत्तिधर्माश्च कृता व्यावृत्तबुद्धयः ॥ (३।२)

एतं नः संशयं विप्र छिन्द्धि गुह्यं सनातनम् । (४।१)

त्वया नारायणकथा श्रुता वै धर्मसंहिता ॥ (४।२)

इमे सब्रह्मका लोकाः ससुरासुरमानवाः । (५।१)

क्रियास्वभ्युदयोक्तासु सक्ता दृश्यन्ति सर्वशः । (५।२)

मोक्षश्चोक्तस्त्वया ब्रह्मन्निर्वाणं परमं सुखम् ॥ (५।३)

ये च मुक्ता भवन्तीह पुण्यपापविवर्जिताः । (६।१)

ते सहस्रार्चिषं देवं प्रविशन्तीति शुश्रुमः ॥ (६।२)

अहो हि दुरनुष्ठेयो मोक्षधर्मः सनातनः । (७।१)

यं हित्वा देवताः सर्वा हव्यकव्यभुजो ऽभवन् ॥ (७।२)

किं नु ब्रह्मा च रुद्रश्च शक्रश्च बलभित् प्रभुः । (८।१)

सूर्यस्ताराधिपो वायुर् अग्निर् वरुण एव च । (८।२)

आकाशं जगती चैव ये च शेषा दिवौकसः ॥ (८।३)

प्रलयं न विजानन्ति आत्मनः परिनिर्मितम् । (९।१)

ततस्ते नास्थिता मार्गं ध्रुवम् अक्षयम् अव्ययम् ॥ (९।२)

स्मृत्वा कालपरीमाणं प्रवृत्तिं ये समास्थिताः । (१०।१)

दोषः कालपरीमाणे महान् एष क्रियावताम् ॥ (१०।२)

एतन्मे संशयं विप्र हृदि शल्यम् इवार्पितम् । (११।१)

छिन्द्धीतिहासकथनात् परं कौतूहलं हि मे ॥ (११।२)

कथं भागहराः प्रोक्ता देवताः क्रतुषु द्विज । (१२।१)

किमर्थं चाध्वरे ब्रह्मन्निज्यन्ते त्रिदिवौकसः ॥ (१२।२)

ये च भागं प्रगृह्णन्ति यज्ञेषु द्विजसत्तम । (१३।१)

ते यजन्तो महायज्ञैः कस्य भागं ददन्ति वै ॥ (१३।२)

वैशंपायन उवाच । (१४।१)

अहो गूढतमः प्रश्नस्त्वया पृष्टो जनेश्वर । (१४।२)

नातप्ततपसा ह्येष नावेदविदुषा तथा । (१४।३)

नापुराणविदा चापि शक्यो व्याहर्तुम् अञ्जसा ॥ (१४।४)

हन्त ते कथयिष्यामि यन्मे पृष्टः पुरा गुरुः । (१५।१)

कृष्णद्वैपायनो व्यासो वेदव्यासो महान् ऋषिः ॥ (१५।२)

सुमन्तुर् जैमिनिश्चैव पैलश्च सुदृढव्रतः । (१६।१)

अहं चतुर्थः शिष्यो वै पञ्चमश्च शुकः स्मृतः ॥ (१६।२)

एतान् समागतान् सर्वान् पञ्च शिष्यान् दमान्वितान् । (१७।१)

शौचाचारसमायुक्ताञ् जितक्रोधाञ्जितेन्द्रियान् ॥ (१७।२)

वेदान् अध्यापयामास महाभारतपञ्चमान् । (१८।१)

मेरौ गिरिवरे रम्ये सिद्धचारणसेविते ॥ (१८।२)

तेषाम् अभ्यस्यतां वेदान् कदाचित् संशयो ऽभवत् । (१९।१)

एष वै यस्त्वया पृष्टस् तेन तेषां प्रकीर्तितः । (१९।२)

ततः श्रुतो मया चापि तवाख्येयो ऽद्य भारत ॥ (१९।३)

शिष्याणां वचनं श्रुत्वा सर्वाज्ञानतमोनुदः । (२०।१)

पराशरसुतः श्रीमान् व्यासो वाक्यम् उवाच ह ॥ (२०।२)

मया हि सुमहत् तप्तं तपः परमदारुणम् । (२१।१)

भूतं भव्यं भविष्यच्च जानीयाम् इति सत्तमाः ॥ (२१।२)

तस्य मे तप्ततपसो निगृहीतेन्द्रियस्य च । (२२।१)

नारायणप्रसादेन क्षीरोदस्यानुकूलतः ॥ (२२।२)

त्रैकालिकम् इदं ज्ञानं प्रादुर्भूतं यथेप्सितम् । (२३।१)

तच्छृणुध्वं यथाज्ञानं वक्ष्ये संशयम् उत्तमम् । (२३।२)

यथावृत्तं हि कल्पादौ दृष्टं मे ज्ञानचक्षुषा ॥ (२३।३)

परमात्मेति यं प्राहुः सांख्ययोगविदो जनाः । (२४।१)

महापुरुषसंज्ञां स लभते स्वेन कर्मणा ॥ (२४।२)

तस्मात् प्रसूतम् अव्यक्तं प्रधानं तद् विदुर् बुधाः । (२५।१)

अव्यक्ताद् व्यक्तम् उत्पन्नं लोकसृष्ट्यर्थम् ईश्वरात् ॥ (२५।२)

अनिरुद्धो हि लोकेषु महान् आत्मेति कथ्यते । (२६।१)

यो ऽसौ व्यक्तत्वम् आपन्नो निर्ममे च पितामहम् । (२६।२)

सो ऽहंकार इति प्रोक्तः सर्वतेजोमयो हि सः ॥ (२६।३)

पृथिवी वायुर् आकाशम् आपो ज्योतिश्च पञ्चमम् । (२७।१)

अहंकारप्रसूतानि महाभूतानि भारत ॥ (२७।२)

महाभूतानि सृष्ट्वाथ तद्गुणान्निर्ममे पुनः । (२८।१)

भूतेभ्यश्चैव निष्पन्ना मूर्तिमन्तो ऽष्ट ताञ्शृणु ॥ (२८।२)

मरीचिर् अङ्गिराश्चात्रिः पुलस्त्यः पुलहः क्रतुः । (२९।१)

वसिष्ठश्च महात्मा वै मनुः स्वायंभुवस्तथा । (२९।२)

ज्ञेयाः प्रकृतयो ऽष्टौ ता यासु लोकाः प्रतिष्ठिताः ॥ (२९।३)

वेदान् वेदाङ्गसंयुक्तान् यज्ञान् यज्ञाङ्गसंयुतान् । (३०।१)

निर्ममे लोकसिद्ध्यर्थं ब्रह्मा लोकपितामहः । (३०।२)

अष्टाभ्यः प्रकृतिभ्यश्च जातं विश्वम् इदं जगत् ॥ (३०।३)

रुद्रो रोषात्मको जातो दशान्यान् सो ऽसृजत् स्वयम् । (३१।१)

एकादशैते रुद्रास्तु विकाराः पुरुषाः स्मृताः ॥ (३१।२)

ते रुद्राः प्रकृतिश्चैव सर्वे चैव सुरर्षयः । (३२।१)

उत्पन्ना लोकसिद्ध्यर्थं ब्रह्माणं समुपस्थिताः ॥ (३२।२)

वयं हि सृष्टा भगवंस्त्वया वै प्रभविष्णुना । (३३।१)

येन यस्मिन्न् अधीकारे वर्तितव्यं पितामह ॥ (३३।२)

यो ऽसौ त्वया विनिर्दिष्टो ऽधिकारो ऽर्थचिन्तकः । (३४।१)

परिपाल्यः कथं तेन सो ऽधिकारो ऽधिकारिणा ॥ (३४।२)

प्रदिशस्व बलं तस्य यो ऽधिकारार्थचिन्तकः । (३५।१)

एवम् उक्तो महादेवो देवांस्तान् इदम् अब्रवीत् ॥ (३५।२)

साध्वहं ज्ञापितो देवा युष्माभिर् भद्रम् अस्तु वः । (३६।१)

ममाप्येषा समुत्पन्ना चिन्ता या भवतां मता ॥ (३६।२)

लोकतन्त्रस्य कृत्स्नस्य कथं कार्यः परिग्रहः । (३७।१)

कथं बलक्षयो न स्याद् युष्माकं ह्यात्मनश्च मे ॥ (३७।२)

इतः सर्वे ऽपि गच्छामः शरणं लोकसाक्षिणम् । (३८।१)

महापुरुषम् अव्यक्तं स नो वक्ष्यति यद्धितम् ॥ (३८।२)

ततस्ते ब्रह्मणा सार्धम् ऋषयो विबुधास्तथा । (३९।१)

क्षीरोदस्योत्तरं कूलं जग्मुर् लोकहितार्थिनः ॥ (३९।२)

ते तपः समुपातिष्ठन् ब्रह्मोक्तं वेदकल्पितम् । (४०।१)

स महानियमो नाम तपश्चर्या सुदारुणा ॥ (४०।२)

ऊर्ध्वं दृष्टिर् बाहवश्च एकाग्रं च मनो ऽभवत् । (४१।१)

एकपादस्थिताः सम्यक् काष्ठभूताः समाहिताः ॥ (४१।२)

दिव्यं वर्षसहस्रं ते तपस्तप्त्वा तद् उत्तमम् । (४२।१)

शुश्रुवुर् मधुरां वाणीं वेदवेदाङ्गभूषिताम् ॥ (४२।२)

भो भोः सब्रह्मका देवा ऋषयश्च तपोधनाः । (४३।१)

स्वागतेनार्च्य वः सर्वाञ्श्रावये वाक्यम् उत्तमम् ॥ (४३।२)

विज्ञातं वो मया कार्यं तच्च लोकहितं महत् । (४४।१)

प्रवृत्तियुक्तं कर्तव्यं युष्मत्प्राणोपबृंहणम् ॥ (४४।२)

सुतप्तं वस्तपो देवा ममाराधनकाम्यया । (४५।१)

भोक्ष्यथास्य महासत्त्वास्तपसः फलम् उत्तमम् ॥ (४५।२)

एष ब्रह्मा लोकगुरुः सर्वलोकपितामहः । (४६।१)

यूयं च विबुधश्रेष्ठा मां यजध्वं समाहिताः ॥ (४६।२)

सर्वे भागान् कल्पयध्वं यज्ञेषु मम नित्यशः । (४७।१)

तथा श्रेयो विधास्यामि यथाधीकारम् ईश्वराः ॥ (४७।२)

श्रुत्वैतद् देवदेवस्य वाक्यं हृष्टतनूरुहाः । (४८।१)

ततस्ते विबुधाः सर्वे ब्रह्मा ते च महर्षयः ॥ (४८।२)

वेददृष्टेन विधिना वैष्णवं क्रतुम् आहरन् । (४९।१)

तस्मिन् सत्रे तदा ब्रह्मा स्वयं भागम् अकल्पयत् । (४९।२)

देवा देवर्षयश्चैव सर्वे भागान् अकल्पयन् ॥ (४९।३)

ते कार्तयुगधर्माणो भागाः परमसत्कृताः । (५०।१)

प्रापुर् आदित्यवर्णं तं पुरुषं तमसः परम् । (५०।२)

बृहन्तं सर्वगं देवम् ईशानं वरदं प्रभुम् ॥ (५०।३)

ततो ऽथ वरदो देवस्तान् सर्वान् अमरान् स्थितान् । (५१।१)

अशरीरो बभाषेदं वाक्यं खस्थो महेश्वरः ॥ (५१।२)

येन यः कल्पितो भागः स तथा समुपागतः । (५२।१)

प्रीतो ऽहं प्रदिशाम्यद्य फलम् आवृत्तिलक्षणम् ॥ (५२।२)

एतद् वो लक्षणं देवा मत्प्रसादसमुद्भवम् । (५३।१)

यूयं यज्ञैर् इज्यमानाः समाप्तवरदक्षिणैः । (५३।२)

युगे युगे भविष्यध्वं प्रवृत्तिफलभोगिनः ॥ (५३।३)

यज्ञैर् ये चापि यक्ष्यन्ति सर्वलोकेषु वै सुराः । (५४।१)

कल्पयिष्यन्ति वो भागांस्ते नरा वेदकल्पितान् ॥ (५४।२)

यो मे यथा कल्पितवान् भागम् अस्मिन्महाक्रतौ । (५५।१)

स तथा यज्ञभागार्हो वेदसूत्रे मया कृतः ॥ (५५।२)

यूयं लोकान् धारयध्वं यज्ञभागफलोदिताः । (५६।१)

सर्वार्थचिन्तका लोके यथाधीकारनिर्मिताः ॥ (५६।२)

याः क्रियाः प्रचरिष्यन्ति प्रवृत्तिफलसत्कृताः । (५७।१)

ताभिर् आप्यायितबला लोकान् वै धारयिष्यथ ॥ (५७।२)

यूयं हि भाविता लोके सर्वयज्ञेषु मानवैः । (५८।१)

मां ततो भावयिष्यध्वम् एषा वो भावना मम ॥ (५८।२)

इत्यर्थं निर्मिता वेदा यज्ञाश्चौषधिभिः सह । (५९।१)

एभिः सम्यक् प्रयुक्तैर् हि प्रीयन्ते देवताः क्षितौ ॥ (५९।२)

निर्माणम् एतद् युष्माकं प्रवृत्तिगुणकल्पितम् । (६०।१)

मया कृतं सुरश्रेष्ठा यावत् कल्पक्षयाद् इति । (६०।२)

चिन्तयध्वं लोकहितं यथाधीकारम् ईश्वराः ॥ (६०।३)

मरीचिर् अङ्गिराश्चात्रिः पुलस्त्यः पुलहः क्रतुः । (६१।१)

वसिष्ठ इति सप्तैते मानसा निर्मिता हि वै ॥ (६१।२)

एते वेदविदो मुख्या वेदाचार्याश्च कल्पिताः । (६२।१)

प्रवृत्तिधर्मिणश्चैव प्राजापत्येन कल्पिताः ॥ (६२।२)

अयं क्रियावतां पन्था व्यक्तीभूतः सनातनः । (६३।१)

अनिरुद्ध इति प्रोक्तो लोकसर्गकरः प्रभुः ॥ (६३।२)

सनः सनत्सुजातश्च सनकः ससनन्दनः । (६४।१)

सनत्कुमारः कपिलः सप्तमश्च सनातनः ॥ (६४।२)

सप्तैते मानसाः प्रोक्ता ऋषयो ब्रह्मणः सुताः । (६५।१)

स्वयमागतविज्ञाना निवृत्तं धर्मम् आस्थिताः ॥ (६५।२)

एते योगविदो मुख्याः सांख्यधर्मविदस्तथा । (६६।१)

आचार्या मोक्षशास्त्रे च मोक्षधर्मप्रवर्तकाः ॥ (६६।२)

यतो ऽहं प्रसृतः पूर्वम् अव्यक्तात् त्रिगुणो महान् । (६७।१)

तस्मात् परतरो यो ऽसौ क्षेत्रज्ञ इति कल्पितः । (६७।२)

सो ऽहं क्रियावतां पन्थाः पुनरावृत्तिदुर्लभः ॥ (६७।३)

यो यथा निर्मितो जन्तुर् यस्मिन् यस्मिंश्च कर्मणि । (६८।१)

प्रवृत्तौ वा निवृत्तौ वा तत्फलं सो ऽश्नुते ऽवशः ॥ (६८।२)

एष लोकगुरुर् ब्रह्मा जगदादिकरः प्रभुः । (६९।१)

एष माता पिता चैव युष्माकं च पितामहः । (६९।२)

मयानुशिष्टो भविता सर्वभूतवरप्रदः ॥ (६९।३)

अस्य चैवानुजो रुद्रो ललाटाद् यः समुत्थितः । (७०।१)

ब्रह्मानुशिष्टो भविता सर्वत्र स वरप्रदः ॥ (७०।२)

गच्छध्वं स्वान् अधीकारांश् चिन्तयध्वं यथाविधि । (७१।१)

प्रवर्तन्तां क्रियाः सर्वाः सर्वलोकेषु माचिरम् ॥ (७१।२)

प्रदृश्यन्तां च कर्माणि प्राणिनां गतयस्तथा । (७२।१)

परिनिर्मितकालानि आयूंषि च सुरोत्तमाः ॥ (७२।२)

इदं कृतयुगं नाम कालः श्रेष्ठः प्रवर्तते । (७३।१)

अहिंस्या यज्ञपशवो युगे ऽस्मिन् नैतद् अन्यथा । (७३।२)

चतुष्पात् सकलो धर्मो भविष्यत्यत्र वै सुराः ॥ (७३।३)

ततस्त्रेतायुगं नाम त्रयी यत्र भविष्यति । (७४।१)

प्रोक्षिता यत्र पशवो वधं प्राप्स्यन्ति वै मखे । (७४।२)

तत्र पादचतुर्थो वै धर्मस्य न भविष्यति ॥ (७४।३)

ततो वै द्वापरं नाम मिश्रः कालो भविष्यति । (७५।१)

द्विपादहीनो धर्मश्च युगे तस्मिन् भविष्यति ॥ (७५।२)

ततस्तिष्ये ऽथ सम्प्राप्ते युगे कलिपुरस्कृते । (७६।१)

एकपादस्थितो धर्मो यत्र तत्र भविष्यति ॥ (७६।२)

देवा ऊचुः । (७७।१)

एकपादस्थिते धर्मे यत्रक्वचनगामिनि । (७७।२)

कथं कर्तव्यम् अस्माभिर् भगवंस्तद् वदस्व नः ॥ (७७।३)

श्रीभगवान् उवाच । (७८।१)

यत्र वेदाश्च यज्ञाश्च तपः सत्यं दमस्तथा । (७८।२)

अहिंसाधर्मसंयुक्ताः प्रचरेयुः सुरोत्तमाः । (७८।३)

स वै देशः सेवितव्यो मा वो ऽधर्मः पदा स्पृशेत् ॥ (७८।४)

व्यास उवाच । (७९।१)

ते ऽनुशिष्टा भगवता देवाः सर्षिगणास्तथा । (७९।२)

नमस्कृत्वा भगवते जग्मुर् देशान् यथेप्सितान् ॥ (७९।३)

गतेषु त्रिदिवौकःसु ब्रह्मैकः पर्यवस्थितः । (८०।१)

दिदृक्षुर् भगवन्तं तम् अनिरुद्धतनौ स्थितम् ॥ (८०।२)

तं देवो दर्शयामास कृत्वा हयशिरो महत् । (८१।१)

साङ्गान् आवर्तयन् वेदान् कमण्डलुगणित्रधृक् ॥ (८१।२)

ततो ऽश्वशिरसं दृष्ट्वा तं देवम् अमितौजसम् । (८२।१)

लोककर्ता प्रभुर् ब्रह्मा लोकानां हितकाम्यया ॥ (८२।२)

मूर्ध्ना प्रणम्य वरदं तस्थौ प्राञ्जलिर् अग्रतः । (८३।१)

स परिष्वज्य देवेन वचनं श्रावितस्तदा ॥ (८३।२)

लोककार्यगतीः सर्वास्त्वं चिन्तय यथाविधि । (८४।१)

धाता त्वं सर्वभूतानां त्वं प्रभुर् जगतो गुरुः । (८४।२)

त्वय्यावेशितभारो ऽहं धृतिं प्राप्स्याम्यथाञ्जसा ॥ (८४।३)

यदा च सुरकार्यं ते अविषह्यं भविष्यति । (८५।१)

प्रादुर्भावं गमिष्यामि तदात्मज्ञानदेशिकः ॥ (८५।२)

एवम् उक्त्वा हयशिरास्तत्रैवान्तरधीयत । (८६।१)

तेनानुशिष्टो ब्रह्मापि स्वं लोकम् अचिराद् गतः ॥ (८६।२)

एवम् एष महाभागः पद्मनाभः सनातनः । (८७।१)

यज्ञेष्वग्रहरः प्रोक्तो यज्ञधारी च नित्यदा ॥ (८७।२)

निवृत्तिं चास्थितो धर्मं गतिम् अक्षयधर्मिणाम् । (८८।१)

प्रवृत्तिधर्मान् विदधे कृत्वा लोकस्य चित्रताम् ॥ (८८।२)

स आदिः स मध्यः स चान्तः प्रजानां स धाता स धेयः स कर्ता स कार्यम् । (८९।१)

युगान्ते स सुप्तः सुसंक्षिप्य लोकान् युगादौ प्रबुद्धो जगद्ध्युत्ससर्ज ॥ (८९।२)

तस्मै नमध्वं देवाय निर्गुणाय गुणात्मने । (९०।१)

अजाय विश्वरूपाय धाम्ने सर्वदिवौकसाम् ॥ (९०।२)

महाभूताधिपतये रुद्राणां पतये तथा । (९१।१)

आदित्यपतये चैव वसूनां पतये तथा ॥ (९१।२)

अश्विभ्यां पतये चैव मरुतां पतये तथा । (९२।१)

वेदयज्ञाधिपतये वेदाङ्गपतये ऽपि च ॥ (९२।२)

समुद्रवासिने नित्यं हरये मुञ्जकेशिने । (९३।१)

शान्तये सर्वभूतानां मोक्षधर्मानुभाषिणे ॥ (९३।२)

तपसां तेजसां चैव पतये यशसो ऽपि च । (९४।१)

वाचश्च पतये नित्यं सरितां पतये तथा ॥ (९४।२)

कपर्दिने वराहाय एकशृङ्गाय धीमते । (९५।१)

विवस्वते ऽश्वशिरसे चतुर्मूर्तिधृते सदा ॥ (९५।२)

गुह्याय ज्ञानदृश्याय अक्षराय क्षराय च । (९६।१)

एष देवः संचरति सर्वत्रगतिर् अव्ययः ॥ (९६।२)

एवम् एतत् पुरा दृष्टं मया वै ज्ञानचक्षुषा । (९७।१)

कथितं तच्च वः सर्वं मया पृष्टेन तत्त्वतः ॥ (९७।२)

क्रियतां मद्वचः शिष्याः सेव्यतां हरिर् ईश्वरः । (९८।१)

गीयतां वेदशब्दैश्च पूज्यतां च यथाविधि ॥ (९८।२)

वैशंपायन उवाच । (९९।१)

इत्युक्तास्तु वयं तेन वेदव्यासेन धीमता । (९९।२)

सर्वे शिष्याः सुतश्चास्य शुकः परमधर्मवित् ॥ (९९।३)

स चास्माकम् उपाध्यायः सहास्माभिर् विशां पते । (१००।१)

चतुर्वेदोद्गताभिश्च ऋग्भिस्तम् अभितुष्टुवे ॥ (१००।२)

एतत् ते सर्वम् आख्यातं यन्मां त्वं परिपृच्छसि । (१०१।१)

एवं मे ऽकथयद् राजन् पुरा द्वैपायनो गुरुः ॥ (१०१।२)

यश्चेदं शृणुयान्नित्यं यश्चेदं परिकीर्तयेत् । (१०२।१)

नमो भगवते कृत्वा समाहितमना नरः ॥ (१०२।२)

भवत्यरोगो द्युतिमान् बलरूपसमन्वितः । (१०३।१)

आतुरो मुच्यते रोगाद् बद्धो मुच्येत बन्धनात् ॥ (१०३।२)

कामकामी लभेत् कामं दीर्घम् आयुर् अवाप्नुयात् । (१०४।१)

ब्राह्मणः सर्ववेदी स्यात् क्षत्रियो विजयी भवेत् । (१०४।२)

वैश्यो विपुललाभः स्याच्छूद्रः सुखम् अवाप्नुयात् ॥ (१०४।३)

अपुत्रो लभते पुत्रं कन्या चैवेप्सितं पतिम् । (१०५।१)

लग्नगर्भा विमुच्येत गर्भिणी जनयेत् सुतम् । (१०५।२)

वन्ध्या प्रसवम् आप्नोति पुत्रपौत्रसमृद्धिमत् ॥ (१०५।३)

क्षेमेण गच्छेद् अध्वानम् इदं यः पठते पथि । (१०६।१)

यो यं कामं कामयते स तम् आप्नोति च ध्रुवम् ॥ (१०६।२)

इदं महर्षेर् वचनं विनिश्चितं महात्मनः पुरुषवरस्य कीर्तनम् । (१०७।१)

समागमं चर्षिदिवौकसाम् इमं निशम्य भक्ताः सुसुखं लभन्ते ॥ (१०७।२)