लोमश उवाच । (१।१)

ततो जगाम कौरव्य सो ऽगस्त्यो भिक्षितुं वसु । (१।२)

श्रुतर्वाणं महीपालं यं वेदाभ्यधिकं नृपैः ॥ (१।३)

स विदित्वा तु नृपतिः कुम्भयोनिम् उपागमत् । (२।१)

विषयान्ते सहामात्यः प्रत्यगृह्णात् सुसत्कृतम् ॥ (२।२)

तस्मै चार्घ्यं यथान्यायम् आनीय पृथिवीपतिः । (३।१)

प्राञ्जलिः प्रयतो भूत्वा पप्रच्छागमने ऽर्थिताम् ॥ (३।२)

अगस्त्य उवाच । (४।१)

वित्तार्थिनम् अनुप्राप्तं विद्धि मां पृथिवीपते । (४।२)

यथाशक्त्यविहिंस्यान्यान् संविभागं प्रयच्छ मे ॥ (४।३)

लोमश उवाच । (५।१)

तत आयव्ययौ पूर्णौ तस्मै राजा न्यवेदयत् । (५।२)

अतो विद्वन्न् उपादत्स्व यद् अत्र वसु मन्यसे ॥ (५।३)

तत आयव्ययौ दृष्ट्वा समौ सममतिर् द्विजः । (६।१)

सर्वथा प्राणिनां पीडाम् उपादानाद् अमन्यत ॥ (६।२)

स श्रुतर्वाणम् आदाय वध्र्यश्वम् अगमत् ततः । (७।१)

स च तौ विषयस्यान्ते प्रत्यगृह्णाद् यथाविधि ॥ (७।२)

तयोर् अर्घ्यं च पाद्यं च वध्र्यश्वः प्रत्यवेदयत् । (८।१)

अनुज्ञाप्य च पप्रच्छ प्रयोजनम् उपक्रमे ॥ (८।२)

अगस्त्य उवाच । (९।१)

वित्तकामाविह प्राप्तौ विद्ध्यावां पृथिवीपते । (९।२)

यथाशक्त्यविहिंस्यान्यान् संविभागं प्रयच्छ नौ ॥ (९।३)

लोमश उवाच । (१०।१)

तत आयव्ययौ पूर्णौ ताभ्यां राजा न्यवेदयत् । (१०।२)

ततो ज्ञात्वा समादत्तां यद् अत्र व्यतिरिच्यते ॥ (१०।३)

तत आयव्ययौ दृष्ट्वा समौ सममतिर् द्विजः । (११।१)

सर्वथा प्राणिनां पीडाम् उपादानाद् अमन्यत ॥ (११।२)

पौरुकुत्सं ततो जग्मुस् त्रसदस्युं महाधनम् । (१२।१)

अगस्त्यश् च श्रुतर्वा च वध्र्यश्वश् च महीपतिः ॥ (१२।२)

त्रसदस्युश् च तान् सर्वान् प्रत्यगृह्णाद् यथाविधि । (१३।१)

अभिगम्य महाराज विषयान्ते सवाहनः ॥ (१३।२)

अर्चयित्वा यथान्यायम् इक्ष्वाकू राजसत्तमः । (१४।१)

समाश्वस्तांस् ततो ऽपृच्छत् प्रयोजनम् उपक्रमे ॥ (१४।२)

अगस्त्य उवाच । (१५।१)

वित्तकामान् इह प्राप्तान् विद्धि नः पृथिवीपते । (१५।२)

यथाशक्त्यविहिंस्यान्यान् संविभागं प्रयच्छ नः ॥ (१५।३)

लोमश उवाच । (१६।१)

तत आयव्ययौ पूर्णौ तेषां राजा न्यवेदयत् । (१६।२)

अतो ज्ञात्वा समादद्ध्वं यद् अत्र व्यतिरिच्यते ॥ (१६।३)

तत आयव्ययौ दृष्ट्वा समौ सममतिर् द्विजः । (१७।१)

सर्वथा प्राणिनां पीडाम् उपादानाद् अमन्यत ॥ (१७।२)

ततः सर्वे समेत्याथ ते नृपास् तं महामुनिम् । (१८।१)

इदम् ऊचुर् महाराज समवेक्ष्य परस्परम् ॥ (१८।२)

अयं वै दानवो ब्रह्मन्न् इल्वलो वसुमान् भुवि । (१९।१)

तम् अभिक्रम्य सर्वे ऽद्य वयं याचामहे वसु ॥ (१९।२)

तेषां तदासीद् रुचितम् इल्वलस्योपभिक्षणम् । (२०।१)

ततस् ते सहिता राजन्न् इल्वलं समुपाद्रवन् ॥ (२०।२)