युधिष्ठिर उवाच । (१।१)

आमन्त्रयामि भरतांस्तथा वृद्धं पितामहम् । (१।२)

राजानं सोमदत्तं च महाराजं च बाह्लिकम् ॥ (१।३)

द्रोणं कृपं नृपांश्चान्यान् अश्वत्थामानम् एव च । (२।१)

विदुरं धृतराष्ट्रं च धार्तराष्ट्रांश्च सर्वशः ॥ (२।२)

युयुत्सुं संजयं चैव तथैवान्यान् सभासदः । (३।१)

सर्वान् आमन्त्र्य गच्छामि द्रष्टास्मि पुनर् एत्य वः ॥ (३।२)

वैशंपायन उवाच । (४।१)

न च किंचित् तदोचुस्ते ह्रिया सन्तो युधिष्ठिरम् । (४।२)

मनोभिर् एव कल्याणं दध्युस्ते तस्य धीमतः ॥ (४।३)

विदुर उवाच । (५।१)

आर्या पृथा राजपुत्री नारण्यं गन्तुम् अर्हति । (५।२)

सुकुमारी च वृद्धा च नित्यं चैव सुखोचिता ॥ (५।३)

इह वत्स्यति कल्याणी सत्कृता मम वेश्मनि । (६।१)

इति पार्था विजानीध्वम् अगदं वो ऽस्तु सर्वशः ॥ (६।२)

युधिष्ठिर विजानीहि ममेदं भरतर्षभ । (७।१)

नाधर्मेण जितः कश्चिद् व्यथते वै पराजयात् ॥ (७।२)

त्वं वै धर्मान् विजानीषे युधां वेत्ता धनंजयः । (८।१)

हन्तारीणां भीमसेनो नकुलस्त्वर्थसंग्रही ॥ (८।२)

संयन्ता सहदेवस्तु धौम्यो ब्रह्मविदुत्तमः । (९।१)

धर्मार्थकुशला चैव द्रौपदी धर्मचारिणी ॥ (९।२)

अन्योन्यस्य प्रियाः सर्वे तथैव प्रियवादिनः । (१०।१)

परैर् अभेद्याः संतुष्टाः को वो न स्पृहयेद् इह ॥ (१०।२)

एष वै सर्वकल्याणः समाधिस्तव भारत । (११।१)

नैनं शत्रुर् विषहते शक्रेणापि समो ऽच्युत ॥ (११।२)

हिमवत्यनुशिष्टो ऽसि मेरुसावर्णिना पुरा । (१२।१)

द्वैपायनेन कृष्णेन नगरे वारणावते ॥ (१२।२)

भृगुतुङ्गे च रामेण दृषद्वत्यां च शंभुना । (१३।१)

अश्रौषीर् असितस्यापि महर्षेर् अञ्जनं प्रति ॥ (१३।२)

द्रष्टा सदा नारदस्य धौम्यस्ते ऽयं पुरोहितः । (१४।१)

मा हार्षीः सांपराये त्वं बुद्धिं ताम् ऋषिपूजिताम् ॥ (१४।२)

पुरूरवसम् ऐलं त्वं बुद्ध्या जयसि पाण्डव । (१५।१)

शक्त्या जयसि राज्ञो ऽन्यान् ऋषीन् धर्मोपसेवया ॥ (१५।२)

ऐन्द्रे जये धृतमना याम्ये कोपविधारणे । (१६।१)

विसर्गे चैव कौबेरे वारुणे चैव संयमे ॥ (१६।२)

आत्मप्रदानं सौम्यत्वम् अद्भ्यश्चैवोपजीवनम् । (१७।१)

भूमेः क्षमा च तेजश्च समग्रं सूर्यमण्डलात् ॥ (१७।२)

वायोर् बलं विद्धि स त्वं भूतेभ्यश्चात्मसंभवम् । (१८।१)

अगदं वो ऽस्तु भद्रं वो द्रक्ष्यामि पुनरागतान् ॥ (१८।२)

आपद्धर्मार्थकृच्छ्रेषु सर्वकार्येषु वा पुनः । (१९।१)

यथावत् प्रतिपद्येथाः काले काले युधिष्ठिर ॥ (१९।२)

आपृष्टो ऽसीह कौन्तेय स्वस्ति प्राप्नुहि भारत । (२०।१)

कृतार्थं स्वस्तिमन्तं त्वां द्रक्ष्यामः पुनरागतम् ॥ (२०।२)

वैशंपायन उवाच । (२१।१)

एवम् उक्तस्तथेत्युक्त्वा पाण्डवः सत्यविक्रमः । (२१।२)

भीष्मद्रोणौ नमस्कृत्य प्रातिष्ठत युधिष्ठिरः ॥ (२१।३)