युधिष्ठिर उवाच । (१।१)

सूक्ष्मं साधु समादिष्टं भवता धर्मलक्षणम् । (१।२)

प्रतिभा त्वस्ति मे काचित् तां ब्रूयाम् अनुमानतः ॥ (१।३)

भूयांसो हृदये ये मे प्रश्नास्ते व्याहृतास्त्वया । (२।१)

इमम् अन्यं प्रवक्ष्यामि न राजन् विग्रहाद् इव ॥ (२।२)

इमानि हि प्रापयन्ति सृजन्त्युत्तारयन्ति च । (३।१)

न धर्मः परिपाठेन शक्यो भारत वेदितुम् ॥ (३।२)

अन्यो धर्मः समस्थस्य विषमस्थस्य चापरः । (४।१)

आपदस्तु कथं शक्याः परिपाठेन वेदितुम् ॥ (४।२)

सदाचारो मतो धर्मः सन्तस्त्वाचारलक्षणाः । (५।१)

साध्यासाध्यं कथं शक्यं सदाचारो ह्यलक्षणम् ॥ (५।२)

दृश्यते धर्मरूपेण अधर्मं प्राकृतश्चरन् । (६।१)

धर्मं चाधर्मरूपेण कश्चिद् अप्राकृतश्चरन् ॥ (६।२)

पुनर् अस्य प्रमाणं हि निर्दिष्टं शास्त्रकोविदैः । (७।१)

वेदवादाश्चानुयुगं ह्रसन्तीति ह नः श्रुतम् ॥ (७।२)

अन्ये कृतयुगे धर्मास्त्रेतायां द्वापरे ऽपरे । (८।१)

अन्ये कलियुगे धर्मा यथाशक्तिकृता इव ॥ (८।२)

आम्नायवचनं सत्यम् इत्ययं लोकसंग्रहः । (९।१)

आम्नायेभ्यः परं वेदाः प्रसृता विश्वतोमुखाः ॥ (९।२)

ते चेत् सर्वे प्रमाणं वै प्रमाणं तन्न विद्यते । (१०।१)

प्रमाणे चाप्रमाणे च विरुद्धे शास्त्रता कुतः ॥ (१०।२)

धर्मस्य ह्रियमाणस्य बलवद्भिर् दुरात्मभिः । (११।१)

या या विक्रियते संस्था ततः सापि प्रणश्यति ॥ (११।२)

विद्म चैवं न वा विद्म शक्यं वा वेदितुं न वा । (१२।१)

अणीयान् क्षुरधाराया गरीयान् पर्वताद् अपि ॥ (१२।२)

गन्धर्वनगराकारः प्रथमं सम्प्रदृश्यते । (१३।१)

अन्वीक्ष्यमाणः कविभिः पुनर् गच्छत्यदर्शनम् ॥ (१३।२)

निपानानीव गोऽभ्याशे क्षेत्रे कुल्येव भारत । (१४।१)

स्मृतो ऽपि शाश्वतो धर्मो विप्रहीणो न दृश्यते ॥ (१४।२)

कामाद् अन्ये क्षयाद् अन्ये कारणैर् अपरैस्तथा । (१५।१)

असन्तो हि वृथाचारं भजन्ते बहवो ऽपरे ॥ (१५।२)

धर्मो भवति स क्षिप्रं विलीनस्त्वेव साधुषु । (१६।१)

अन्ये तान् आहुर् उन्मत्तान् अपि चावहसन्त्युत ॥ (१६।२)

महाजना ह्युपावृत्ता राजधर्मं समाश्रिताः । (१७।१)

न हि सर्वहितः कश्चिद् आचारः सम्प्रदृश्यते ॥ (१७।२)

तेनैवान्यः प्रभवति सो ऽपरं बाधते पुनः । (१८।१)

दृश्यते चैव स पुनस्तुल्यरूपो यदृच्छया ॥ (१८।२)

येनैवान्यः प्रभवति सो ऽपरान् अपि बाधते । (१९।१)

आचाराणाम् अनैकाग्र्यं सर्वेषाम् एव लक्षयेत् ॥ (१९।२)

चिराभिपन्नः कविभिः पूर्वं धर्म उदाहृतः । (२०।१)

तेनाचारेण पूर्वेण संस्था भवति शाश्वती ॥ (२०।२)