वैशम्पायन उवाच । (१।१)

तस्यां रजन्यां व्युष्टायां धर्मराजो युधिष्ठिरः । (१।२)

उत्थायावश्यकार्याणि कृतवान् भ्रातृभिः सह ॥ (१।३)

ततः संचोदयामास सो ऽर्जुनं भ्रातृनन्दनम् । (२।१)

दर्शयास्त्राणि कौन्तेय यैर् जिता दानवास्त्वया ॥ (२।२)

ततो धनंजयो राजन् देवैर् दत्तानि पाण्डवः । (३।१)

अस्त्राणि तानि दिव्यानि दर्शयामास भारत ॥ (३।२)

यथान्यायं महातेजाः शौचं परमम् आस्थितः । (४।१)

गिरिकूबरं पादपाङ्गं शुभवेणु त्रिवेणुकम् । (४।२)

पार्थिवं रथम् आस्थाय शोभमानो धनंजयः ॥ (४।३)

ततः सुदंशितस्तेन कवचेन सुवर्चसा । (५।१)

धनुर् आदाय गाण्डीवं देवदत्तं च वारिजम् ॥ (५।२)

शोशुभ्यमानः कौन्तेय आनुपूर्व्यान् महाभुजः । (६।१)

अस्त्राणि तानि दिव्यानि दर्शनायोपचक्रमे ॥ (६।२)

अथ प्रयोक्ष्यमाणेन दिव्यान्यस्त्राणि तेन वै । (७।१)

समाक्रान्ता मही पद्भ्यां समकम्पत सद्रुमा ॥ (७।२)

क्षुभिताः सरितश् चैव तथैव च महोदधिः । (८।१)

शैलाश्चापि व्यशीर्यन्त न ववौ च समीरणः ॥ (८।२)

न बभासे सहस्रांशुर् न जज्वाल च पावकः । (९।१)

न वेदाः प्रतिभान्ति स्म द्विजातीनां कथंचन ॥ (९।२)

अन्तर्भूमिगता ये च प्राणिनो जनमेजय । (१०।१)

पीड्यमानाः समुत्थाय पाण्डवं पर्यवारयन् ॥ (१०।२)

वेपमानाः प्राञ्जलयस् ते सर्वे पिहिताननाः । (११।१)

दह्यमानास् तदास्त्रैस् तैर् याचन्ति स्म धनंजयम् ॥ (११।२)

ततो ब्रह्मर्षयश्चैव सिद्धाश्चैव सुरर्षयः । (१२।१)

जङ्गमानि च भूतानि सर्वाण्येवावतस्थिरे ॥ (१२।२)

राजर्षयश्च प्रवरास् तथैव च दिवौकसः । (१३।१)

यक्षराक्षसगन्धर्वास् तथैव च पतत्रिणः ॥ (१३।२)

ततः पितामहश् चैव लोकपालाश् च सर्वशः । (१४।१)

भगवांश्च महादेवः सगणो ऽभ्याययौ तदा ॥ (१४।२)

ततो वायुर् महाराज दिव्यैर् माल्यैः सुगन्धिभिः । (१५।१)

अभितः पाण्डवांश्चित्रैर् अवचक्रे समन्ततः ॥ (१५।२)

जगुश्च गाथा विविधा गन्धर्वाः सुरचोदिताः । (१६।१)

ननृतुः संघशश् चैव राजन्न् अप्सरसां गणाः ॥ (१६।२)

तस्मिंस् तु तुमुले काले नारदः सुरचोदितः । (१७।१)

आगम्याह वचः पार्थं श्रवणीयम् इदं नृप ॥ (१७।२)

अर्जुनार्जुन मा युङ्क्ष्व दिव्यान्यस्त्राणि भारत । (१८।१)

नैतानि निरधिष्ठाने प्रयुज्यन्ते कदाचन ॥ (१८।२)

अधिष्ठाने न वानार्तः प्रयुञ्जीत कदाचन । (१९।१)

प्रयोगे सुमहान् दोषो ह्यस्त्राणां कुरुनन्दन ॥ (१९।२)

एतानि रक्ष्यमाणानि धनंजय यथागमम् । (२०।१)

बलवन्ति सुखार्हाणि भविष्यन्ति न संशयः ॥ (२०।२)

अरक्ष्यमाणान्येतानि त्रैलोक्यस्यापि पाण्डव । (२१।१)

भवन्ति स्म विनाशाय मैवं भूयः कृथाः क्वचित् ॥ (२१।२)

अजातशत्रो त्वं चैव द्रक्ष्यसे तानि संयुगे । (२२।१)

योज्यमानानि पार्थेन द्विषताम् अवमर्दने ॥ (२२।२)

निवार्याथ ततः पार्थं सर्वे देवा यथागतम् । (२३।१)

जग्मुर् अन्ये च ये तत्र समाजग्मुर् नरर्षभ ॥ (२३।२)

तेषु सर्वेषु कौरव्य प्रतियातेषु पाण्डवाः । (२४।१)

तस्मिन्न् एव वने हृष्टास् त ऊषुः सह कृष्णया ॥ (२४।२)