धौम्य उवाच । (१।१)

दक्षिणस्यां तु पुण्यानि शृणु तीर्थानि भारत । (१।२)

विस्तरेण यथाबुद्धि कीर्त्यमानानि भारत ॥ (१।३)

यस्याम् आख्यायते पुण्या दिशि गोदावरी नदी । (२।१)

बह्वारामा बहुजला तापसाचरिता शुभा ॥ (२।२)

वेण्णा भीमरथी चोभे नद्यौ पापभयापहे । (३।१)

मृगद्विजसमाकीर्णे तापसालयभूषिते ॥ (३।२)

राजर्षेस् तत्र च सरिन्नृगस्य भरतर्षभ । (४।१)

रम्यतीर्था बहुजला पयोष्णी द्विजसेविता ॥ (४।२)

अपि चात्र महायोगी मार्कण्डेयो महातपाः । (५।१)

अनुवंश्यां जगौ गाथां नृगस्य धरणीपतेः ॥ (५।२)

नृगस्य यजमानस्य प्रत्यक्षम् इति नः श्रुतम् । (६।१)

अमाद्यद् इन्द्रः सोमेन दक्षिणाभिर् द्विजातयः ॥ (६।२)

माठरस्य वनं पुण्यं बहुमूलफलं शिवम् । (७।१)

यूपश् च भरतश्रेष्ठ वरुणस्रोतसे गिरौ ॥ (७।२)

प्रवेण्युत्तरपार्श्वे तु पुण्ये कण्वाश्रमे तथा । (८।१)

तापसानाम् अरण्यानि कीर्तितानि यथाश्रुति ॥ (८।२)

वेदी शूर्पारके तात जमदग्नेर् महात्मनः । (९।१)

रम्या पाषाणतीर्था च पुरश्चन्द्रा च भारत ॥ (९।२)

अशोकतीर्थं मर्त्येषु कौन्तेय बहुलाश्रमम् । (१०।१)

अगस्त्यतीर्थं पाण्ड्येषु वारुणं च युधिष्ठिर ॥ (१०।२)

कुमार्यः कथिताः पुण्याः पाण्ड्येष्वेव नरर्षभ । (११।१)

ताम्रपर्णीं तु कौन्तेय कीर्तयिष्यामि तां शृणु ॥ (११।२)

यत्र देवैस् तपस् तप्तं महद् इच्छद्भिर् आश्रमे । (१२।१)

गोकर्णम् इति विख्यातं त्रिषु लोकेषु भारत ॥ (१२।२)

शीततोयो बहुजलः पुण्यस् तात शिवश् च सः । (१३।१)

ह्रदः परमदुष्प्रापो मानुषैर् अकृतात्मभिः ॥ (१३।२)

तत्रैव तृणसोमाग्नेः सम्पन्नफलमूलवान् । (१४।१)

आश्रमो ऽगस्त्यशिष्यस्य पुण्यो देवसभे गिरौ ॥ (१४।२)

वैडूर्यपर्वतस् तत्र श्रीमान् मणिमयः शिवः । (१५।१)

अगस्त्यस्याश्रमश् चैव बहुमूलफलोदकः ॥ (१५।२)

सुराष्ट्रेष्वपि वक्ष्यामि पुण्यान्यायतनानि च । (१६।१)

आश्रमान् सरितः शैलान् सरांसि च नराधिप ॥ (१६।२)

चमसोन्मज्जनं विप्रास् तत्रापि कथयन्त्युत । (१७।१)

प्रभासं चोदधौ तीर्थं त्रिदशानां युधिष्ठिर ॥ (१७।२)

तत्र पिण्डारकं नाम तापसाचरितं शुभम् । (१८।१)

उज्जयन्तश् च शिखरी क्षिप्रं सिद्धिकरो महान् ॥ (१८।२)

तत्र देवर्षिवर्येण नारदेनानुकीर्तितः । (१९।१)

पुराणः श्रूयते श्लोकस् तं निबोध युधिष्ठिर ॥ (१९।२)

पुण्ये गिरौ सुराष्ट्रेषु मृगपक्षिनिषेविते । (२०।१)

उज्जयन्ते स्म तप्ताङ्गो नाकपृष्ठे महीयते ॥ (२०।२)

पुण्या द्वारवती तत्र यत्रास्ते मधुसूदनः । (२१।१)

साक्षाद् देवः पुराणो ऽसौ स हि धर्मः सनातनः ॥ (२१।२)

ये च वेदविदो विप्रा ये चाध्यात्मविदो जनाः । (२२।१)

ते वदन्ति महात्मानं कृष्णं धर्मं सनातनम् ॥ (२२।२)

पवित्राणां हि गोविन्दः पवित्रं परम् उच्यते । (२३।१)

पुण्यानाम् अपि पुण्यो ऽसौ मङ्गलानां च मङ्गलम् ॥ (२३।२)

त्रैलोक्यं पुण्डरीकाक्षो देवदेवः सनातनः । (२४।१)

आस्ते हरिर् अचिन्त्यात्मा तत्रैव मधुसूदनः ॥ (२४।२)