धृतराष्ट्र उवाच । (१।१)

भारतस्यास्य वर्षस्य तथा हैमवतस्य च । (१।२)

प्रमाणम् आयुषः सूत फलं चापि शुभाशुभम् ॥ (१।३)

अनागतम् अतिक्रान्तं वर्तमानं च संजय । (२।१)

आचक्ष्व मे विस्तरेण हरिवर्षं तथैव च ॥ (२।२)

संजय उवाच । (३।१)

चत्वारि भारते वर्षे युगानि भरतर्षभ । (३।२)

कृतं त्रेता द्वापरं च पुष्यं च कुरुवर्धन ॥ (३।३)

पूर्वं कृतयुगं नाम ततस्त्रेतायुगं विभो । (४।१)

संक्षेपाद् द्वापरस्याथ ततः पुष्यं प्रवर्तते ॥ (४।२)

चत्वारि च सहस्राणि वर्षाणां कुरुसत्तम । (५।१)

आयुःसंख्या कृतयुगे संख्याता राजसत्तम ॥ (५।२)

तथा त्रीणि सहस्राणि त्रेतायां मनुजाधिप । (६।१)

द्विसहस्रं द्वापरे तु शते तिष्ठति संप्रति ॥ (६।२)

न प्रमाणस्थितिर् ह्यस्ति पुष्ये ऽस्मिन् भरतर्षभ । (७।१)

गर्भस्थाश्च म्रियन्ते ऽत्र तथा जाता म्रियन्ति च ॥ (७।२)

महाबला महासत्त्वाः प्रजागुणसमन्विताः । (८।१)

अजायन्त कृते राजन्मुनयः सुतपोधनाः ॥ (८।२)

महोत्साहा महात्मानो धार्मिकाः सत्यवादिनः । (९।१)

जाताः कृतयुगे राजन् धनिनः प्रियदर्शनाः ॥ (९।२)

आयुष्मन्तो महावीरा धनुर्धरवरा युधि । (१०।१)

जायन्ते क्षत्रियाः शूरास्त्रेतायां चक्रवर्तिनः ॥ (१०।२)

सर्ववर्णा महाराज जायन्ते द्वापरे सति । (११।१)

महोत्साहा महावीर्याः परस्परवधैषिणः ॥ (११।२)

तेजसाल्पेन संयुक्ताः क्रोधनाः पुरुषा नृप । (१२।१)

लुब्धाश्चानृतकाश्चैव पुष्ये जायन्ति भारत ॥ (१२।२)

ईर्ष्या मानस्तथा क्रोधो मायासूया तथैव च । (१३।१)

पुष्ये भवन्ति मर्त्यानां रागो लोभश्च भारत ॥ (१३।२)

संक्षेपो वर्तते राजन् द्वापरे ऽस्मिन्नराधिप । (१४।१)

गुणोत्तरं हैमवतं हरिवर्षं ततः परम् ॥ (१४।२)