भीष्म उवाच । (१।१)

तथा विधौ प्रवृत्ते तु सर्व एव महर्षयः । (१।२)

पितृयज्ञान् अकुर्वन्त विधिदृष्टेन कर्मणा ॥ (१।३)

ऋषयो धर्मनित्यास्तु कृत्वा निवपनान्युत । (२।१)

तर्पणं चाप्यकुर्वन्त तीर्थाम्भोभिर् यतव्रताः ॥ (२।२)

निवापैर् दीयमानैश्च चातुर्वर्ण्येन भारत । (३।१)

तर्पिताः पितरो देवास्ते नान्नं जरयन्ति वै ॥ (३।२)

अजीर्णेनाभिहन्यन्ते ते देवाः पितृभिः सह । (४।१)

सोमम् एवाभ्यपद्यन्त निवापान्नाभिपीडिताः ॥ (४।२)

ते ऽब्रुवन् सोमम् आसाद्य पितरो ऽजीर्णपीडिताः । (५।१)

निवापान्नेन पीड्यामः श्रेयो नो ऽत्र विधीयताम् ॥ (५।२)

तान् सोमः प्रत्युवाचाथ श्रेयश्चेद् ईप्सितं सुराः । (६।१)

स्वयंभूसदनं यात स वः श्रेयो विधास्यति ॥ (६।२)

ते सोमवचनाद् देवाः पितृभिः सह भारत । (७।१)

मेरुशृङ्गे समासीनं पितामहम् उपागमन् ॥ (७।२)

पितर ऊचुः । (८।१)

निवापान्नेन भगवन् भृशं पीड्यामहे वयम् । (८।२)

प्रसादं कुरु नो देव श्रेयो नः संविधीयताम् ॥ (८।३)

इति तेषां वचः श्रुत्वा स्वयंभूर् इदम् अब्रवीत् । (९।१)

एष मे पार्श्वतो वह्निर् युष्मच्छ्रेयो विधास्यति ॥ (९।२)

अग्निर् उवाच । (१०।१)

सहितास्तात भोक्ष्यामो निवापे समुपस्थिते । (१०।२)

जरयिष्यथ चाप्यन्नं मया सार्धं न संशयः ॥ (१०।३)

एतच्छ्रुत्वा तु पितरस्ततस्ते विज्वराभवन् । (११।१)

एतस्मात् कारणाच्चाग्नेः प्राक्तनं दीयते नृप ॥ (११।२)

निवप्ते चाग्निपूर्वे वै निवापे पुरुषर्षभ । (१२।१)

न ब्रह्मराक्षसास्तं वै निवापं धर्षयन्त्युत । (१२।२)

रक्षांसि चापवर्तन्ते स्थिते देवे विभावसौ ॥ (१२।३)

पूर्वं पिण्डं पितुर् दद्यात् ततो दद्यात् पितामहे । (१३।१)

प्रपितामहाय च तत एष श्राद्धविधिः स्मृतः ॥ (१३।२)

ब्रूयाच्छ्राद्धे च सावित्रीं पिण्डे पिण्डे समाहितः । (१४।१)

सोमायेति च वक्तव्यं तथा पितृमतेति च ॥ (१४।२)

रजस्वला च या नारी व्यङ्गिता कर्णयोश्च या । (१५।१)

निवापे नोपतिष्ठेत संग्राह्या नान्यवंशजाः ॥ (१५।२)

जलं प्रतरमाणश्च कीर्तयेत पितामहान् । (१६।१)

नदीम् आसाद्य कुर्वीत पितॄणां पिण्डतर्पणम् ॥ (१६।२)

पूर्वं स्ववंशजानां तु कृत्वाद्भिस्तर्पणं पुनः । (१७।१)

सुहृत्संबन्धिवर्गाणां ततो दद्याज्जलाञ्जलिम् ॥ (१७।२)

कल्माषगोयुगेनाथ युक्तेन तरतो जलम् । (१८।१)

पितरो ऽभिलषन्ते वै नावं चाप्यधिरोहतः । (१८।२)

सदा नावि जलं तज्ज्ञाः प्रयच्छन्ति समाहिताः ॥ (१८।३)

मासार्धे कृष्णपक्षस्य कुर्यान्निवपनानि वै । (१९।१)

पुष्टिर् आयुस्तथा वीर्यं श्रीश्चैव पितृवर्तिनः ॥ (१९।२)

पितामहः पुलस्त्यश्च वसिष्ठः पुलहस्तथा । (२०।१)

अङ्गिराश्च क्रतुश्चैव कश्यपश्च महान् ऋषिः । (२०।२)

एते कुरुकुलश्रेष्ठ महायोगेश्वराः स्मृताः ॥ (२०।३)

एते च पितरो राजन्न् एष श्राद्धविधिः परः । (२१।१)

प्रेतास्तु पिण्डसंबन्धान्मुच्यन्ते तेन कर्मणा ॥ (२१।२)

इत्येषा पुरुषश्रेष्ठ श्राद्धोत्पत्तिर् यथागमम् । (२२।१)

ख्यापिता पूर्वनिर्दिष्टा दानं वक्ष्याम्यतः परम् ॥ (२२।२)