युधिष्ठिर उवाच । (१।१)

भीमसेन यमौ चोभौ पाञ्चालि च निबोधत । (१।२)

नास्ति भूतस्य नाशो वै पश्यतास्मान् वनेचरान् ॥ (१।३)

दुर्बलाः क्लेशिताः स्मेति यद् ब्रवीथेतरेतरम् । (२।१)

अशक्ये ऽपि व्रजामेति धनंजयदिदृक्षया ॥ (२।२)

तन् मे दहति गात्राणि तूलराशिम् इवानलः । (३।१)

यच्च वीरं न पश्यामि धनंजयम् उपान्तिके ॥ (३।२)

तस्य दर्शनतृष्णं मां सानुजं वनम् आस्थितम् । (४।१)

याज्ञसेन्याः परामर्शः स च वीर दहत्युत ॥ (४।२)

नकुलात् पूर्वजं पार्थं न पश्याम्यमितौजसम् । (५।१)

अजेयम् उग्रधन्वानं तेन तप्ये वृकोदर ॥ (५।२)

तीर्थानि चैव रम्याणि वनानि च सरांसि च । (६।१)

चरामि सह युष्माभिस् तस्य दर्शनकाङ्क्षया ॥ (६।२)

पञ्च वर्षाण्यहं वीरं सत्यसंधं धनंजयम् । (७।१)

यन्न पश्यामि बीभत्सुं तेन तप्ये वृकोदर ॥ (७।२)

तं वै श्यामं गुडाकेशं सिंहविक्रान्तगामिनम् । (८।१)

न पश्यामि महाबाहुं तेन तप्ये वृकोदर ॥ (८।२)

कृतास्त्रं निपुणं युद्धे प्रतिमानं धनुष्मताम् । (९।१)

न पश्यामि नरश्रेष्ठं तेन तप्ये वृकोदर ॥ (९।२)

चरन्तम् अरिसंघेषु कालं क्रुद्धम् इवान्तकम् । (१०।१)

प्रभिन्नम् इव मातंगं सिंहस्कन्धं धनंजयम् ॥ (१०।२)

यः स शक्राद् अनवरो वीर्येण द्रविणेन च । (११।१)

यमयोः पूर्वजः पार्थः श्वेताश्वो ऽमितविक्रमः ॥ (११।२)

दुःखेन महताविष्टः स्वकृतेनानिवर्तिना । (१२।१)

अजेयम् उग्रधन्वानं तं न पश्यामि फल्गुनम् ॥ (१२।२)

सततं यः क्षमाशीलः क्षिप्यमाणो ऽप्यणीयसा । (१३।१)

ऋजुमार्गप्रपन्नस्य शर्मदाताभयस्य च ॥ (१३।२)

स तु जिह्मप्रवृत्तस्य माययाभिजिघांसतः । (१४।१)

अपि वज्रधरस्यापि भवेत् कालविषोपमः ॥ (१४।२)

शत्रोर् अपि प्रपन्नस्य सो ऽनृशंसः प्रतापवान् । (१५।१)

दाताभयस्य बीभत्सुर् अमितात्मा महाबलः ॥ (१५।२)

सर्वेषाम् आश्रयो ऽस्माकं रणे ऽरीणां प्रमर्दिता । (१६।१)

आहर्ता सर्वरत्नानां सर्वेषां नः सुखावहः ॥ (१६।२)

रत्नानि यस्य वीर्येण दिव्यान्यासन् पुरा मम । (१७।१)

बहूनि बहुजातानि यानि प्राप्तः सुयोधनः ॥ (१७।२)

यस्य बाहुबलाद् वीर सभा चासीत् पुरा मम । (१८।१)

सर्वरत्नमयी ख्याता त्रिषु लोकेषु पाण्डव ॥ (१८।२)

वासुदेवसमं वीर्ये कार्तवीर्यसमं युधि । (१९।१)

अजेयम् अजितं युद्धे तं न पश्यामि फल्गुनम् ॥ (१९।२)

संकर्षणं महावीर्यं त्वां च भीमापराजितम् । (२०।१)

अनुजातः स वीर्येण वासुदेवं च शत्रुहा ॥ (२०।२)

यस्य बाहुबले तुल्यः प्रभावे च पुरंदरः । (२१।१)

जवे वायुर् मुखे सोमः क्रोधे मृत्युः सनातनः ॥ (२१।२)

ते वयं तं नरव्याघ्रं सर्वे वीर दिदृक्षवः । (२२।१)

प्रवेक्ष्यामो महाबाहो पर्वतं गन्धमादनम् ॥ (२२।२)

विशाला बदरी यत्र नरनारायणाश्रमः । (२३।१)

तं सदाध्युषितं यक्षैर् द्रक्ष्यामो गिरिम् उत्तमम् ॥ (२३।२)

कुबेरनलिनीं रम्यां राक्षसैर् अभिरक्षिताम् । (२४।१)

पद्भिर् एव गमिष्यामस् तप्यमाना महत् तपः ॥ (२४।२)

नातप्ततपसा शक्यो देशो गन्तुं वृकोदर । (२५।१)

न नृशंसेन लुब्धेन नाप्रशान्तेन भारत ॥ (२५।२)

तत्र सर्वे गमिष्यामो भीमार्जुनपदैषिणः । (२६।१)

सायुधा बद्धनिस्त्रिंशाः सह विप्रैर् महाव्रतैः ॥ (२६।२)

मक्षिकान् मशकान् दंशान् व्याघ्रान् सिंहान् सरीसृपान् । (२७।१)

प्राप्नोत्यनियतः पार्थ नियतस् तान् न पश्यति ॥ (२७।२)

ते वयं नियतात्मानः पर्वतं गन्धमादनम् । (२८।१)

प्रवेक्ष्यामो मिताहारा धनंजयदिदृक्षवः ॥ (२८।२)