कण्व उवाच । (१।१)

मातलिस्तु व्रजन्मार्गे नारदेन महर्षिणा । (१।२)

वरुणं गच्छता द्रष्टुं समागच्छद् यदृच्छया ॥ (१।३)

नारदो ऽथाब्रवीद् एनं क्व भवान् गन्तुम् उद्यतः । (२।१)

स्वेन वा सूत कार्येण शासनाद् वा शतक्रतोः ॥ (२।२)

मातलिर् नारदेनैवं संपृष्टः पथि गच्छता । (३।१)

यथावत् सर्वम् आचष्ट स्वकार्यं वरुणं प्रति ॥ (३।२)

तम् उवाचाथ स मुनिर् गच्छावः सहिताविति । (४।१)

सलिलेशदिदृक्षार्थम् अहम् अप्युद्यतो दिवः ॥ (४।२)

अहं ते सर्वम् आख्यास्ये दर्शयन् वसुधातलम् । (५।१)

दृष्ट्वा तत्र वरं कंचिद् रोचयिष्याव मातले ॥ (५।२)

अवगाह्य ततो भूमिम् उभौ मातलिनारदौ । (६।१)

ददृशाते महात्मानौ लोकपालम् अपां पतिम् ॥ (६।२)

तत्र देवर्षिसदृशीं पूजां प्राप स नारदः । (७।१)

महेन्द्रसदृशीं चैव मातलिः प्रत्यपद्यत ॥ (७।२)

तावुभौ प्रीतमनसौ कार्यवत्तां निवेद्य ह । (८।१)

वरुणेनाभ्यनुज्ञातौ नागलोकं विचेरतुः ॥ (८।२)

नारदः सर्वभूतानाम् अन्तर्भूमिनिवासिनाम् । (९।१)

जानंश्चकार व्याख्यानं यन्तुः सर्वम् अशेषतः ॥ (९।२)

नारद उवाच । (१०।१)

दृष्टस्ते वरुणस्तात पुत्रपौत्रसमावृतः । (१०।२)

पश्योदकपतेः स्थानं सर्वतोभद्रम् ऋद्धिमत् ॥ (१०।३)

एष पुत्रो महाप्राज्ञो वरुणस्येह गोपतेः । (११।१)

एष तं शीलवृत्तेन शौचेन च विशिष्यते ॥ (११।२)

एषो ऽस्य पुत्रो ऽभिमतः पुष्करः पुष्करेक्षणः । (१२।१)

रूपवान् दर्शनीयश्च सोमपुत्र्या वृतः पतिः ॥ (१२।२)

ज्योत्स्नाकालीति याम् आहुर् द्वितीयां रूपतः श्रियम् । (१३।१)

आदित्यस्यैव गोः पुत्रो ज्येष्ठः पुत्रः कृतः स्मृतः ॥ (१३।२)

भवनं पश्य वारुण्या यद् एतत् सर्वकाञ्चनम् । (१४।१)

यां प्राप्य सुरतां प्राप्ताः सुराः सुरपतेः सखे ॥ (१४।२)

एतानि हृतराज्यानां दैतेयानां स्म मातले । (१५।१)

दीप्यमानानि दृश्यन्ते सर्वप्रहरणान्युत ॥ (१५।२)

अक्षयाणि किलैतानि विवर्तन्ते स्म मातले । (१६।१)

अनुभावप्रयुक्तानि सुरैर् अवजितानि ह ॥ (१६।२)

अत्र राक्षसजात्यश्च भूतजात्यश्च मातले । (१७।१)

दिव्यप्रहरणाश्चासन् पूर्वदैवतनिर्मिताः ॥ (१७।२)

अग्निर् एष महार्चिष्माञ् जागर्ति वरुणह्रदे । (१८।१)

वैष्णवं चक्रम् आविद्धं विधूमेन हविष्मता ॥ (१८।२)

एष गाण्डीमयश्चापो लोकसंहारसंभृतः । (१९।१)

रक्ष्यते दैवतैर् नित्यं यतस्तद् गाण्डिवं धनुः ॥ (१९।२)

एष कृत्ये समुत्पन्ने तत् तद् धारयते बलम् । (२०।१)

सहस्रशतसंख्येन प्राणेन सततं ध्रुवम् ॥ (२०।२)

अशास्यान् अपि शास्त्येष रक्षोबन्धुषु राजसु । (२१।१)

सृष्टः प्रथमजो दण्डो ब्रह्मणा ब्रह्मवादिना ॥ (२१।२)

एतच्छत्रं नरेन्द्राणां महच्छक्रेण भाषितम् । (२२।१)

पुत्राः सलिलराजस्य धारयन्ति महोदयम् ॥ (२२।२)

एतत् सलिलराजस्य छत्रं छत्रगृहे स्थितम् । (२३।१)

सर्वतः सलिलं शीतं जीमूत इव वर्षति ॥ (२३।२)

एतच्छत्रात् परिभ्रष्टं सलिलं सोमनिर्मलम् । (२४।१)

तमसा मूर्छितं याति येन नार्छति दर्शनम् ॥ (२४।२)

बहून्यद्भुतरूपाणि द्रष्टव्यानीह मातले । (२५।१)

तव कार्योपरोधस्तु तस्माद् गच्छाव माचिरम् ॥ (२५।२)