जनमेजय उवाच । (१।१)

युधिष्ठिरं सहानीकम् उपयान्तं युयुत्सया । (१।२)

संनिविष्टं कुरुक्षेत्रे वासुदेवेन पालितम् ॥ (१।३)

विराटद्रुपदाभ्यां च सपुत्राभ्यां समन्वितम् । (२।१)

केकयैर् वृष्णिभिश्चैव पार्थिवैः शतशो वृतम् ॥ (२।२)

महेन्द्रम् इव चादित्यैर् अभिगुप्तं महारथैः । (३।१)

श्रुत्वा दुर्योधनो राजा किं कार्यं प्रत्यपद्यत ॥ (३।२)

एतद् इच्छाम्यहं श्रोतुं विस्तरेण तपोधन । (४।१)

संभ्रमे तुमुले तस्मिन् यदासीत् कुरुजाङ्गले ॥ (४।२)

व्यथयेयुर् हि देवानां सेनाम् अपि समागमे । (५।१)

पाण्डवा वासुदेवश्च विराटद्रुपदौ तथा ॥ (५।२)

धृष्टद्युम्नश्च पाञ्चाल्यः शिखण्डी च महारथः । (६।१)

युयुधानश्च विक्रान्तो देवैर् अपि दुरासदः ॥ (६।२)

एतद् इच्छाम्यहं श्रोतुं विस्तरेण तपोधन । (७।१)

कुरूणां पाण्डवानां च यद् यद् आसीद् विचेष्टितम् ॥ (७।२)

वैशंपायन उवाच । (८।१)

प्रतियाते तु दाशार्हे राजा दुर्योधनस्तदा । (८।२)

कर्णं दुःशासनं चैव शकुनिं चाब्रवीद् इदम् ॥ (८।३)

अकृतेनैव कार्येण गतः पार्थान् अधोक्षजः । (९।१)

स एनान्मन्युनाविष्टो ध्रुवं वक्ष्यत्यसंशयम् ॥ (९।२)

इष्टो हि वासुदेवस्य पाण्डवैर् मम विग्रहः । (१०।१)

भीमसेनार्जुनौ चैव दाशार्हस्य मते स्थितौ ॥ (१०।२)

अजातशत्रुर् अप्यद्य भीमार्जुनवशानुगः । (११।१)

निकृतश्च मया पूर्वं सह सर्वैः सहोदरैः ॥ (११।२)

विराटद्रुपदौ चैव कृतवैरौ मया सह । (१२।१)

तौ च सेनाप्रणेतारौ वासुदेववशानुगौ ॥ (१२।२)

भविता विग्रहः सो ऽयं तुमुलो लोमहर्षणः । (१३।१)

तस्मात् सांग्रामिकं सर्वं कारयध्वम् अतन्द्रिताः ॥ (१३।२)

शिबिराणि कुरुक्षेत्रे क्रियन्तां वसुधाधिपाः । (१४।१)

सुपर्याप्तावकाशानि दुरादेयानि शत्रुभिः ॥ (१४।२)

आसन्नजलकाष्ठानि शतशो ऽथ सहस्रशः । (१५।१)

अच्छेद्याहारमार्गाणि रत्नोच्चयचितानि च । (१५।२)

विविधायुधपूर्णानि पताकाध्वजवन्ति च ॥ (१५।३)

समाश्च तेषां पन्थानः क्रियन्तां नगराद् बहिः । (१६।१)

प्रयाणं घुष्यताम् अद्य श्वोभूत इति माचिरम् ॥ (१६।२)

ते तथेति प्रतिज्ञाय श्वोभूते चक्रिरे तथा । (१७।१)

हृष्टरूपा महात्मानो विनाशाय महीक्षिताम् ॥ (१७।२)

ततस्ते पार्थिवाः सर्वे तच्छ्रुत्वा राजशासनम् । (१८।१)

आसनेभ्यो महार्हेभ्य उदतिष्ठन्न् अमर्षिताः ॥ (१८।२)

बाहून् परिघसंकाशान् संस्पृशन्तः शनैः शनैः । (१९।१)

काञ्चनाङ्गददीप्तांश्च चन्दनागरुभूषितान् ॥ (१९।२)

उष्णीषाणि नियच्छन्तः पुण्डरीकनिभैः करैः । (२०।१)

अन्तरीयोत्तरीयाणि भूषणानि च सर्वशः ॥ (२०।२)

ते रथान् रथिनः श्रेष्ठा हयांश्च हयकोविदाः । (२१।१)

सज्जयन्ति स्म नागांश्च नागशिक्षासु निष्ठिताः ॥ (२१।२)

अथ वर्माणि चित्राणि काञ्चनानि बहूनि च । (२२।१)

विविधानि च शस्त्राणि चक्रुः सज्जानि सर्वशः ॥ (२२।२)

पदातयश्च पुरुषाः शस्त्राणि विविधानि च । (२३।१)

उपजह्रुः शरीरेषु हेमचित्राण्यनेकशः ॥ (२३।२)

तद् उत्सव इवोदग्रं सम्प्रहृष्टनरावृतम् । (२४।१)

नगरं धार्तराष्ट्रस्य भारतासीत् समाकुलम् ॥ (२४।२)

जनौघसलिलावर्तो रथनागाश्वमीनवान् । (२५।१)

शङ्खदुन्दुभिनिर्घोषः कोशसंचयरत्नवान् ॥ (२५।२)

चित्राभरणवर्मोर्मिः शस्त्रनिर्मलफेनवान् । (२६।१)

प्रासादमालाद्रिवृतो रथ्यापणमहाह्रदः ॥ (२६।२)

योधचन्द्रोदयोद्भूतः कुरुराजमहार्णवः । (२७।१)

अदृश्यत तदा राजंश्चन्द्रोदय इवार्णवः ॥ (२७।२)