अतिथिर् उवाच । (१।१)

उपदेशं तु ते विप्र करिष्ये ऽहं यथागमम् । (१।२)

गुरुणा मे यथाख्यातम् अर्थतस्तच्च मे शृणु ॥ (१।३)

यत्र पूर्वाभिसर्गेण धर्मचक्रं प्रवर्तितम् । (२।१)

नैमिषे गोमतीतीरे तत्र नागाह्वयं पुरम् ॥ (२।२)

समग्रैस्त्रिदशैस्तत्र इष्टम् आसीद् द्विजर्षभ । (३।१)

यत्रेन्द्रातिक्रमं चक्रे मान्धाता राजसत्तमः ॥ (३।२)

कृताधिवासो धर्मात्मा तत्र चक्षुःश्रवा महान् । (४।१)

पद्मनाभो महाभागः पद्म इत्येव विश्रुतः ॥ (४।२)

स वाचा कर्मणा चैव मनसा च द्विजर्षभ । (५।१)

प्रसादयति भूतानि त्रिविधे वर्त्मनि स्थितः ॥ (५।२)

साम्ना दानेन भेदेन दण्डेनेति चतुर्विधम् । (६।१)

विषमस्थं जनं स्वं च चक्षुर्ध्यानेन रक्षति ॥ (६।२)

तम् अभिक्रम्य विधिना प्रष्टुम् अर्हसि काङ्क्षितम् । (७।१)

स ते परमकं धर्मं नमिथ्या दर्शयिष्यति ॥ (७।२)

स हि सर्वातिथिर् नागो बुद्धिशास्त्रविशारदः । (८।१)

गुणैर् अनवमैर् युक्तः समस्तैर् आभिकामिकैः ॥ (८।२)

प्रकृत्या नित्यसलिलो नित्यम् अध्ययने रतः । (९।१)

तपोदमाभ्यां संयुक्तो वृत्तेनानवरेण च ॥ (९।२)

यज्वा दानरुचिः क्षान्तो वृत्ते च परमे स्थितः । (१०।१)

सत्यवाग् अनसूयुश्च शीलवान् अभिसंश्रितः ॥ (१०।२)

शेषान्नभोक्ता वचनानुकूलो हितार्जवोत्कृष्टकृताकृतज्ञः । (११।१)

अवैरकृद् भूतहिते नियुक्तो गङ्गाह्रदाम्भो ऽभिजनोपपन्नः ॥ (११।२)