ब्राह्मण उवाच । (१।१)

अत्राप्युदाहरन्तीमम् इतिहासं पुरातनम् । (१।२)

चातुर्होत्रविधानस्य विधानम् इह यादृशम् ॥ (१।३)

तस्य सर्वस्य विधिवद् विधानम् उपदेक्ष्यते । (२।१)

शृणु मे गदतो भद्रे रहस्यम् इदम् उत्तमम् ॥ (२।२)

करणं कर्म कर्ता च मोक्ष इत्येव भामिनि । (३।१)

चत्वार एते होतारो यैर् इदं जगद् आवृतम् ॥ (३।२)

होतॄणां साधनं चैव शृणु सर्वम् अशेषतः । (४।१)

घ्राणं जिह्वा च चक्षुश्च त्वक् च श्रोत्रं च पञ्चमम् । (४।२)

मनो बुद्धिश्च सप्तैते विज्ञेया गुणहेतवः ॥ (४।३)

गन्धो रसश्च रूपं च शब्दः स्पर्शश्च पञ्चमः । (५।१)

मन्तव्यम् अथ बोद्धव्यं सप्तैते कर्महेतवः ॥ (५।२)

घ्राता भक्षयिता द्रष्टा स्प्रष्टा श्रोता च पञ्चमः । (६।१)

मन्ता बोद्धा च सप्तैते विज्ञेयाः कर्तृहेतवः ॥ (६।२)

स्वगुणं भक्षयन्त्येते गुणवन्तः शुभाशुभम् । (७।१)

अहं च निर्गुणो ऽत्रेति सप्तैते मोक्षहेतवः ॥ (७।२)

विदुषां बुध्यमानानां स्वं स्वं स्थानं यथाविधि । (८।१)

गुणास्ते देवताभूताः सततं भुञ्जते हविः ॥ (८।२)

अदन् ह्यविद्वान् अन्नानि ममत्वेनोपपद्यते । (९।१)

आत्मार्थं पाचयन्नित्यं ममत्वेनोपहन्यते ॥ (९।२)

अभक्ष्यभक्षणं चैव मद्यपानं च हन्ति तम् । (१०।१)

स चान्नं हन्ति तच्चान्नं स हत्वा हन्यते बुधः ॥ (१०।२)

अत्ता ह्यन्नम् इदं विद्वान् पुनर् जनयतीश्वरः । (११।१)

स चान्नाज्जायते तस्मिन् सूक्ष्मो नाम व्यतिक्रमः ॥ (११।२)

मनसा गम्यते यच्च यच्च वाचा निरुद्यते । (१२।१)

श्रोत्रेण श्रूयते यच्च चक्षुषा यच्च दृश्यते ॥ (१२।२)

स्पर्शेन स्पृश्यते यच्च घ्राणेन घ्रायते च यत् । (१३।१)

मनःषष्ठानि संयम्य हवींष्येतानि सर्वशः ॥ (१३।२)

गुणवत्पावको मह्यं दीप्यते हव्यवाहनः । (१४।१)

योगयज्ञः प्रवृत्तो मे ज्ञानब्रह्ममनोद्भवः । (१४।२)

प्राणस्तोत्रो ऽपानशस्त्रः सर्वत्यागसुदक्षिणः ॥ (१४।३)

कर्मानुमन्ता ब्रह्मा मे कर्ताध्वर्युः कृतस्तुतिः । (१५।१)

कृतप्रशास्ता तच्छास्त्रम् अपवर्गो ऽस्य दक्षिणा ॥ (१५।२)

ऋचश्चाप्यत्र शंसन्ति नारायणविदो जनाः । (१६।१)

नारायणाय देवाय यद् अबध्नन् पशून् पुरा ॥ (१६।२)

तत्र सामानि गायन्ति तानि चाहुर् निदर्शनम् । (१७।१)

देवं नारायणं भीरु सर्वात्मानं निबोध मे ॥ (१७।२)