युधिष्ठिर उवाच । (१।१)

किं श्रेयः पुरुषस्येह किं कुर्वन् सुखम् एधते । (१।२)

विपाप्मा च भवेत् केन किं वा कल्मषनाशनम् ॥ (१।३)

भीष्म उवाच । (२।१)

अयं दैवतवंशो वै ऋषिवंशसमन्वितः । (२।२)

द्विसंध्यं पठितः पुत्र कल्मषापहरः परः ॥ (२।३)

देवासुरगुरुर् देवः सर्वभूतनमस्कृतः । (३।१)

अचिन्त्यो ऽथाप्यनिर्देश्यः सर्वप्राणो ह्ययोनिजः ॥ (३।२)

पितामहो जगन्नाथः सावित्री ब्रह्मणः सती । (४।१)

वेदभूर् अथ कर्ता च विष्णुर् नारायणः प्रभुः ॥ (४।२)

उमापतिर् विरूपाक्षः स्कन्दः सेनापतिस्तथा । (५।१)

विशाखो हुतभुग् वायुश्चन्द्रादित्यौ प्रभाकरौ ॥ (५।२)

शक्रः शचीपतिर् देवो यमो धूमोर्णया सह । (६।१)

वरुणः सह गौर्या च सह ऋद्ध्या धनेश्वरः ॥ (६।२)

सौम्या गौः सुरभिर् देवी विश्रवाश्च महान् ऋषिः । (७।१)

षट्कालः सागरो गङ्गा स्रवन्त्यो ऽथ मरुद्गणाः ॥ (७।२)

वालखिल्यास्तपःसिद्धाः कृष्णद्वैपायनस्तथा । (८।१)

नारदः पर्वतश्चैव विश्वावसुर् हहाहुहूः ॥ (८।२)

तुम्बरुश्चित्रसेनश्च देवदूतश्च विश्रुतः । (९।१)

देवकन्या महाभागा दिव्याश्चाप्सरसां गणाः ॥ (९।२)

उर्वशी मेनका रम्भा मिश्रकेशी अलम्बुषा । (१०।१)

विश्वाची च घृताची च पञ्चचूडा तिलोत्तमा ॥ (१०।२)

आदित्या वसवो रुद्राः साश्विनः पितरो ऽपि च । (११।१)

धर्मः सत्यं तपो दीक्षा व्यवसायः पितामहः ॥ (११।२)

शर्वर्यो दिवसाश्चैव मारीचः कश्यपस्तथा । (१२।१)

शुक्रो बृहस्पतिर् भौमो बुधो राहुः शनैश्चरः ॥ (१२।२)

नक्षत्राण्य् ऋतवश्चैव मासाः संध्याः सवत्सराः । (१३।१)

वैनतेयाः समुद्राश्च कद्रुजाः पन्नगास्तथा ॥ (१३।२)

शतद्रूश्च विपाशा च चन्द्रभागा सरस्वती । (१४।१)

सिन्धुश्च देविका चैव पुष्करं तीर्थम् एव च ॥ (१४।२)

गङ्गा महानदी चैव कपिला नर्मदा तथा । (१५।१)

कम्पुना च विशल्या च करतोयाम्बुवाहिनी ॥ (१५।२)

सरयूर् गण्डकी चैव लोहित्यश्च महानदः । (१६।१)

ताम्रारुणा वेत्रवती पर्णाशा गौतमी तथा ॥ (१६।२)

गोदावरी च वेण्णा च कृष्णवेणा तथाद्रिजा । (१७।१)

दृषद्वती च कावेरी वंक्षुर् मन्दाकिनी तथा ॥ (१७।२)

प्रयागं च प्रभासं च पुण्यं नैमिषम् एव च । (१८।१)

तच्च विश्वेश्वरस्थानं यत्र तद् विमलं सरः ॥ (१८।२)

पुण्यतीर्थैश्च कलिलं कुरुक्षेत्रं प्रकीर्तितम् । (१९।१)

सिन्धूत्तमं तपोदानं जम्बूमार्गम् अथापि च ॥ (१९।२)

हिरण्वती वितस्ता च तथैवेक्षुमती नदी । (२०।१)

वेदस्मृतिर् वैदसिनी मलवासाश्च नद्यपि ॥ (२०।२)

भूमिभागास्तथा पुण्या गङ्गाद्वारम् अथापि च । (२१।१)

ऋषिकुल्यास्तथा मेध्या नदी चित्रपथा तथा ॥ (२१।२)

कौशिकी यमुना सीता तथा चर्मण्वती नदी । (२२।१)

नदी भीमरथी चैव बाहुदा च महानदी । (२२।२)

महेन्द्रवाणी त्रिदिवा नीलिका च सरस्वती ॥ (२२।३)

नन्दा चापरनन्दा च तथा तीर्थं महाह्रदम् । (२३।१)

गयाथ फल्गुतीर्थं च धर्मारण्यं सुरैर् वृतम् ॥ (२३।२)

तथा देवनदी पुण्या सरश्च ब्रह्मनिर्मितम् । (२४।१)

पुण्यं त्रिलोकविख्यातं सर्वपापहरं शिवम् ॥ (२४।२)

हिमवान् पर्वतश्चैव दिव्यौषधिसमन्वितः । (२५।१)

विन्ध्यो धातुविचित्राङ्गस्तीर्थवान् औषधान्वितः ॥ (२५।२)

मेरुर् महेन्द्रो मलयः श्वेतश्च रजताचितः । (२६।१)

शृङ्गवान्मन्दरो नीलो निषधो दर्दुरस्तथा ॥ (२६।२)

चित्रकूटो ऽञ्जनाभश्च पर्वतो गन्धमादनः । (२७।१)

पुण्यः सोमगिरिश्चैव तथैवान्ये महीधराः । (२७।२)

दिशश्च विदिशश्चैव क्षितिः सर्वे महीरुहाः ॥ (२७।३)

विश्वेदेवा नभश्चैव नक्षत्राणि ग्रहास्तथा । (२८।१)

पान्तु वः सततं देवाः कीर्तिताकीर्तिता मया ॥ (२८।२)

कीर्तयानो नरो ह्येतान्मुच्यते सर्वकिल्बिषैः । (२९।१)

स्तुवंश्च प्रतिनन्दंश्च मुच्यते सर्वतो भयात् । (२९।२)

सर्वसंकरपापेभ्यो देवतास्तवनन्दकः ॥ (२९।३)

देवतानन्तरं विप्रांस्तपःसिद्धांस्तपोऽधिकान् । (३०।१)

कीर्तितान् कीर्तयिष्यामि सर्वपापप्रमोचनान् ॥ (३०।२)

यवक्रीतो ऽथ रैभ्यश्च कक्षीवान् औशिजस्तथा । (३१।१)

भृग्वङ्गिरास्तथा कण्वो मेधातिथिर् अथ प्रभुः । (३१।२)

बर्ही च गुणसम्पन्नः प्राचीं दिशम् उपाश्रिताः ॥ (३१।३)

भद्रां दिशं महाभागा उल्मुचुः प्रमुचुस्तथा । (३२।१)

मुमुचुश्च महाभागः स्वस्त्यात्रेयश्च वीर्यवान् ॥ (३२।२)

मित्रावरुणयोः पुत्रस्तथागस्त्यः प्रतापवान् । (३३।१)

दृढायुश्चोर्ध्वबाहुश्च विश्रुतावृषिसत्तमौ ॥ (३३।२)

पश्चिमां दिशम् आश्रित्य य एधन्ते निबोध तान् । (३४।१)

उषद्गुः सह सोदर्यैः परिव्याधश्च वीर्यवान् ॥ (३४।२)

ऋषिर् दीर्घतमाश्चैव गौतमः कश्यपस्तथा । (३५।१)

एकतश्च द्वितश्चैव त्रितश्चैव महर्षयः । (३५।२)

अत्रेः पुत्रश्च धर्मात्मा तथा सारस्वतः प्रभुः ॥ (३५।३)

उत्तरां दिशम् आश्रित्य य एधन्ते निबोध तान् । (३६।१)

अत्रिर् वसिष्ठः शक्तिश्च पाराशर्यश्च वीर्यवान् ॥ (३६।२)

विश्वामित्रो भरद्वाजो जमदग्निस्तथैव च । (३७।१)

ऋचीकपौत्रो रामश्च ऋषिर् औद्दालकिस्तथा ॥ (३७।२)

श्वेतकेतुः कोहलश्च विपुलो देवलस्तथा । (३८।१)

देवशर्मा च धौम्यश्च हस्तिकाश्यप एव च ॥ (३८।२)

लोमशो नाचिकेतश्च लोमहर्षण एव च । (३९।१)

ऋषिर् उग्रश्रवाश्चैव भार्गवश्च्यवनस्तथा ॥ (३९।२)

एष वै समवायस्ते ऋषिदेवसमन्वितः । (४०।१)

आद्यः प्रकीर्तितो राजन् सर्वपापप्रमोचनः ॥ (४०।२)

नृगो ययातिर् नहुषो यदुः पूरुश्च वीर्यवान् । (४१।१)

धुन्धुमारो दिलीपश्च सगरश्च प्रतापवान् ॥ (४१।२)

कृशाश्वो यौवनाश्वश्च चित्राश्वः सत्यवांस्तथा । (४२।१)

दुःषन्तो भरतश्चैव चक्रवर्ती महायशाः ॥ (४२।२)

यवनो जनकश्चैव तथा दृढरथो नृपः । (४३।१)

रघुर् नरवरश्चैव तथा दशरथो नृपः ॥ (४३।२)

रामो राक्षसहा वीरः शशबिन्दुर् भगीरथः । (४४।१)

हरिश्चन्द्रो मरुत्तश्च जह्नुर् जाह्नविसेविता ॥ (४४।२)

महोदयो ह्यलर्कश्च ऐलश्चैव नराधिपः । (४५।१)

करंधमो नरश्रेष्ठः कध्मोरश्च नराधिपः ॥ (४५।२)

दक्षो ऽम्बरीषः कुकुरो रवतश्च महायशाः । (४६।१)

मुचुकुन्दश्च राजर्षिर् मित्रभानुः प्रियंकरः ॥ (४६।२)

त्रसदस्युस्तथा राजा श्वेतो राजर्षिसत्तमः । (४७।१)

महाभिषश्च विख्यातो निमिराजस्तथाष्टकः ॥ (४७।२)

आयुः क्षुपश्च राजर्षिः कक्षेयुश्च नराधिपः । (४८।१)

शिबिर् औशीनरश्चैव गयश्चैव नराधिपः ॥ (४८।२)

प्रतर्दनो दिवोदासः सौदासः कोसलेश्वरः । (४९।१)

ऐलो नलश्च राजर्षिर् मनुश्चैव प्रजापतिः ॥ (४९।२)

हविध्रश्च पृषध्रश्च प्रतीपः शंतनुस्तथा । (५०।१)

कक्षसेनश्च राजर्षिर् ये चान्ये नानुकीर्तिताः ॥ (५०।२)

मा विघ्नं मा च मे पापं मा च मे परिपन्थिनः । (५१।१)

ध्रुवो जयो मे नित्यं स्यात् परत्र च परा गतिः ॥ (५१।२)