वैशंपायन उवाच । (१।१)

इत्युक्त्वानुययौ पार्थो हयं तं कामचारिणम् । (१।२)

न्यवर्तत ततो वाजी येन नागाह्वयं पुरम् ॥ (१।३)

तं निवृत्तं तु शुश्राव चारेणैव युधिष्ठिरः । (२।१)

श्रुत्वार्जुनं कुशलिनं स च हृष्टमनाभवत् ॥ (२।२)

विजयस्य च तत् कर्म गान्धारविषये तदा । (३।१)

श्रुत्वान्येषु च देशेषु स सुप्रीतो ऽभवन्नृपः ॥ (३।२)

एतस्मिन्न् एव काले तु द्वादशीं माघपाक्षिकीम् । (४।१)

इष्टं गृहीत्वा नक्षत्रं धर्मराजो युधिष्ठिरः ॥ (४।२)

समानाय्य महातेजाः सर्वान् भ्रातॄन्महामनाः । (५।१)

भीमं च नकुलं चैव सहदेवं च कौरवः ॥ (५।२)

प्रोवाचेदं वचः काले तदा धर्मभृतां वरः । (६।१)

आमन्त्र्य वदतां श्रेष्ठो भीमं भीमपराक्रमम् ॥ (६।२)

आयाति भीमसेनासौ सहाश्वेन तवानुजः । (७।१)

यथा मे पुरुषाः प्राहुर् ये धनंजयसारिणः ॥ (७।२)

उपस्थितश्च कालो ऽयम् अभितो वर्तते हयः । (८।१)

माघी च पौर्णमासीयं मासः शेषो वृकोदर ॥ (८।२)

तत् प्रस्थाप्यन्तु विद्वांसो ब्राह्मणा वेदपारगाः । (९।१)

वाजिमेधार्थसिद्ध्यर्थं देशं पश्यन्तु यज्ञियम् ॥ (९।२)

इत्युक्तः स तु तच्चक्रे भीमो नृपतिशासनम् । (१०।१)

हृष्टः श्रुत्वा नरपतेर् आयान्तं सव्यसाचिनम् ॥ (१०।२)

ततो ययौ भीमसेनः प्राज्ञैः स्थपतिभिः सह । (११।१)

ब्राह्मणान् अग्रतः कृत्वा कुशलान् यज्ञकर्मसु ॥ (११।२)

तं सशालचयग्रामं संप्रतोलीविटङ्किनम् । (१२।१)

मापयामास कौरव्यो यज्ञवाटं यथाविधि ॥ (१२।२)

सदः सपत्नीसदनं साग्नीध्रम् अपि चोत्तरम् । (१३।१)

कारयामास विधिवन्मणिहेमविभूषितम् ॥ (१३।२)

स्तम्भान् कनकचित्रांश्च तोरणानि बृहन्ति च । (१४।१)

यज्ञायतनदेशेषु दत्त्वा शुद्धं च काञ्चनम् ॥ (१४।२)

अन्तःपुराणि राज्ञां च नानादेशनिवासिनाम् । (१५।१)

कारयामास धर्मात्मा तत्र तत्र यथाविधि ॥ (१५।२)

ब्राह्मणानां च वेश्मानि नानादेशसमेयुषाम् । (१६।१)

कारयामास भीमः स विविधानि ह्यनेकशः ॥ (१६।२)

तथा संप्रेषयामास दूतान्नृपतिशासनात् । (१७।१)

भीमसेनो महाराज राज्ञाम् अक्लिष्टकर्मणाम् ॥ (१७।२)

ते प्रियार्थं कुरुपतेर् आययुर् नृपसत्तमाः । (१८।१)

रत्नान्यनेकान्यादाय स्त्रियो ऽश्वान् आयुधानि च ॥ (१८।२)

तेषां निविशतां तेषु शिबिरेषु सहस्रशः । (१९।१)

नर्दतः सागरस्येव शब्दो दिवम् इवास्पृशत् ॥ (१९।२)

तेषाम् अभ्यागतानां स राजा राजीवलोचनः । (२०।१)

व्यादिदेशान्नपानानि शय्याश्चाप्यतिमानुषाः ॥ (२०।२)

वाहनानां च विविधाः शालाः शालीक्षुगोरसैः । (२१।१)

उपेताः पुरुषव्याघ्र व्यादिदेश स धर्मराट् ॥ (२१।२)

तथा तस्मिन्महायज्ञे धर्मराजस्य धीमतः । (२२।१)

समाजग्मुर् मुनिगणा बहवो ब्रह्मवादिनः ॥ (२२।२)

ये च द्विजातिप्रवरास्तत्रासन् पृथिवीपते । (२३।१)

समाजग्मुः सशिष्यांस्तान् प्रतिजग्राह कौरवः ॥ (२३।२)

सर्वांश्च तान् अनुययौ यावद् आवसथाद् इति । (२४।१)

स्वयम् एव महातेजा दम्भं त्यक्त्वा युधिष्ठिरः ॥ (२४।२)

ततः कृत्वा स्थपतयः शिल्पिनो ऽन्ये च ये तदा । (२५।१)

कृत्स्नं यज्ञविधिं राजन् धर्मराज्ञे न्यवेदयन् ॥ (२५।२)

तच्छ्रुत्वा धर्मराजः स कृतं सर्वम् अनिन्दितम् । (२६।१)

हृष्टरूपो ऽभवद् राजा सह भ्रातृभिर् अच्युतः ॥ (२६।२)