वैशंपायन उवाच । (१।१)

ब्रह्मणो मानसाः पुत्रा विदिताः षण् महर्षयः । (१।२)

एकादश सुताः स्थाणोः ख्याताः परममानसाः ॥ (१।३)

मृगव्याधश्च शर्वश्च निरृतिश्च महायशाः । (२।१)

अजैकपाद् अहिर्बुध्न्यः पिनाकी च परंतपः ॥ (२।२)

दहनो ऽथेश्वरश्चैव कपाली च महाद्युतिः । (३।१)

स्थाणुर् भवश्च भगवान् रुद्रा एकादश स्मृताः ॥ (३।२)

मरीचिर् अङ्गिरा अत्रिः पुलस्त्यः पुलहः क्रतुः । (४।१)

षड् एते ब्रह्मणः पुत्रा वीर्यवन्तो महर्षयः ॥ (४।२)

त्रयस्त्वङ्गिरसः पुत्रा लोके सर्वत्र विश्रुताः । (५।१)

बृहस्पतिर् उतथ्यश्च संवर्तश्च धृतव्रताः ॥ (५।२)

अत्रेस्तु बहवः पुत्राः श्रूयन्ते मनुजाधिप । (६।१)

सर्वे वेदविदः सिद्धाः शान्तात्मानो महर्षयः ॥ (६।२)

राक्षसास्तु पुलस्त्यस्य वानराः किंनरास्तथा । (७।१)

यक्षाश्च मनुजव्याघ्र पुत्रास्तस्य च धीमतः । (७।२)

पुलहस्य मृगाः सिंहा व्याघ्राः किंपुरुषास्तथा । (७।३)

पुलहस्य सुता राजञ् शरभाश्च प्रकीर्तिताः । (७।४)

सिंहाः किंपुरुषा व्याघ्रा ऋक्षा ईहामृगास्तथा ॥ (७।५)

क्रतोः क्रतुसमाः पुत्राः पतंगसहचारिणः । (८।१)

विश्रुतास् त्रिषु लोकेषु सत्यव्रतपरायणाः ॥ (८।२)

दक्षस्त्वजायताङ्गुष्ठाद् दक्षिणाद् भगवान् ऋषिः । (९।१)

ब्रह्मणः पृथिवीपाल पुत्रः पुत्रवतां वरः ॥ (९।२)

वामाद् अजायताङ्गुष्ठाद् भार्या तस्य महात्मनः । (१०।१)

तस्यां पञ्चाशतं कन्याः स एवाजनयन् मुनिः ॥ (१०।२)

ताः सर्वास्त्वनवद्याङ्ग्यः कन्याः कमललोचनाः । (११।१)

पुत्रिकाः स्थापयामास नष्टपुत्रः प्रजापतिः ॥ (११।२)

ददौ स दश धर्माय सप्तविंशतिम् इन्दवे । (१२।१)

दिव्येन विधिना राजन् कश्यपाय त्रयोदश ॥ (१२।२)

नामतो धर्मपत्न्यस्ताः कीर्त्यमाना निबोध मे । (१३।१)

कीर्तिर् लक्ष्मीर् धृतिर् मेधा पुष्टिः श्रद्धा क्रिया तथा ॥ (१३।२)

बुद्धिर् लज्जा मतिश्चैव पत्न्यो धर्मस्य ता दश । (१४।१)

द्वाराण्येतानि धर्मस्य विहितानि स्वयंभुवा ॥ (१४।२)

सप्तविंशति सोमस्य पत्न्यो लोके परिश्रुताः । (१५।१)

कालस्य नयने युक्ताः सोमपत्न्यः शुभव्रताः । (१५।२)

सर्वा नक्षत्रयोगिन्यो लोकयात्राविधौ स्थिताः ॥ (१५।३)

पितामहो मुनिर् देवस्तस्य पुत्रः प्रजापतिः । (१६।१)

तस्याष्टौ वसवः पुत्रास्तेषां वक्ष्यामि विस्तरम् ॥ (१६।२)

धरो ध्रुवश्च सोमश्च अहश्चैवानिलो ऽनलः । (१७।१)

प्रत्यूषश्च प्रभासश्च वसवो ऽष्टाविति स्मृताः ॥ (१७।२)

धूम्रायाश्च धरः पुत्रो ब्रह्मविद्यो ध्रुवस्तथा । (१८।१)

चन्द्रमास्तु मनस्विन्याः श्वसायाः श्वसनस्तथा ॥ (१८।२)

रतायाश्चाप्यहः पुत्रः शाण्डिल्याश्च हुताशनः । (१९।१)

प्रत्यूषश्च प्रभासश्च प्रभातायाः सुतौ स्मृतौ ॥ (१९।२)

धरस्य पुत्रो द्रविणो हुतहव्यवहस्तथा । (२०।१)

आपस्य पुत्रो वैतण्ड्यः श्रमश्रान्तो मुनिस्तथा । (२०।२)

ध्रुवस्य पुत्रो भगवान् कालो लोकप्रकालनः ॥ (२०।३)

सोमस्य तु सुतो वर्चा वर्चस्वी येन जायते । (२१।१)

मनोहरायाः शिशिरः प्राणो ऽथ रमणस्तथा ॥ (२१।२)

अह्नः सुतः स्मृतो ज्योतिः श्रमः शान्तस्तथा मुनिः । (२२।१)

अग्नेः पुत्रः कुमारस्तु श्रीमाञ् शरवणालयः ॥ (२२।२)

तस्य शाखो विशाखश्च नैगमेशश्च पृष्ठजः । (२३।१)

कृत्तिकाभ्युपपत्तेश्च कार्त्तिकेय इति स्मृतः ॥ (२३।२)

अनिलस्य शिवा भार्या तस्याः पुत्रः पुरोजवः । (२४।१)

विश्वकर्मा महाभागो तस्य पुत्रो मनोजवः । (२४।२)

अविज्ञातगतिश्चैव द्वौ पुत्रावनिलस्य तु ॥ (२४।३)

प्रत्यूषस्य विदुः पुत्रम् ऋषिं नाम्नाथ देवलम् । (२५।१)

द्वौ पुत्रौ देवलस्यापि क्षमावन्तौ मनीषिणौ । (२५।२)

शङ्खश्च लिखितश्चैव सर्वशास्त्रविशारदौ ॥ (२५।३)

बृहस्पतेस्तु भगिनी वरस्त्री ब्रह्मचारिणी । (२६।१)

योगसिद्धा जगत् सर्वम् असक्तं विचरत्युत । (२६।२)

प्रभासस्य तु भार्या सा वसूनाम् अष्टमस्य ह । (२६।३)

प्रासूत विश्वकर्माणं सर्वशिल्पवतां वरम् ॥ (२६।४)

विश्वकर्मा महाभागो जज्ञे शिल्पप्रजापतिः । (२७।१)

कर्ता शिल्पसहस्राणां त्रिदशानां च वर्धकिः ॥ (२७।२)

भूषणानां च सर्वेषां कर्ता शिल्पवतां वरः । (२८।१)

यो दिव्यानि विमानानि देवतानां चकार ह ॥ (२८।२)

मनुष्याश्चोपजीवन्ति यस्य शिल्पं महात्मनः । (२९।१)

पूजयन्ति च यं नित्यं विश्वकर्माणम् अव्ययम् ॥ (२९।२)

स्तनं तु दक्षिणं भित्त्वा ब्रह्मणो नरविग्रहः । (३०।१)

निःसृतो भगवान् धर्मः सर्वलोकसुखावहः ॥ (३०।२)

त्रयस्तस्य वराः पुत्राः सर्वभूतमनोहराः । (३१।१)

शमः कामश्च हर्षश्च तेजसा लोकधारिणः ॥ (३१।२)

कामस्य तु रतिर् भार्या शमस्य प्राप्तिर् अङ्गना । (३२।१)

नन्दी तु भार्या हर्षस्य यत्र लोकाः प्रतिष्ठिताः ॥ (३२।२)

मरीचेः कश्यपः पुत्रः कश्यपस्य सुरासुराः । (३३।१)

जज्ञिरे नृपशार्दूल लोकानां प्रभवस्तु सः ॥ (३३।२)

त्वाष्ट्री तु सवितुर् भार्या वडवारूपधारिणी । (३४।१)

असूयत महाभागा सान्तरिक्षे ऽश्विनावुभौ ॥ (३४।२)

द्वादशैवादितेः पुत्राः शक्रमुख्या नराधिप । (३५।१)

तेषाम् अवरजो विष्णुर् यत्र लोकाः प्रतिष्ठिताः ॥ (३५।२)

त्रयस्त्रिंशत इत्येते देवास्तेषाम् अहं तव । (३६।१)

अन्वयं सम्प्रवक्ष्यामि पक्षैश्च कुलतो गणान् ॥ (३६।२)

रुद्राणाम् अपरः पक्षः साध्यानां मरुतां तथा । (३७।१)

वसूनां भार्गवं विद्याद् विश्वेदेवांस्तथैव च ॥ (३७।२)

वैनतेयस्तु गरुडो बलवान् अरुणस्तथा । (३८।१)

बृहस्पतिश्च भगवान् आदित्येष्वेव गण्यते ॥ (३८।२)

अश्विभ्यां गुह्यकान् विद्धि सर्वौषध्यस्तथा पशून् । (३९।१)

एष देवगणो राजन् कीर्तितस्ते ऽनुपूर्वशः । (३९।२)

यं कीर्तयित्वा मनुजः सर्वपापैः प्रमुच्यते ॥ (३९।३)

ब्रह्मणो हृदयं भित्त्वा निःसृतो भगवान् भृगुः । (४०।१)

भृगोः पुत्रः कविर् विद्वाञ् शुक्रः कविसुतो ग्रहः ॥ (४०।२)

त्रैलोक्यप्राणयात्रार्थे वर्षावर्षे भयाभये । (४१।१)

स्वयंभुवा नियुक्तः सन् भुवनं परिधावति ॥ (४१।२)

योगाचार्यो महाबुद्धिर् दैत्यानाम् अभवद् गुरुः । (४२।१)

सुराणां चापि मेधावी ब्रह्मचारी यतव्रतः । (४२।२)

षण्डामार्कौ प्रथमतः प्रथितावुग्रतेजसौ ॥ (४२।३)

तस्मिन् नियुक्ते विभुना योगक्षेमाय भार्गवे । (४३।१)

अन्यम् उत्पादयामास पुत्रं भृगुर् अनिन्दितम् ॥ (४३।२)

च्यवनं दीप्ततपसं धर्मात्मानं मनीषिणम् । (४४।१)

यः स रोषाच्च्युतो गर्भान् मातुर् मोक्षाय भारत । (४४।२)

आसीत् तस्य सुकन्या वै भार्या चापि महात्मनः ॥ (४४।३)

आरुषी तु मनोः कन्या तस्य पत्नी मनीषिणः । (४५।१)

और्वस्तस्यां समभवद् ऊरुं भित्त्वा महायशाः । (४५।२)

महातपा महातेजा बाल एव गुणैर् युतः ॥ (४५।३)

ऋचीकस्तस्य पुत्रस्तु जमदग्निस्ततो ऽभवत् । (४६।१)

जमदग्नेस्तु चत्वार आसन् पुत्रा महात्मनः ॥ (४६।२)

रामस्तेषां जघन्यो ऽभूद् अजघन्यैर् गुणैर् युतः । (४७।१)

सर्वशस्त्रास्त्रकुशलः क्षत्रियान्तकरो वशी ॥ (४७।२)

और्वस्यासीत् पुत्रशतं जमदग्निपुरोगमम् । (४८।१)

तेषां पुत्रसहस्राणि बभूवुर् भृगुविस्तरः ॥ (४८।२)

द्वौ पुत्रौ ब्रह्मणस्त्वन्यौ ययोस्तिष्ठति लक्षणम् । (४९।१)

लोके धाता विधाता च यौ स्थितौ मनुना सह ॥ (४९।२)

तयोर् एव स्वसा देवी लक्ष्मीः पद्मगृहा शुभा । (५०।१)

तस्यास्तु मानसाः पुत्रास्तुरगा व्योमचारिणः ॥ (५०।२)

वरुणस्य भार्या ज्येष्ठा तु शुक्राद् देवी व्यजायत । (५१।१)

तस्याः पुत्रं बलं विद्धि सुरां च सुरनन्दिनीम् ॥ (५१।२)

प्रजानाम् अन्नकामानाम् अन्योन्यपरिभक्षणात् । (५२।१)

अधर्मस्तत्र संजातः सर्वभूतविनाशनः ॥ (५२।२)

तस्यापि निरृतिर् भार्या नैरृता येन राक्षसाः । (५३।१)

घोरास्तस्यास् त्रयः पुत्राः पापकर्मरताः सदा । (५३।२)

भयो महाभयश्चैव मृत्युर् भूतान्तकस्तथा । (५३।३)

न तस्य भार्या पुत्रो वा कश्चिद् अस्त्यन्तको हि सः ॥ (५३।४)

काकीं श्येनीं च भासीं च धृतराष्ट्रीं तथा शुकीम् । (५४।१)

ताम्रा तु सुषुवे देवी पञ्चैता लोकविश्रुताः । (५४।२)

भार्या गरुत्मतश्चैव भासी क्रौञ्ची शुकी तथा । (५४।३)

चतुर्थी धृतराष्ट्री च तास्वपत्यान् निबोध मे ॥ (५४।४)

उलूकान् सुषुवे काकी श्येनी श्येनान् व्यजायत । (५५।१)

भासी भासान् अजनयद् गृध्रांश्चैव जनाधिप ॥ (५५।२)

धृतराष्ट्री तु हंसांश्च कलहंसांश्च सर्वशः । (५६।१)

चक्रवाकांश्च भद्रं ते प्रजज्ञे सा तु भामिनी ॥ (५६।२)

शुकी विजज्ञे धर्मज्ञ शुकान् एव मनस्विनी । (५७।१)

कल्याणगुणसम्पन्ना सर्वलक्षणपूजिता ॥ (५७।२)

नव क्रोधवशा नारीः प्रजज्ञे ऽप्यात्मसंभवाः । (५८।१)

मृगीं च मृगमन्दां च हरिं भद्रमनाम् अपि ॥ (५८।२)

मातङ्गीम् अथ शार्दूलीं श्वेतां सुरभिम् एव च । (५९।१)

सर्वलक्षणसम्पन्नां सुरसां च यशस्विनीम् ॥ (५९।२)

अपत्यं तु मृगाः सर्वे मृग्या नरवरात्मज । (६०।१)

ऋक्षाश्च मृगमन्दायाः सृमराश्चमरा अपि ॥ (६०।२)

ततस्त्वैरावतं नागं जज्ञे भद्रमना सुतम् । (६१।१)

ऐरावतः सुतस्तस्या देवनागो महागजः ॥ (६१।२)

हर्याश्च हरयो ऽपत्यं वानराश्च तरस्विनः । (६२।१)

गोलाङ्गूलांश्च भद्रं ते हर्याः पुत्रान् प्रचक्षते ॥ (६२।२)

प्रजज्ञे त्वथ शार्दूली सिंहान् व्याघ्रांश्च भारत । (६३।१)

द्वीपिनश्च महाभाग सर्वान् एव न संशयः ॥ (६३।२)

मातङ्ग्यास्त्वथ मातङ्गा अपत्यानि नराधिप । (६४।१)

दिशागजं तु श्वेताख्यं श्वेताजनयद् आशुगम् ॥ (६४।२)

तथा दुहितरौ राजन् सुरभिर् वै व्यजायत । (६५।१)

रोहिणीं चैव भद्रं ते गन्धर्वीं च यशस्विनीम् । (६५।२)

विमलाम् अपि भद्रं ते अमलाम् अपि भारत । (६५।३)

रोहिण्यां जज्ञिरे गावो गन्धर्व्यां वाजिनः सुताः ॥ (६५।४)

सुरसाजनयन् नागान् राजन् कद्रूश्च पन्नगान् । (६६।१)

इरायां कन्यका जातास् तिस्रः कमललोचनाः । (६६।२)

वनस्पतीनां वृक्षाणां वीरुधां चैव मातरः । (६६।३)

लतारुहे च द्वे प्रोक्ते वीरुधा एव ताः स्मृताः । (६६।४)

गृह्णन्ति ये ऽपि ताः पुष्पं फलानि तरसा पृथक् । (६६।५)

ततो सुतास्ते विज्ञेयास्तान् एवाहुर् वनस्पतीन् । (६६।६)

पुष्पैः फलग्रहान् वृक्षान् रुहायाः प्रसवं विदुः । (६६।७)

लतागुल्मानि वल्ल्यश्च त्वक्सारतृणजातयः । (६६।८)

वीरुधो याः प्रजास्तस्यास्तत्र वंशः समाप्यते । (६६।९)

सप्त पिण्डफलान् वृक्षान् अनलापि व्यजायत । (६६।१०)

अनलायाः शुकी पुत्री कद्र्वास्तु सुरसा सुता ॥ (६६।११)

अरुणस्य भार्या श्येनी तु वीर्यवन्तौ महाबलौ । (६७।१)

संपातिं जनयामास तथैव च जटायुषम् । (६७।२)

कद्रूर् नागम् अनन्तं च प्रजज्ञे धरणीधरम् । (६७।३)

द्वौ पुत्रौ विनतायास्तु विख्यातौ गरुडारुणौ ॥ (६७।४)

इत्येष सर्वभूतानां महतां मनुजाधिप । (६८।१)

प्रभवः कीर्तितः सम्यङ् मया मतिमतां वर ॥ (६८।२)

यं श्रुत्वा पुरुषः सम्यक् पूतो भवति पाप्मनः । (६९।१)

सर्वज्ञतां च लभते गतिम् अग्र्यां च विन्दति ॥ (६९।२)