तां तु कृत्वा सभां श्रेष्ठां मयश्चार्जुनम् अब्रवीत् । (१।१)

भूतानां च महावीर्यो ध्वजाग्रे किंकरो गणः । (१।२)

तव विष्फारघोषेण मेघवन्निनदिष्यति । (१।३)

अयं हि सूर्यसंकाशो ज्वलनस्य रथोत्तमः । (१।४)

इमे च दिविजाः श्वेता वीर्यवन्तो हयोत्तमाः । (१।५)

मायामयः कृतो ह्येष ध्वजो वानरलक्षणः । (१।६)

असज्यमानो वृक्षेषु धूमकेतुर् इवोच्छ्रितः । (१।७)

बहुवर्णं हि लक्ष्येत ध्वजं वानरलक्षणम् । (१।८)

ध्वजोत्कटं ह्यनवमं युद्धे द्रक्ष्यसि विष्ठितम् । (१।९)

इत्युक्त्वालिङ्ग्य बीभत्सुं विसृष्टः प्रययौ मयः । (१।१०)

एषा सभा सव्यसाचिन् ध्वजो ऽग्र्यस्ते भविष्यति ॥ (१।११)

वैशंपायन उवाच । (२।१)

ततः प्रवेशनं चक्रे तस्यां राजा युधिष्ठिरः । (२।२)

अयुतं भोजयामास ब्राह्मणानां नराधिपः ॥ (२।३)

घृतपायसेन मधुना भक्ष्यैर् मूलफलैस्तथा । (३।१)

अहतैश्चैव वासोभिर् माल्यैर् उच्चावचैर् अपि ॥ (३।२)

ददौ तेभ्यः सहस्राणि गवां प्रत्येकशः प्रभुः । (४।१)

पुण्याहघोषस्तत्रासीद् दिवस्पृग् इव भारत ॥ (४।२)

वादित्रैर् विविधैर् गीतैर् गन्धैर् उच्चावचैर् अपि । (५।१)

भक्ष्यैर् मूलैः फलैश्चैव मांसैर् वाराहहारिणैः । (५।२)

कृसरेणाथ जीवन्त्या हविष्येण च सर्वशः । (५।३)

मांसप्रकारैर् विविधैः खाद्यैश्चापि तथा नृप । (५।४)

चोष्यैश्च विविधै राजन् पेयैश्च बहुविस्तरैः । (५।५)

पूजयित्वा कुरुश्रेष्ठो दैवतानि निवेश्य च । (५।६)

तर्पयामास विप्रेन्द्रान्नानादिग्भ्यः समागतान् ॥ (५।७)

तत्र मल्ला नटा झल्लाः सूता वैतालिकास्तथा । (६।१)

उपतस्थुर् महात्मानं सप्तरात्रं युधिष्ठिरम् ॥ (६।२)

तथा स कृत्वा पूजां तां भ्रातृभिः सह पाण्डवः । (७।१)

तस्यां सभायां रम्यायां रेमे शक्रो यथा दिवि ॥ (७।२)

सभायाम् ऋषयस्तस्यां पाण्डवैः सह आसते । (८।१)

आसांचक्रुर् नरेन्द्राश्च नानादेशसमागताः ॥ (८।२)

असितो देवलः सत्यः सर्पमाली महाशिराः । (९।१)

अर्वावसुः सुमित्रश्च मैत्रेयः शुनको बलिः । (९।२)

आत्रेयः कण्वजठरौ मौद्गल्यो हस्तिकाश्यपौ ॥ (९।३)

बको दाल्भ्यः स्थूलशिराः कृष्णद्वैपायनः शुकः । (१०।१)

सुमन्तुर् जैमिनिः पैलो व्यासशिष्यास्तथा वयम् ॥ (१०।२)

तित्तिरिर् याज्ञवल्क्यश्च ससुतो लोमहर्षणः । (११।१)

सत्याषाढश्च दुर्वासा भारद्वाजस्तथैव च । (११।२)

शुनःशेफो वसिष्ठश्च कण्डुर् उद्दालकस्तथा । (११।३)

श्वेतकेतुः सहश्चैव कपर्दी चाश्वलायनः । (११।४)

बोधायनो भरद्वाज आपस्तम्बस्तथैव च । (११।५)

अप्सुहोम्यश्च धौम्यश्च आणीमाण्डव्यकौशिकौ ॥ (११।६)

दामोष्णीषस्त्रैवणिश्च पर्णादो घटजानुकः । (१२।१)

मौञ्जायनो वायुभक्षः पाराशर्यश्च सारिकौ ॥ (१२।२)

बलवाकः शिनीवाकः सुत्यपालः कृतश्रमः । (१३।१)

जातूकर्णः शिखावांश्च सुबलः पारिजातकः ॥ (१३।२)

पर्वतश्च महाभागो मार्कण्डेयस्तथा मुनिः । (१४।१)

पवित्रपाणिः सावर्णिर् भालुकिर् गालवस्तथा ॥ (१४।२)

जङ्घाबन्धुश्च रैभ्यश्च कोपवेगश्रवा भृगुः । (१५।१)

हरिबभ्रुश्च कौण्डिन्यो बभ्रुमाली सनातनः ॥ (१५।२)

कक्षीवान् औशिजश्चैव नाचिकेतो ऽथ गौतमः । (१६।१)

पैङ्गो वराहः शुनकः शाण्डिल्यश्च महातपाः । (१६।२)

कर्करो वेणुजङ्घश्च कलापः कठ एव च । (१६।३)

शार्ङ्गरस्तैलकुप्यश्च पर्णवल्कस्तथैव च ॥ (१६।४)

मुनयो धर्मसहिता धृतात्मानो जितेन्द्रियाः । (१७।१)

एते चान्ये च बहवो वेदवेदाङ्गपारगाः ॥ (१७।२)

उपासते महात्मानं सभायाम् ऋषिसत्तमाः । (१८।१)

कथयन्तः कथाः पुण्या धर्मज्ञाः शुचयो ऽमलाः ॥ (१८।२)

तथैव क्षत्रियश्रेष्ठा धर्मराजम् उपासते । (१९।१)

श्रीमान्महात्मा धर्मात्मा मुञ्जकेतुर् विवर्धनः ॥ (१९।२)

संग्रामजिद् दुर्मुखश्च उग्रसेनश्च वीर्यवान् । (२०।१)

कक्षसेनः क्षितिपतिः क्षेमकश्चापराजितः । (२०।२)

काम्बोजराजः कमलः कम्पनश्च महाबलः ॥ (२०।३)

सततं कम्पयामास यवनान् एक एव यः । (२१।१)

बलपौरुषसम्पन्नान् कृतास्त्रान् अमितौजसः । (२१।२)

यथासुरान् कालकेयान् देवो वज्रधरस्तथा ॥ (२१।३)

जटासुरो मद्रकान्तश्च राजा कुन्तिः कुणिन्दश्च किरातराजः । (२२।१)

तथाङ्गवङ्गौ सह पुण्ड्रकेण पाण्ड्योड्रराजौ सह चान्ध्रकेण । (२२।२)

जटासुरो मद्रकश्च राजा कुन्तिः पुलिन्दकः । (२२।३)

किरातराजश्च तथा वङ्गेशः सहपुण्ड्रकः । (२२।४)

पाण्ड्यश्च राजा सुमहान् अन्ध्रकेण महात्मना । (२२।५)

अङ्गो वङ्गः सुमित्रश्च शैब्यश्चामित्रकर्शनः ॥ (२२।६)

किरातराजः सुमना यवनाधिपतिस्तथा । (२३।१)

पाञ्चालश्च विराटश्च द्रुमशल्यः पृथुश्रवाः । (२३।२)

चाणूरो देवरातश्च भोजो भीमरथश्च यः ॥ (२३।३)

श्रुतायुधश्च कालिङ्गो जयत्सेनश्च मागधः । (२४।१)

सुशर्मा चेकितानश्च सुरथो ऽमित्रकर्षणः ॥ (२४।२)

केतुमान् वसुदानश्च वैदेहो ऽथ कृतक्षणः । (२५।१)

सुधर्मा चानिरुद्धश्च श्रुतायुश्च महाबलः ॥ (२५।२)

अनूपराजो दुर्धर्षः क्षेमजिच्च सुदक्षिणः । (२६।१)

शिशुपालः सहसुतः करूषाधिपतिस्तथा । (२६।२)

पान्त्यान्ध्रराजौ सहितादं [॥। औ२ ज़ेइछेन्झ्] न महात्मनाम् ॥ (२६।३)

वृष्णीनां चैव दुर्धर्षाः कुमारा देवरूपिणः । (२७।१)

आहुको विपृथुश्चैव गदः सारण एव च ॥ (२७।२)

अक्रूरः कृतवर्मा च सात्यकिश्च शिनेः सुतः । (२८।१)

भीष्मको ऽथाहृतिश्चैव द्युमत्सेनश्च वीर्यवान् । (२८।२)

केकयाश्च महेष्वासा यज्ञसेनश्च सौमकिः । (२८।३)

केतुमान् वसुमांश्चैव कृतास्त्रश्च महाबलः । (२८।४)

एते चान्ये च बहवः क्षत्रिया मुख्यसंमताः । (२८।५)

उपासते सभायां स्म कुन्तीपुत्रं युधिष्ठिरम् ॥ (२८।६)

अर्जुनं चापि संश्रित्य राजपुत्रा महाबलाः । (२९।१)

अशिक्षन्त धनुर्वेदं रौरवाजिनवाससः ॥ (२९।२)

तत्रैव शिक्षिता राजन् कुमारा वृष्णिनन्दनाः । (३०।१)

रौक्मिणेयश्च साम्बश्च युयुधानश्च सात्यकिः । (३०।२)

सुधर्मा चानिरुद्धश्च शैब्यश्च नरपुंगवः ॥ (३०।३)

एते चान्ये च बहवो राजानः पृथिवीपते । (३१।१)

धनंजयम् उपातिष्ठन् धनुर्वेदचिकीर्षवः । (३१।२)

धनंजयसखा चात्र नित्यम् आस्ते स्म तुम्बुरुः । (३१।३)

उपासते महात्मानम् आसीनं सप्तविंशतिः ॥ (३१।४)

चित्रसेनः सहामात्यो गन्धर्वाप्सरसस्तथा । (३२।१)

तस्यां सभायाम् आस्ते स्म बहुभिः परिवारितः । (३२।२)

गीतवादित्रकुशलाः शम्यातालविशारदाः ॥ (३२।३)

प्रमाणे ऽथ लयस्थाने किंनराः कृतनिश्रमाः । (३३।१)

संचोदितास्तुम्बुरुणा गन्धर्वाः सहिता जगुः ॥ (३३।२)

गायन्ति दिव्यतानैस्ते यथान्यायं मनस्विनः । (३४।१)

देवतांश्च मुनींश्चैव पार्थिवांश्चैव तोषयन् । (३४।२)

शम्यातालेषु कुशलाः कुशला गीतवादने । (३४।३)

पाण्डुपुत्रान् ऋषींश्चैव रमयन्त उपासते । (३४।४)

हाहाहूहूः पर्वतश्च नारदश्च पृथुश्रवाः । (३४।५)

गायन्ति च प्रनृत्यन्ति उर्वश्याद्यप्सरोगणैः ॥ (३४।६)

तस्यां सभायाम् आसीनाः सुव्रताः सत्यसंगराः । (३५।१)

दिवीव देवा ब्रह्माणं युधिष्ठिरम् उपासते ॥ (३५।२)