वैशंपायन उवाच । (१।१)

श्रुत्वा धर्मान् अशेषेण पावनानि च सर्वशः । (१।२)

युधिष्ठिरः शांतनवं पुनर् एवाभ्यभाषत ॥ (१।३)

किम् एकं दैवतं लोके किं वाप्येकं परायणम् । (२।१)

स्तुवन्तः कं कम् अर्चन्तः प्राप्नुयुर् मानवाः शुभम् ॥ (२।२)

को धर्मः सर्वधर्माणां भवतः परमो मतः । (३।१)

किं जपन्मुच्यते जन्तुर् जन्मसंसारबन्धनात् ॥ (३।२)

भीष्म उवाच । (४।१)

जगत्प्रभुं देवदेवम् अनन्तं पुरुषोत्तमम् । (४।२)

स्तुवन्नामसहस्रेण पुरुषः सततोत्थितः ॥ (४।३)

तम् एव चार्चयन्नित्यं भक्त्या पुरुषम् अव्ययम् । (५।१)

ध्यायन् स्तुवन्नमस्यंश्च यजमानस्तम् एव च ॥ (५।२)

अनादिनिधनं विष्णुं सर्वलोकमहेश्वरम् । (६।१)

लोकाध्यक्षं स्तुवन्नित्यं सर्वदुःखातिगो भवेत् ॥ (६।२)

ब्रह्मण्यं सर्वधर्मज्ञं लोकानां कीर्तिवर्धनम् । (७।१)

लोकनाथं महद् भूतं सर्वभूतभवोद्भवम् ॥ (७।२)

एष मे सर्वधर्माणां धर्मो ऽधिकतमो मतः । (८।१)

यद् भक्त्या पुण्डरीकाक्षं स्तवैर् अर्चेन्नरः सदा ॥ (८।२)

परमं यो महत् तेजः परमं यो महत् तपः । (९।१)

परमं यो महद् ब्रह्म परमं यः परायणम् ॥ (९।२)

पवित्राणां पवित्रं यो मङ्गलानां च मङ्गलम् । (१०।१)

दैवतं देवतानां च भूतानां यो ऽव्ययः पिता ॥ (१०।२)

यतः सर्वाणि भूतानि भवन्त्यादियुगागमे । (११।१)

यस्मिंश्च प्रलयं यान्ति पुनर् एव युगक्षये ॥ (११।२)

तस्य लोकप्रधानस्य जगन्नाथस्य भूपते । (१२।१)

विष्णोर् नामसहस्रं मे शृणु पापभयापहम् ॥ (१२।२)

यानि नामानि गौणानि विख्यातानि महात्मनः । (१३।१)

ऋषिभिः परिगीतानि तानि वक्ष्यामि भूतये ॥ (१३।२)

विश्वं विष्णुर् वषट्कारो भूतभव्यभवत्प्रभुः । (१४।१)

भूतकृद् भूतभृद् भावो भूतात्मा भूतभावनः ॥ (१४।२)

पूतात्मा परमात्मा च मुक्तानां परमा गतिः । (१५।१)

अव्ययः पुरुषः साक्षी क्षेत्रज्ञो ऽक्षर एव च ॥ (१५।२)

योगो योगविदां नेता प्रधानपुरुषेश्वरः । (१६।१)

नारसिंहवपुः श्रीमान् केशवः पुरुषोत्तमः ॥ (१६।२)

सर्वः शर्वः शिवः स्थाणुर् भूतादिर् निधिर् अव्ययः । (१७।१)

संभवो भावनो भर्ता प्रभवः प्रभुर् ईश्वरः ॥ (१७।२)

स्वयंभूः शंभुर् आदित्यः पुष्कराक्षो महास्वनः । (१८।१)

अनादिनिधनो धाता विधाता धातुर् उत्तमः ॥ (१८।२)

अप्रमेयो हृषीकेशः पद्मनाभो ऽमरप्रभुः । (१९।१)

विश्वकर्मा मनुस्त्वष्टा स्थविष्ठः स्थविरो ध्रुवः ॥ (१९।२)

अग्राह्यः शाश्वतः कृष्णो लोहिताक्षः प्रतर्दनः । (२०।१)

प्रभूतस्त्रिककुब्धाम पवित्रं मङ्गलं परम् ॥ (२०।२)

ईशानः प्राणदः प्राणो ज्येष्ठः श्रेष्ठः प्रजापतिः । (२१।१)

हिरण्यगर्भो भूगर्भो माधवो मधुसूदनः ॥ (२१।२)

ईश्वरो विक्रमी धन्वी मेधावी विक्रमः क्रमः । (२२।१)

अनुत्तमो दुराधर्षः कृतज्ञः कृतिर् आत्मवान् ॥ (२२।२)

सुरेशः शरणं शर्म विश्वरेताः प्रजाभवः । (२३।१)

अहः संवत्सरो व्यालः प्रत्ययः सर्वदर्शनः ॥ (२३।२)

अजः सर्वेश्वरः सिद्धः सिद्धिः सर्वादिर् अच्युतः । (२४।१)

वृषाकपिर् अमेयात्मा सर्वयोगविनिःसृतः ॥ (२४।२)

वसुर् वसुमनाः सत्यः समात्मा संमितः समः । (२५।१)

अमोघः पुण्डरीकाक्षो वृषकर्मा वृषाकृतिः ॥ (२५।२)

रुद्रो बहुशिरा बभ्रुर् विश्वयोनिः शुचिश्रवाः । (२६।१)

अमृतः शाश्वतः स्थाणुर् वरारोहो महातपाः ॥ (२६।२)

सर्वगः सर्वविद् भानुर् विष्वक्सेनो जनार्दनः । (२७।१)

वेदो वेदविद् अव्यङ्गो वेदाङ्गो वेदवित् कविः ॥ (२७।२)

लोकाध्यक्षः सुराध्यक्षो धर्माध्यक्षः कृताकृतः । (२८।१)

चतुरात्मा चतुर्व्यूहश्चतुर्दंष्ट्रश्चतुर्भुजः ॥ (२८।२)

भ्राजिष्णुर् भोजनं भोक्ता सहिष्णुर् जगदादिजः । (२९।१)

अनघो विजयो जेता विश्वयोनिः पुनर्वसुः ॥ (२९।२)

उपेन्द्रो वामनः प्रांशुर् अमोघः शुचिर् ऊर्जितः । (३०।१)

अतीन्द्रः संग्रहः सर्गो धृतात्मा नियमो यमः ॥ (३०।२)

वेद्यो वैद्यः सदायोगी वीरहा माधवो मधुः । (३१।१)

अतीन्द्रियो महामायो महोत्साहो महाबलः ॥ (३१।२)

महाबुद्धिर् महावीर्यो महाशक्तिर् महाद्युतिः । (३२।१)

अनिर्देश्यवपुः श्रीमान् अमेयात्मा महाद्रिधृक् ॥ (३२।२)

महेष्वासो महीभर्ता श्रीनिवासः सतां गतिः । (३३।१)

अनिरुद्धः सुरानन्दो गोविन्दो गोविदां पतिः ॥ (३३।२)

मरीचिर् दमनो हंसः सुपर्णो भुजगोत्तमः । (३४।१)

हिरण्यनाभः सुतपाः पद्मनाभः प्रजापतिः ॥ (३४।२)

अमृत्युः सर्वदृक् सिंहः संधाता संधिमान् स्थिरः । (३५।१)

अजो दुर्मर्षणः शास्ता विश्रुतात्मा सुरारिहा ॥ (३५।२)

गुरुर् गुरुतमो धाम सत्यः सत्यपराक्रमः । (३६।१)

निमिषो ऽनिमिषः स्रग्वी वाचस्पतिर् उदारधीः ॥ (३६।२)

अग्रणीर् ग्रामणीः श्रीमान्न्यायो नेता समीरणः । (३७।१)

सहस्रमूर्धा विश्वात्मा सहस्राक्षः सहस्रपात् ॥ (३७।२)

आवर्तनो निवृत्तात्मा संवृतः संप्रमर्दनः । (३८।१)

अहः संवर्तको वह्निर् अनिलो धरणीधरः ॥ (३८।२)

सुप्रसादः प्रसन्नात्मा विश्वधृग् विश्वभुग् विभुः । (३९।१)

सत्कर्ता सत्कृतः साधुर् जह्नुर् नारायणो नरः ॥ (३९।२)

असंख्येयो ऽप्रमेयात्मा विशिष्टः शिष्टकृच्छुचिः । (४०।१)

सिद्धार्थः सिद्धसंकल्पः सिद्धिदः सिद्धिसाधनः ॥ (४०।२)

वृषाही वृषभो विष्णुर् वृषपर्वा वृषोदरः । (४१।१)

वर्धनो वर्धमानश्च विविक्तः श्रुतिसागरः ॥ (४१।२)

सुभुजो दुर्धरो वाग्मी महेन्द्रो वसुदो वसुः । (४२।१)

नैकरूपो बृहद्रूपः शिपिविष्टः प्रकाशनः ॥ (४२।२)

ओजस्तेजो द्युतिधरः प्रकाशात्मा प्रतापनः । (४३।१)

ऋद्धः स्पष्टाक्षरो मन्त्रश्चन्द्रांशुर् भास्करद्युतिः ॥ (४३।२)

अमृतांशूद्भवो भानुः शशबिन्दुः सुरेश्वरः । (४४।१)

औषधं जगतः सेतुः सत्यधर्मपराक्रमः ॥ (४४।२)

भूतभव्यभवन्नाथः पवनः पावनो ऽनिलः । (४५।१)

कामहा कामकृत् कान्तः कामः कामप्रदः प्रभुः ॥ (४५।२)

युगादिकृद् युगावर्तो नैकमायो महाशनः । (४६।१)

अदृश्यो व्यक्तरूपश्च सहस्रजिद् अनन्तजित् ॥ (४६।२)

इष्टो विशिष्टः शिष्टेष्टः शिखण्डी नहुषो वृषः । (४७।१)

क्रोधहा क्रोधकृत् कर्ता विश्वबाहुर् महीधरः ॥ (४७।२)

अच्युतः प्रथितः प्राणः प्राणदो वासवानुजः । (४८।१)

अपां निधिर् अधिष्ठानम् अप्रमत्तः प्रतिष्ठितः ॥ (४८।२)

स्कन्दः स्कन्दधरो धुर्यो वरदो वायुवाहनः । (४९।१)

वासुदेवो बृहद्भानुर् आदिदेवः पुरंदरः ॥ (४९।२)

अशोकस्तारणस्तारः शूरः शौरिर् जनेश्वरः । (५०।१)

अनुकूलः शतावर्तः पद्मी पद्मनिभेक्षणः ॥ (५०।२)