युधिष्ठिर उवाच । (१।१)

कन्यायाः प्राप्तशुल्कायाः पतिश्चेन्नास्ति कश्चन । (१।२)

तत्र का प्रतिपत्तिः स्यात् तन्मे ब्रूहि पितामह ॥ (१।३)

भीष्म उवाच । (२।१)

यापुत्रकस्याप्यरिक्थस्य प्रतिपत् सा तदा भवेत् ॥ (२।२)

अथ चेत् साहरेच्छुल्कं क्रीता शुल्कप्रदस्य सा । (३।१)

तस्यार्थे ऽपत्यम् ईहेत येन न्यायेन शक्नुयात् ॥ (३।२)

न तस्या मन्त्रवत् कार्यं कश्चित् कुर्वीत किंचन ॥ (४।१)

स्वयं वृतेति सावित्री पित्रा वै प्रत्यपद्यत । (५।१)

तत् तस्यान्ये प्रशंसन्ति धर्मज्ञा नेतरे जनाः ॥ (५।२)

एतत् तु नापरे चक्रुर् न परे जातु साधवः । (६।१)

साधूनां पुनर् आचारो गरीयो धर्मलक्षणम् ॥ (६।२)

अस्मिन्न् एव प्रकरणे सुक्रतुर् वाक्यम् अब्रवीत् । (७।१)

नप्ता विदेहराजस्य जनकस्य महात्मनः ॥ (७।२)

असदाचरिते मार्गे कथं स्याद् अनुकीर्तनम् । (८।१)

अनुप्रश्नः संशयो वा सताम् एतद् उपालभेत् ॥ (८।२)

असद् एव हि धर्मस्य प्रमादो धर्म आसुरः । (९।१)

नानुशुश्रुम जात्वेताम् इमां पूर्वेषु जन्मसु ॥ (९।२)

भार्यापत्योर् हि संबन्धः स्त्रीपुंसोस्तुल्य एव सः । (१०।१)

रतिः साधारणो धर्म इति चाह स पार्थिवः ॥ (१०।२)

युधिष्ठिर उवाच । (११।१)

अथ केन प्रमाणेन पुंसाम् आदीयते धनम् । (११।२)

पुत्रवद्धि पितुस्तस्य कन्या भवितुम् अर्हति ॥ (११।३)

भीष्म उवाच । (१२।१)

यथैवात्मा तथा पुत्रः पुत्रेण दुहिता समा । (१२।२)

तस्याम् आत्मनि तिष्ठन्त्यां कथम् अन्यो धनं हरेत् ॥ (१२।३)

मातुश्च यौतकं यत् स्यात् कुमारीभाग एव सः । (१३।१)

दौहित्र एव वा रिक्थम् अपुत्रस्य पितुर् हरेत् ॥ (१३।२)

ददाति हि स पिण्डं वै पितुर् मातामहस्य च । (१४।१)

पुत्रदौहित्रयोर् नेह विशेषो धर्मतः स्मृतः ॥ (१४।२)

अन्यत्र जातया सा हि प्रजया पुत्र ईहते । (१५।१)

दुहितान्यत्र जातेन पुत्रेणापि विशिष्यते ॥ (१५।२)

दौहित्रकेण धर्मेण नात्र पश्यामि कारणम् । (१६।१)

विक्रीतासु च ये पुत्रा भवन्ति पितुर् एव ते ॥ (१६।२)

असूयवस्त्वधर्मिष्ठाः परस्वादायिनः शठाः । (१७।१)

आसुराद् अधिसंभूता धर्माद् विषमवृत्तयः ॥ (१७।२)

अत्र गाथा यमोद्गीताः कीर्तयन्ति पुराविदः । (१८।१)

धर्मज्ञा धर्मशास्त्रेषु निबद्धा धर्मसेतुषु ॥ (१८।२)

यो मनुष्यः स्वकं पुत्रं विक्रीय धनम् इच्छति । (१९।१)

कन्यां वा जीवितार्थाय यः शुल्केन प्रयच्छति ॥ (१९।२)

सप्तावरे महाघोरे निरये कालसाह्वये । (२०।१)

स्वेदं मूत्रं पुरीषं च तस्मिन् प्रेत उपाश्नुते ॥ (२०।२)

आर्षे गोमिथुनं शुल्कं केचिद् आहुर् मृषैव तत् । (२१।१)

अल्पं वा बहु वा राजन् विक्रयस्तावद् एव सः ॥ (२१।२)

यद्यप्याचरितः कैश्चिन्नैष धर्मः कथंचन । (२२।१)

अन्येषाम् अपि दृश्यन्ते लोभतः संप्रवृत्तयः ॥ (२२।२)

वश्यां कुमारीं विहितां ये च ताम् उपभुञ्जते । (२३।१)

एते पापस्य कर्तारस्तमस्यन्धे ऽथ शेरते ॥ (२३।२)

अन्यो ऽप्यथ न विक्रेयो मनुष्यः किं पुनः प्रजाः । (२४।१)

अधर्ममूलैर् हि धनैर् न तैर् अर्थो ऽस्ति कश्चन ॥ (२४।२)